1Եւ Յեսու ծերացեալ եւ անցեալ զաւուրբք. եւ ասէ Տէր ցՅեսու. Դու ծերացեալ ես եւ անցեալ զաւուրբք, եւ երկիր բազում մնացեալ է ի ժառանգութենէ։ 2Եւ այս է երկիրն մնացեալ. ամենայն սահմանք Փղշտացւոց, 3Գեսուրի եւ Քանանացին, Յանշինէ՝՝ անտի ընդդէմ Եգիպտոսի՝ մինչեւ ի սահմանս Ակկարոնի, ընդ աջմէ՝՝ Քանանացւոյն համարի, հնգից թագաւորացն Փղշտացւոց, Գազացւոյն եւ Ազովտացւոյն եւ Ասկաղոնացւոյն եւ Գեթացւոյն եւ Ակկարոնացւոյն, եւ Խեւացւոյն. 4ի Թեմանայ՝՝ ամենայն երկիրն Քանանացւոյն, Գազա եւ Սիդոնացիք՝՝ մինչեւ ցՅափեկա՝ մինչեւ ցսահմանս Ամովրհացւոյն. 5եւ զամենայն երկիրն Արաբայ ի Փղշտացւոց՝ եւ զամենայն Լիբանան յելիցն արեւու, ի Գաղգաղայ,՝՝ առ ոտամբ լերինն Հերմոնի մինչեւ ցմուտս Եմաթայ. 6ամենայն որ բնակեալ իցէ զլեռնակողմնն, ի Լիբանանէ մինչեւ ի Մասերեփովթմայիմ, զամենայն Սիդոնացիս, ես սատակեցից զնոսա յերեսաց որդւոցն Իսրայելի. բայց դու բաշխեա զնոսա ի ժառանգութիւն Իսրայելի, որպէս պատուիրեցի քեզ։

7Եւ արդ բաժանեա զերկիրս զայս ի ժառանգութիւն ինն ցեղիցն եւ կիսոյ ցեղին Մանասէի, ի Յորդանանէ մինչեւ ցծովն մեծ ընդ կողմն արեւմտից՝ տացես զնա. եւ ծովն մեծ սահմանեսցէ։ 8Եւ երկու ցեղիցն եւ կիսոյ ցեղին Մանասէի՝ որ են ընդ Ռուբենի եւ ընդ Գադայ որ՝՝ առին զժառանգութիւն իւրեանց զոր ետ Մովսէս յայնկոյս Յորդանանու յարեւելից. բաժանեաց նոցա Մովսէս ծառայ Տեառն, 9յԱրոյերայ որ է առ եզերբ հեղեղատին Առնովնայ, եւ զքաղաքն որ է ի մէջ ձորոյն, եւ զամենայն Միսովր, ի Մեդաբայ մինչեւ ցԴեբոն, 10զամենայն քաղաքսն Սեհոնի արքայի Ամովրհացւոց որ թագաւորեաց յԵսեբոն, մինչեւ ցսահմանս որդւոցն Ամոնայ, 11եւ զԳաղաադայինն եւ զսահմանս Գեսուրայ եւ զՄաքաթեայ, եւ զամենայն լեառնն Հերմոն, եւ զամենայն Բասանաստան մինչեւ ցՍելքա. 12զամենայն թագաւորութիւնն Ովգայ ի Բասան, որ թագաւորեաց յԱստարովթ եւ յԵդրային. նա մնաց ի մնացորդաց սկայիցն. եւ եհար զնա Մովսէս եւ սատակեաց։ 13Եւ ոչ սատակեցին որդիքն Իսրայելի զԳեսուրի եւ զՄաքաթի եւ զՔանանացին՝՝. եւ բնակէր թագաւորն Գեսուրայ եւ Մաքաթեայ՝՝ ի մէջ որդւոցն Իսրայելի մինչեւ ցայսօր։ 14Բայց ցեղին Ղեւեայ ոչ տուաւ բաժին եւ ժառանգութիւն. զի Տէր Աստուած Իսրայելի է նոցա ժառանգութիւն որպէս ասաց նոցա Տէր։ Եւ այս են բաժինք զոր բաժանեաց Մովսէս որդւոցն Իսրայելի, յՌաբովթ Մովաբ յայնկոյս Յորդանանու յանդիման Երեքոյի։՝՝

