1Իվերայ Բաբելացւոց։՝՝ Բանն զոր խօսեցաւ Տէր ի վերայ Բաբելոնի՝ առ երկիրն Քաղդէացւոց ի ձեռն Երեմեայ մարգարէի։ 2Պատմեցէք յազգս, եւ լու արարէք, նշան կանգնեցէք, լսելի արարէք. մի՛ ծածկիցէք, ասասջիք. Առաւ Բաբելոն, յամօթ եղեւ Բէլ, փափուկքն աներկեւղք, մատնեցաւ՝՝ Մերովդաք, յամօթ եղեն կուռք նորա, ամաչեցին գարշելիք նորա։ 3Զի ել ի վերայ նորա ազգ ի հիւսիսոյ, նա դիցէ զերկիր նորա յապականութիւն. եւ ոչ ոք իցէ որ բնակիցէ ի նմա ի մարդոյ մինչեւ յանասուն, զի խախտեցան եւ գնացին։

4Յաւուրսն յայնոսիկ եւ ի ժամանակին յայնմիկ, ասէ Տէր, եկեսցեն որդիքն Իսրայելի, ինքեանք եւ որդիքն Յուդայ ի միասին, շրջեսցին եւ լալով գայցեն առ Տէր՝՝ Աստուած իւրեանց խնդրեսցեն. 5մինչեւ ի Սիոն հարցցեն ի ճանապարհէ, այսր դիմեսցեն, եւ եկեսցեն եւ ապաւինեսցին ի Տէր. զի ուխտ յաւիտենից է, եւ ոչ մոռասցին՝՝։

6Իբրեւ զոչխարս կորուսեալս եղեւ ժողովուրդ իմ, հովիւք նոցա մերժեցին զնոսա, ի վերայ լերանց մոլորեցուցին զնոսա. ի լեռնէ ի բլուր գնացին, մոռացան զմակաղատեղս իւրեանց։ 7Ամենեքեան որ գտանէին՝ սատակէին զնոսա. թշնամիք նոցա ասացին. Մի՛ ներեսցուք նոցա՝՝, փոխանակ զի մեղան Տեառն, արօտք արդարութեան է, եւ Տեառն որ ժողովեաց զհարսն նոցա։ 8Օտարացարուք՝՝ ի միջոյ Բաբելոնի. եւ յերկրէդ Քաղդէացւոց ելէք, եւ եղերուք իբրեւ զնոխազս առաջի խաշանց։ 9Զի ահաւասիկ ես յարուցից եւ ածից ի վերայ Բաբելացւոց զժողովս ազգաց մեծամեծաց յերկրէ հիւսիսոյ, եւ ճակատեսցին զնովաւ. եւ անտի ըմբռնեսցի, իբրեւ նետ իմաստուն պատերազմողի՝ որ ոչ դարձցի ունայն։ 10Եւ եղիցի երկիրն Քաղդէացւոց յաւար, եւ ամենայն աւարառուքն նորա յագեսցին, ասէ Տէր։

11Զի ուրախ լինէիք եւ պարծէիք յափշտակել զժառանգութիւն իմ՝՝, զի խայտայիք իբրեւ զուարակս ի վերայ դալարոյ, եւ ոգորէիք իբրեւ զցուլս՝՝, 12յամօթ եղեւ մայրն ձեր յոյժ, մայրն որ ի բարութեան էր. ահաւադիկ վախճան՝՝ ազգաց՝ աւեր, անջուր եւ անապատ։ 13Ի բարկութենէ Տեառն մի՛ բնակեսցի, այլ եղիցի յապականութիւն առ հասարակ. եւ ամենայն որ անցանիցէ ընդ Բաբելոն՝ տրտմեսցի, եւ շչեսցէ ի վերայ ամենայն հարուածոց նորա։ 14Ճակատեցարուք շուրջ զԲաբելոնիւ, ամենայն աղեղնաւորք, ձիգ դիք ի նա, եւ մի՛ խնայէք ի նետս ձեր, զի Տեառն մեղաւ։ 15Խրախոյս բարձէք շուրջ զնովաւ, զի լքան ձեռք իւր. անկան մահարձանք, եւ կործանեցան պարիսպք նորա, զի վրէժխնդրութիւն յԱստուծոյ է. խնդրեցէք վրէժս ի դմանէ, որպէս արարն՝ արարէք դմա։ 16Սատակեցէք զզաւակ ի Բաբելոնէ, եւ առնուցու մանգաղ ի ժամանակի հնձոց. յերեսաց Յունական սրոյն իւրաքանչիւր ի ժողովուրդ իւր դարձցին, եւ իւրաքանչիւր յերկիր իւր փախիցեն։

