1Խօսեցաւ Տէր ընդ Մովսիսի եւ ասէ. 2Խօսեաց ընդ որդիսն Իսրայելի եւ ասասցես ցնոսա. Տօնս Տեառն զոր առնիցէք, կոչեցեալք եւ սուրբք՝՝ այնք իցեն իմ տօնք. 3զվեց օր գործեսցես զգործ, յաւուրն եւթներորդի շաբաթ հանգիստ անուանեալ սուրբ Տեառն՝՝. զամենայն գործ մի՛ գործիցէք, զի շաբաթ Տեառն է յամենայն բնակութեան ձերում։

4Զի այն են տօնք Տեառն, եւ նոքա անուանեալք են սուրբք զորս անուանիցէք ի տօնս նոցա՝՝։ 5Յառաջնում ամսեանն ի տասն եւ ի չորս ամսոյն ի մէջ երեկորեայցն զատիկ Տեառն. 6եւ յաւուրն հնգետասաներորդի նորին ամսոյ՝ տօն բաղարջակերաց Տեառն. զեւթն օր բաղարջ կերիջիք։ 7Եւ օրն առաջին անուանեալ՝՝ սուրբ եղիցի ձեզ. զամենայն գործ սպասաւորութեան մի՛ առնիցէք։ 8Եւ մատուսջիք ողջակէզս Տեառն զեւթն օր, եւ օրն եւթներորդ՝ սուրբ կոչեցեալ՝՝ լիցի ձեզ. զամենայն գործ սպասաւորութեան մի՛ գործիցէք։

9Խօսեցաւ Տէր ընդ Մովսիսի եւ ասէ. 10Խօսեաց ընդ որդիսն Իսրայելի եւ ասասցես ցնոսա. Յորժամ մտանիցէք յերկիրն զոր ես տաց ձեզ, եւ հնձիցէք զհունձս նորա, բերիցէք զորայն, զպտուղ հնձոց ձերոց, առ քահանայն. 11եւ հանցէ զորայն առաջի Տեառն յընդունելութիւն առ ի ձէնջ. եւ ի վաղիւ անդր աւուրն առաջնոյ հանցէ՝՝ զայն քահանայն։ 12Եւ արասցէ յաւուրն յորում մատուցանիցէ զորայն՝ ոչխար՝՝ անարատ տարեւոր յողջակէզ Տեառն. 13եւ զզոհն իւր երկուս տասանորդս ի նաշհոյ զանգելոյ իւղով, զոհ Տեառն ի հոտ անուշից Տեառն. եւ նուէր նորա՝ չորրորդ մասն դորակի գինւոյ. 14եւ պան մի՛ եւ զամենայն մուրկ փխրեալ՝՝ մի՛ ուտիցէք մինչեւ յօրն յորում մատուցանիցէք պատարագս Աստուծոյ ձերոյ. օրէն յաւիտենական յազգս ձեր, յամենայն բնակութեան ձերում։

15Եւ համարեսջիք ձեզ ի վաղուէ շաբաթուն՝ յօրէ յորմէ մատուցանիցէք զորայ ուխտին, եւթն եւթներորդս բովանդակս թուիցես. 16մինչեւ ցվաղիւն յետին եւթներորդին թուիցէք յիսուն օր, եւ մատուցանիցէք զոհ նոր Տեառն։ 17Ի բնակութենէ ձերմէ մատուցանիցէք պանս նուիրի, երկուս պանս. յերկուց տասանորդաց լինիցի պան մի, խմորեալք եփեսցին յառաջնոց արդեանց Տեառն։ 18Եւ մատուցանիցէք ընդ հացիցն եւթն որոջ անարատ տարեւոր, եւ զուարակ մի յանդւոյ, եւ խոյս երկուս անարատս, եւ եղիցին յողջակէզ Տեառն, եւ զոհք նոցա եւ նուէրք նոցա՝ զոհ ի հոտ անուշից Տեառն։ 19Եւ առնիցէք նոխազ մի՛ յայծեաց վասն մեղաց, եւ երկուս գառինս տարեւորս ի զոհ խաղաղականաց ընդ պանից առաջնոց արմտեացն՝՝։ 20Եւ նուիրեսցէ զնոսա քահանայն նուէր՝՝ ընդ պանից առաջնոց արմտեացն յանդիման Տեառն հանդերձ երկու գառամբքն. սրբեսցին Տեառն, քահանային որ մատուցանիցէ զնոսա՝՝ եղիցին։ 21Եւ կոչեսջիք զօրն զայն անուանեալ կոչեցեալ,՝՝ սուրբ եղիցի ձեզ. զամենայն գործ սպասաւորութեան մի՛ գործիցէք ի նմա. օրէն յաւիտենական եղիցի յազգս ձեր յամենայն բնակութեան ձերում։