15Եւ ետ Մովսէս ըստ ցեղին Ռուբենի եւ ըստ տոհմից նոցա. 16եւ եղեն սահմանք նոցա յԱրոյերայ որ կայ յանդիման ձորոյն Առնովնայ, եւ քաղաքն ի ձորն Առնովնայ, եւ ամենայն Միսովր. 17եւ Մեդաբայ մինչեւ ցԵսեբոն, եւ զամենայն քաղաքս նոցա որ են ի Միսովր՝՝ եւ զԴեբոն, եւ զԲամովթբահաղ. եւ զտունս Բաաղմովթայ, 18եւ զՅասա եւ զԿեդմովթ եւ զՄեփայաթ 19եւ զԿարիաթեմ եւ զՍեբամա եւ զՍարեթ եւ զՍիովր ի լերինն Ենակայ, 20եւ զԲեթփագովր եւ զԱսեդովթփասգա եւ զԲեթսիմովթ, 21եւ զամենայն քաղաքս Միսովրայ, եւ զամենայն թագաւորութիւնն Սեհոնի արքայի Ամովրհացւոց, որ թագաւորեաց յԵսեբոն, զոր եհար Մովսէս՝ զնա եւ զիշխանս Մադիամու, զԵւի եւ զՐոկոմ եւ զՍուր եւ զՈւր եւ զՌովբէ, եւ զիշխանս Պարասիոնացն՝՝ զբնակեալս յերկրին։ 22Եւ զԲաղաամ Բէովրեան զհարցուկն կոտորեցին որդիքն Իսրայելի սրով ի միում վայրկենի՝՝։ 23Եւ եղեն սահմանքն Ռուբենի, Յորդանան սահման՝՝։ Այս է ժառանգութիւն որդւոցն Ռուբենի ըստ տոհմից իւրեանց, քաղաքք եւ աւանք նոցա։

24Եւ ետ Մովսէս որդւոցն Գադայ ըստ տոհմից իւրեանց։ 25Եւ եղեն նոցա սահմանք Յազերայ, եւ ամենայն քաղաքք Գաղաադու. եւ կէս երկրի որդւոցն Ամովնայ մինչեւ ցԱրոյէր որ է յանդիման Ռաբաբայ, 26եւ յԵսեբոնայ մինչեւ ցՀռամովթ՝ առ Մասփայիւ, եւ Բոտանիմ եւ Մանայեմ մինչեւ ցսահմանս Դաբիրայ, 27եւ յեմակն, Բեթարամ եւ Բեթնամրա եւ Սովքով եւ Սափոն. եւ զայլ եւս թագաւորութիւնն՝՝ Սեհոնի արքայի Եսեբոնայ, Յորդանան սահման է՝՝, մինչ ցեզր ծովուն Քեներեթայ, յայնկոյս Յորդանանու յարեւելից։ 28Այս է ժառանգութիւն որդւոցն Գադայ ըստ տոհմից իւրեանց, ըստ քաղաքաց նոցա՝ եւ ագարակք նոցին՝՝։

29Եւ ետ Մովսէս կիսոյ ցեղին Մանասէի. եւ եղեւ կիսոյ ցեղի որդւոցն Մանասէի ըստ տոհմից իւրեանց։ 30Եւ եղեն սահմանք նոցա ի Մանայեմայ, ամենայն Բասան, եւ ամենայն թագաւորութիւնն Ովգայ արքայի Բասանու, եւ ամենայն աւանք Յայիրայ, որ են ի Բասանաստանի, վաթսուն քաղաք. 31եւ կէս Գաղաադու, եւ Աստարովթ եւ Եդրային, քաղաքք թագաւորութեանն Ովգայ ի Բասանաստանի, տուան որդւոցն Մաքիրայ որդւոյ Մանասէի, կիսոյ որդւոցն Մանասէի ըստ տոհմից իւրեանց։

32Սոքա են զորս ժառանգեցոյց Մովսէս յայնկոյս Յորդանանու յՌաբովթ Մովաբ՝՝ յայնմ կողմանէ Յորդանանու հանդէպ Երիքոյի յարեւելից։ 33Եւ ցեղին Ղեւեայ ոչ ետ Մովսէս ժառանգութիւն. զի Տէր Աստուած Իսրայելի ինքնին է ժառանգութիւն նոցա, որպէս խօսեցաւ ընդ նոսա։