1Եւ ասէ Տէր ցՅեսու. Մի՛ երկնչիր եւ մի՛ զանգիտիցես. ա՛ռ դու ընդ քեզ զամենայն արս պատերազմողս, եւ յարուցեալ ելցես ի Գայի. ահա ես տամ ի ձեռս քո զթագաւորն Գայեայ եւ զժողովուրդ նորա, եւ զքաղաք նորա եւ զերկիր նորա. 2եւ արասցես ընդ Գայի եւ ընդ թագաւորն նորա, զոր օրինակ արարեր ընդ Երիքով եւ ընդ թագաւորն նորա, եւ զաւար նորա եւ զանասուն նորա ածցես յաւարի։ Եւ կացուսցես քեզ դարանամուտս քաղաքին զկնի նորա։ 3Եւ յարեաւ Յեսու եւ ամենայն ժողովուրդն պատերազմող ելանել ի Գայի. եւ ընտրեաց Յեսու երեսուն հազար արանց զօրաւորս զօրութեամբ, եւ առաքեաց զնոսա զցայգ. 4եւ պատուիրեաց նոցա եւ ասէ. Տեսէք, զի դուք դարանամուտք լինիցիք յետուստ քաղաքին. եւ մի՛ կարի հեռի լինիջիք ի քաղաքէն, եւ կացջիք պատրաստք ամենեքին. 5եւ ես եւ ամենայն ժողովուրդն որ ընդ իս՝ մօտեսցուք ի քաղաքն. եւ եղիցի յորժամ ելանիցեն բնակիչքն Գայեայ ընդդէմ մեր իբրեւ զառաջինն, փախիցուք յերեսաց նոցա. 6եւ իբրեւ ելցեն զկնի մեր, մեկնեսցուք զնոսա ի քաղաքէ անտի, եւ ասիցեն թէ՝ Փախեան յերեսաց մերոց իբրեւ զառաջինն. եւ իբրեւ փախիցուք յերեսաց նոցա, 7դուք յարիջիք ի դարանէ անտի եւ մտջիք ի քաղաքն եւ հարջիք՝՝ զքաղաքն. եւ տացէ զնոսա Տէր Աստուած Իսրայելի ի ձեռս մեր՝՝։ 8Եւ եղիցի յորժամ առնուցուք զքաղաքն, այրեսջիք զնա հրով. ըստ այսմ օրինակի՝՝ առնիջիք, ահա պատուիրեցի ձեզ։ 9Եւ առաքեաց զնոսա Յեսու, եւ գնացին ի դարանն, եւ մտին ղօղեցան ի մէջ Բեթելայ եւ ի մէջ Դանայ ի ծովակողմանէն Գայեայ. եւ ագաւ Յեսու զայն գիշեր ի մէջ ժողովրդեանն։

10Եւ կանխեալ Յեսու ընդ առաւօտն արար հանդէս ժողովրդեանն. եւ ել ինքն եւ ծերքն Իսրայելի առաջի ժողովրդեանն ի վերայ Գայեայ։ 11Եւ ամենայն զօր պատերազմող ելին ընդ նոսա, եւ՝՝ գնացին ելին եկին հանդէպ քաղաքին յարեւելից կողմանէ, եւ դարանամուտք քաղաքին ի ծովակոյս կողմանէ՝՝, եւ բանակեցան ի հիւսիսոյ Գայեայ, եւ ձոր ընդ մէջ նոցա եւ Գայեայ։ 12Եւ ա՛ռ հինգ հազար արանց եւ եմոյծ զնոսա ի դարան ընդ Բեթաւն եւ ընդ ծովն Գայեայ՝՝։ 13Եւ արկ զժողովուրդն եւ՝՝ զամենայն բանակն ի հիւսիսոյ քաղաքին, եւ վերջ նոցա ի ծովակողմն քաղաքին. եւ անց Յեսու զգիշերն զայն ընդ մէջ ձորոյն։

14Եւ եղեւ իբրեւ ետես թագաւորն Գայեայ, փութացաւ կանխեաց եւ ել ընդդէմ նոցա. եւ արք քաղաքին երթային հանդէպ նոցա՝՝ ի պատերազմ, ինքն եւ ամենայն ժողովուրդ իւր ի ժամանակին յանդիման Արաբայ. եւ ինքն ոչ գիտէր եթէ դարան գործեալ իցէ նմա յետուստ քաղաքին։ 15Իբրեւ ետես Յեսու դարձաւ անդրէն ընդ կրուկն՝՝, եւ ամենայն Իսրայէլ յերեսաց նոցա, եւ փախեան ընդ ճանապարհ անապատին։ 16Եւ ստիպեաց ամենայն ժողովուրդ երկրին՝՝ երթալ զհետ նոցա. եւ պնդեցան երթալ զկնի որդւոցն Իսրայելի. եւ նոքա՝՝ մեկնեցան ի քաղաքէ անտի։ 17Եւ ոչ մնաց ի Գայի եւ ի Բեթէլ՝ որ ոչ պնդեցաւ զհետ Իսրայելի. եւ թողին զքաղաքն ի բաց, եւ յարձակեցան զհետ Իսրայելի։