22Եւ յորժամ հնձիցէք զհունձս երկրի ձերոյ, մի՛ առ հասարակ զնշխար հնձոց անդոյն քո ի հնձել քում ամփոփիցես. եւ զանկեալն հնձոցն քոց մի՛ ժողովեսցես, այլ աղքատին եւ պանդխտին թողուցուս զայն. զի ես եմ Տէր Աստուած ձեր։

23Խօսեցաւ Տէր ընդ Մովսիսի եւ ասէ. 24Խօսեաց ընդ որդիսն Իսրայելի եւ ասասցես. Յամսեանն եւթներորդի որ օր մի իցէ ամսոյն, եղիցի ձեզ հանգիստ, յիշատակ փողոց, կոչեցեալ սուրբ Տեառն՝՝։ 25Զամենայն գործ սպասաւորութեան մի՛ գործիցէք, եւ մատուցանիցէք ողջակէզ Տեառն։

26Խօսեցաւ Տէր ընդ Մովսիսի եւ ասէ. 27Ի տասներորդում աւուր ամսոյն եւթներորդի, որ օրն քաւութեան է, կոչեցեալ սուրբ եղիցի ձեզ. եւ խոնարհեցուսջիք զանձինս ձեր յիններորդ օրէն յերեկորեայ՝՝, եւ մատուսջիք ողջակէզս Տեառն։ 28Զամենայն գործ մի՛ գործիցէք յաւուր յանմիկ, զի օր քաւութեան է նա ձեզ, քաւել վասն ձեր առաջի Տեառն Աստուծոյ ձերոյ։ 29Ամենայն անձն որ ոչ խոնարհեսցի յաւուր յայնմիկ, սատակեսցի ի ժողովրդենէ իւրմէ։ 30Եւ ամենայն անձն որ գործիցէ գործ յաւուր յայնմիկ, կորիցէ անձն այն ի ժողովրդենէ իւրմէ։ 31Զամենայն գործ մի՛ գործիցէք. օրէն յաւիտենական եղիցի յազգս ձեր, յամենայն բնակութիւնս ձեր։ 32Շաբաթ շաբաթուց եղիցի ձեզ, եւ խոնարհեցուսջիք զանձինս ձեր. յիններորդէ ամսեանն յերեկորեայ մինչեւ ցերեկոյն շաբաթացուսջիք զշաբաթս ձեր։

33Խօսեցաւ Տէր ընդ Մովսիսի եւ ասէ. 34Խօսեաց ընդ որդիսն Իսրայելի եւ ասասցես. Ի հնգետասաներորդի աւուր ամսեանն եւթներորդի տօն տաղաւարահարաց զեւթն օր Տեառն։ 35Եւ օրն առաջին կոչեցեալ սուրբ. զամենայն գործ սպասաւորութեան մի՛ գործիցէք։ 36Զեւթն օր մատուցանիջիք ողջակէզս Տեառն, եւ օրն եւթներորդ կոչեցեալ,՝՝ սուրբ եղիցի ձեզ, եւ մատուցանիցէք ողջակէզ Տեառն. քանզի ելք են՝՝. զամենայն գործ սպասաւորութեան մի՛ գործիցէք։ 37Այս են տօնք Տեառն՝ զորս կոչիցէք կոչեցեալ սուրբս, առ ի մատուցանելոյ ընծայ Տեառն, զողջակէզս եւ զզոհս իւրեանց՝՝, եւ նուէրս օր ըստ օրէ, 38առանց շաբաթուց Տեառն, եւ առանց ընծայիցն ձերոց, եւ առանց ամենայն ուխտիցն ձերոց, եւ առանց կամայականացն ձերոց զոր տայցէք Տեառն։ 39Եւ ի հնգետասաներորդում աւուր ամսոյն եւթներորդի յորժամ բովանդակիցէք զարդիւնս երկրին, տօնեսջիք Տեառն զեւթն օր. յաւուրն առաջնում հանգիստ, եւ յաւուրն ութներորդի հանգիստ։ 40Եւ առնուցուք ձեզ յաւուրն առաջնում պտուղս զգեղեցիկ ծառոց, կողերս յարմաւենեաց, եւ ոստս ի տերեւախիտ ծառոց եւ յուռեաց եւ ոստս հագնեաց՝՝ ի ձերոց, ուրախ լինել առաջի Տեառն զեւթն օր։ 41Եւ տօնեսջիք զնա տօն Տեառն զեւթն օր տարւոյն. օրէն յաւիտենական յազգս ձեր, յամսեանն եւթներորդի տօնեսջիք զնա։ 42Ի տաղաւարս բնակեսջիք զեւթն օր. ամենայն բնակքն Իսրայելի բնակեսցեն ի տաղաւարս. 43զի գիտասցեն ազգք ձեր, եթէ ի տաղաւարս բնակեցուցի զորդիսն Իսրայելի ի հանելն ինձ զնոսա յերկրէն Եգիպտացւոց. ես եմ Տէր Աստուած ձեր։ 44Եւ պատմեաց Մովսէս զտօնս Տեառն որդւոցն Իսրայելի։