1Եւ ապա չուեաց ժողովուրդն յԱսերովթայ, եւ բանակեցաւ յանապատին Փառանու։ 2Եւ խօսեցաւ Տէր ընդ Մովսիսի եւ ասէ. 3Առաքեա արս եւ լրտեսեսցեն զերկիրն Քանանացւոց, զոր ես տաց որդւոցն Իսրայելի ի կալուածս. այր մի ըստ ցեղի, ըստ տանց նահապետաց իւրեանց առաքեսցես զնոսա՝ զամենայն գլխաւորս ի նոցանէ։ 4Եւ առաքեաց զնոսա Մովսէս յանապատէն Փառանու ըստ բանին Տեառն. ամենեքին արք գլխաւորք էին նոքա յորդւոցն Իսրայելի։ 5Եւ այս են անուանք նոցա. ցեղին Ռուբենի, Սաղամիէլ որդի Զաքուրայ. 6ցեղին Շմաւոնի, Սափատ որդի Քուրեայ. 7ցեղին Յուդայ, Քաղէբ որդի Յեփոնեայ, 8ցեղին Իսաքարայ, Գաղամ որդի Յովսեփայ. 9ցեղին Եփրեմայ, Աւսէս որդի Նաւեայ. 10ցեղին Բենիամինի, Փաղտի որդի Ռափուայ. 11ցեղին Զաբուղոնի, Յուդիէլ որդի Սուդիայ. 12ցեղին Յովսեփայ՝ որդւոցն Մանասէի, Գադդէ որդի Սուսայ. 13ցեղին Դանայ, Ամիէլ որդի Գամայի. 14ցեղին Ասերայ, Սաթուր որդի Միքայելի. 15ցեղին Նեփթաղիմայ, Աբի որդի Յաբիայ. 16ցեղին Գադայ, Գուդիէլ որդի Մակքեայ։

17Այս անուանք են արանցն՝ զոր առաքեաց Տէր լրտեսել զերկիրն Քանանացւոց. եւ անուանեաց Մովսէս զանուն Աւսեայ որդւոյ Նաւեայ՝ Յեսու։ 18Եւ առաքեաց զնոսա Մովսէս յանապատէն Փառանու՝՝ լրտեսել զերկիրն Քանանացւոց, եւ ասէ ցնոսա. Ելէք ընդ անապատդ եւ ամբարձայք ի լեառնն. 19եւ տեսջիք զերկիրն զինչ իցէ, եւ զժողովուրդն որ նստի ի նմա, եթէ զօրաւորագո՞յն իցէ թէ անաւագ, եթէ սակա՞ւք իցեն եթէ բազումք. 20եւ զի՞նչ իցէ երկիրն յորում նոքա բնակեալ իցեն, եթէ բարի՞ իցէ եթէ չար. եւ զի՞նչ իցեն քաղաքքն յորս նոքա բնակեալ են, պարսպաւո՞րք իցեն եթէ անպարիսպք. 21եւ զի՞նչ իցէ երկիրն, պարա՞րտ իցէ եթէ տկար. եթէ իցէ՞ ի նմա ծառատունկ եթէ ոչ։ Եւ ժրասջիք, առջիք ի պտղոյ երկրին։ Եւ աւուրք գարնայնոյ էին աւուրքն՝՝ խայծուածոյ խաղողոյ։ 22Եւ ելեալ լրտեսեցին զերկիրն յանապատէն Սինայ մինչեւ ցՐոոբ ի մուտս Եփրաթայ։ 23Ելին ընդ անապատն եւ եկին մինչեւ ցՔեբրոն. եւ անդ Աքիման եւ Սէսի եւ Թաղամի, ազգքն Ենակայ. (եւ Քեբրոն եւթն ամաւ յառաջագոյն շինեալ էր քան զՏայանիս Եգիպտացւոց։) 24Եւ եկին մինչեւ ցՁորն ողկուզոյ, եւ լրտեսեցին զնա՝՝ եւ հատին անտի ուռ որթոյ, եւ ողկոյզ մի խաղողոյ ի նմա, եւ բարձին զնա լծակօք, եւ ի նռանէ եւ ի թզոյ։ 25Եւ անուանեցին զանուն տեղւոյն՝ Ձոր ողկուզոյ, վասն ողկուզին զոր հատին անտի որդիքն Իսրայելի։ 26Եւ դարձան անդրէն որդիքն Իսրայելի՝՝ լրտեսեալ զերկիրն յետ աւուրց քառասնից. 27եւ հասեալ եկին առ Մովսէս եւ առ Ահարոն, եւ առ ամենայն ժողովուրդ որդւոցն Իսրայելի յանապատն Փառան Կադէս. եւ ետուն նոցա զրոյց եւ ամենայն ժողովրդեանն. եւ ցուցին զպտուղ երկրին։ 28Եւ պատմեցին նմա, եւ ասեն ցնա. Չոգաք յերկիրն յոր առաքեցեր զմեզ. երկիր՝ որ բղխէ զկաթն եւ զմեղր, եւ այս է պտուղ նորա։ 29Բայց ազգն սաստիկ էր որ բնակեալ էին ի նմա, եւ քաղաքք ամուրք եւ պարսպաւորք եւ մեծամեծք յոյժ. եւ զազգն Ենակայ տեսաք անդ։ 30Եւ Ամաղէկ բնակեալ էր յերկրին ընդ հարաւակողմն. եւ Քետացին եւ Խեւացին՝՝ եւ Յեբուսացին եւ Ամովրհացին բնակեալ են առ լերամբքն, եւ Քանանացին առ ծովեզերբն եւ առ Յորդանանաւ։ 31Լռեցոյց Քաղէբ զժողովուրդն ի Մովսիսէ, եւ ասէ ցնոսա. Ոչ այդպէս է. այլ՝՝ ելանելով ելցուք եւ ժառանգեսցուք զնա. զի կարօղ եմք յաղթել նոցա։ 32Եւ արքն որ ընդ նմա երթեալ էին՝ ասէին. Ոչ ելցուք, քանզի ոչ կարեմք երթալ ի վերայ ազգին զի զօրագոյն քան զմեզ է յոյժ։ 33Եւ զարհուրեցուցին երկրաւն զոր լրտեսեցին՝ զորդիսն Իսրայելի եւ ասեն. Երկիրն ընդ որ մեք անցաք լրտեսել զնա, երկիր մարդածախ է բնակչաց իւրոց. եւ ամենայն ազգն զոր տեսաք ի նմա՝ արք յաղթահասակք են. 34տեսաք անդ եւ սկայս եւ էաք յաչս նոցա իբրեւ մարախ՝՝։