18Եւ ասէ Տէր ցՅեսու. Ձգեա զձեռն քո գայիսոնաւդ որ ի ձեռին քում ի վերայ քաղաքին, զի ի ձեռս քո մատնեցի զնա. եւ դարանակալքն ելցեն վաղվաղակի ի տեղւոջէ իւրեանց.՝՝ եւ ձգեաց Յեսու զգայիսոնն եւ զձեռս իւր՝՝ ի վերայ քաղաքին. 19եւ դարանակալքն յարեան վաղվաղակի ի տեղւոջէ իւրեանց եւ ելին իբրեւ ձգեաց զձեռն, եւ մտին ի քաղաքն, եւ առին զնա, եւ փութացեալ այրեցին զքաղաքն հրով։ 20Եւ հայեցեալ բնակչացն Գայեայ ի թիկունս իւրեանց, տեսանէին զի ելանէր ծուխ քաղաքին մինչեւ յերկինս. եւ ոչ եւս ուրեք գոյր նոցա փախուստ այսր կամ անդր. եւ ժողովուրդն որ թաքուցեալ էր յանապատին՝ յարեան ի վերայ հետամտացն։ 21Եւ Յեսու եւ ամենայն ժողովուրդն իբրեւ տեսին թէ առին դարանակալքն զքաղաքն, եւ զի ելանէր ծուխ քաղաքին մինչեւ յերկինս, դարձան անդրէն ընդ կրուկն, եւ հարին զարսն Գայեայ։ 22Եւ նոքա ելին ի քաղաքէ անտի ընդ առաջ նոցա. եւ եղեն ի մէջ բանակին. նոքա անտի՝ եւ սոքա աստի. եւ հարին զնոսա մինչեւ չմնալոյ ի նոցանէ ապրեալ եւ փախստական։ 23Եւ զթագաւորն Գայեայ ձերբակալ արարին կենդանւոյն, եւ ածին առ Յեսու։

24Եւ իբրեւ դադարեցին որդիքն Իսրայելի ի կոտորելոյ զամենայն Գայացիս, զորս ի դաշտս, զորս ի լերինս զառիվայրին մինչեւ հալածեցին՝՝ զնոսա. եւ անկան ամենեքին ի սուր սուսերի մինչեւ ի սպառ. եւ դարձաւ Յեսու ի Գայի, եւ եհար զնա սրով սուսերի։ 25Եւ եղեն անկեալք յաւուր յայնմիկ յառնէ մինչեւ ցկին՝ երկոտասան հազար, ամենայն բնակիչքն Գայեայ։ 26Եւ Յեսու ոչ դարձոյց զձեռն իւր զոր ձգեաց գայիսոնաւն՝ մինչեւ նզովեաց զամենայն բնակիչսն Գայացւոց. 27բաց յանասնոյ եւ յաւարէ քաղաքին զոր աւարեցին որդիքն Իսրայելի ըստ հրամանի Տեառն՝ որպէս հրամայեաց Տէր Յեսուայ։ 28Եւ այրեաց Յեսու զքաղաքն հրով եւ արար զնա բլուր հողոյ՝ անշէն յաւիտեան մինչեւ ցայսօր։ 29Եւ զթագաւորն Գայեայ կախեաց զերկճիւղ փայտէ, եւ էր ի վերայ փայտին կախեալ՝՝ մինչեւ ցերեկոյ. եւ ընդ մտանել արեգականն հրամայեաց Յեսու եւ իջուցին զնա ի փայտէ անտի, եւ ընկեցին զնա ի գուբ առ դրան քաղաքին, եւ կուտեցին ի վերայ նորա կարկառ քարանց մինչեւ ցայսօր։

30Յայնժամ շինեաց Յեսու սեղան Տեառն Աստուծոյ Իսրայելի ի լերինն Գեբաղ 31որպէս պատուիրեաց Մովսէս ծառայ Տեառն որդւոցն Իսրայելի. զոր օրինակ գրեալ է յօրէնսն Մովսիսի, սեղան յողջոց քարանց՝ յորս ոչ մերձեալ իցէ երկաթ. եւ անդ եհան ողջակէզ Տեառն եւ զոհ փրկութեան։ 32Եւ գրեաց Յեսու ի վերայ քարանցն զերկրորդումն օրինացն զօրէնսն Մովսիսի, զոր գրեաց առաջի որդւոցն Իսրայելի։ 33Եւ ամենայն Իսրայէլ, եւ ծերք նոցա եւ դատաւորք նոցա եւ դպիրք նոցա, երթային աստի անտի հանդէպ տապանակին, եւ քահանայքն Ղեւտացիք բարձին զտապանակ ուխտին Տեառն, եւ եկն եւ բնակ. եւ էին կէսք ի նոցանէ մերձ ի լեառն Գարիզին, եւ կէսք ի նոցանէ մերձ ի լեառն Գեբաղ, որպէս պատուիրեաց Մովսէս ծառայ Տեառն՝ օրհնել նախ զժողովուրդն։ 34Եւ ապա ընթերցաւ զամենայն բանս օրինացս այսոցիկ, զօրհնութիւնս եւ զանէծս՝ ըստ ամենայն գրելոցն յօրէնսն Մովսիսի՝՝։ 35Եւ ոչ էր բան յամենայնէ զոր պատուիրեաց Մովսէս Յեսուայ՝ զոր ոչ ընթերցաւ Յեսու յականջս ամենայն եկեղեցւոյն Իսրայելի, արանց եւ կանանց եւ մանկանց, եւ եկացն յեցելոցն յԻսրայէլ։