17Ոչխար մոլորեալ Իսրայէլ, առեւծք մերժեցին զնա. նախ եկեր զնա թագաւորն Ասորեստանեայց, եւ յետոյ զոսկերս նորա արքայն Բաբելացւոց։ 18Վասն այդորիկ այսպէս ասէ Տէր զօրութեանց՝ Աստուած Իսրայելի. Ահաւասիկ ես խնդրեցից վրէժ յարքայէն Բաբելացւոց եւ յերկրէ նորա, որպէս խնդրեցի վրէժ յարքայէն Ասորեստանեայց։ 19Եւ պատսպարեցուցից զԻսրայէլ անդրէն ի ճարակս իւր, եւ արածեսցի ի Կարմեղոս եւ ի Բասան, եւ ի լերինն Եփրեմի եւ ի Գաղաադ յագեսցին անձինք նոցա։ 20Յաւուրսն յայնոսիկ եւ ի ժամանակին յայնմիկ, ասէ Տէր, խնդրեսցեն զանիրաւութիւնն Իսրայելի, եւ ոչ եւս իցէ, եւ զմեղս՝՝ Յուդայ եւ ոչ գտանիցին. զի քաւիչ եղէց անիրաւութեանց նոցա ի վերայ երկրի։ 21Ել դառնութեամբ ի վերայ նորա, եւ ի բնակչաց նորա խնդրեսջիր վրէժս. սուր եւ ապականութիւն զկնի նորա՝՝, ասէ Տէր, եւ արասջիր ըստ ամենայնի զոր պատուիրեցի քեզ։ 22Ձայն պատերազմի յերկրէն Քաղդէացւոց՝՝, եւ բեկումն մեծ։ 23Զիա՜րդ խորտակեցաւ եւ մանրեցաւ ուռնն ամենայն երկրի, զիա՜րդ եղեւ Բաբելոն յապականութիւն ի մէջ ազգաց։ 24Յարձակեսցին ի վերայ քո, եւ ըմբռնեսցիս, Բաբելոն, եւ ոչ իմասցիս՝՝. գտար եւ ըմբռնեցար, զի Տեառն ընդդէմ դարձար։ 25Եբաց Տէր զգանձս իւր, եւ եհան զանօթս բարկութեան իւրոյ. զի գործ Տեառն զօրութեանց է յերկրին Քաղդէացւոց։ 26Եկին հասին նմա ժամանակք իւր՝՝, բացէք զշտեմարանս նորա, որոնեցէք զնա իբրեւ զայրս՝՝, եւ սատակեցէք զնա. մի՛ մնասցեն նոցա մնացորդք։ 27Ցամաքեցուցէք զամենայն պտուղս՝՝ նորա, եւ իջցեն ի սպանումն. վա՜յ նոցա, զի եկն օր նոցա եւ ժամանակ վրէժխնդրութեան նոցա։ 28Ձայն փախուցելոց եւ ապրելոց յերկրէն Բաբելացւոց, պատմել ի Սիոն զվրէժխնդրութիւն ի Տեառնէ Աստուծոյ մերմէ, զվրէժխնդրութիւն տաճարի իւրոյ։

29Պատուէր տուք բազմաց ի վերայ Բաբելոնի, ամենայն աղեղնաւորաց թէ՝ Բանակեցարուք զդովաւ շուրջանակի, զի մի՛ ոք իցէ որ ապրիցի ի դմանէ. հատուցէք դմա ըստ գործոց իւրոց, ըստ ամենայնի զոր արար՝ արարէք դմա. զի Տեառն ընդդէմ դարձաւ, Աստուծոյ՝ Սրբոյն Իսրայելի։ 30Վասն այնորիկ անկցին երիտասարդք նորա ի հրապարակս նորա, եւ ամենայն արք պատերազմօղք նորա անկեալ դնիցին յաւուր յայնմիկ, ասէ Տէր։ 31Ահաւասիկ ես ի վերայ քո, ասէ Տէր զօրութեանց, ի վերայ հպարտիդ. զի հասեալ է օր քո եւ ժամանակ վրէժխնդրութեան քո։ 32Եւ տկարասցի հպարտութիւն քո՝՝ եւ կործանեսցի, եւ ոչ ոք իցէ որ յարուցանիցէ զնա. եւ վառեցից հուր յանտառս նորա, եւ կերիցէ շուրջ զնովաւ զամենայն։

33Այսպէս ասէ Տէր զօրութեանց. Բռնադատեցան որդիքն Իսրայելի եւ որդիքն Յուդայ. ամենեքեան որ գերեցին զնոսա՝ բռնաբարեցին զնոսա, եւ ոչ կամէին արձակել զնոսա։ 34Որ փրկեաց զնոսա Հզօրն, Տէր ամենակալ անուն է նորա. դատեսցի դատաստան ընդ ոսոխս իւր, զի բարձցէ զերկիրն, եւ զայրասցի բնակչաց՝՝ Բաբելոնի։ 35Սուր ի վերայ Քաղդէացւոցն, ասէ Տէր, եւ ի վերայ բնակչացն Բաբելոնի, եւ ի վերայ ամենայն մեծամեծաց նորա, եւ ի վերայ խորհրդականաց նորա. 36սուր ի վերայ ըղձութեանց նորա, եւ բարձցին. սուր ի վերայ պատերազմողաց նորա, եւ լքցին. 37սուր ի վերայ երիվարաց եւ կառաց նորա. սուր ի վերայ նահատակաց նոցա, եւ՝՝ ի վերայ ամենայն խառնաղանճիցն որ ի մէջ նորա, եւ եղիցին իբրեւ զկանայս. սուր ի վերայ գանձուց նորա, եւ յափշտակեսցին. 38սուր ի վերայ ջուրց նորա, եւ ամաչեսցեն, զի երկիր դրօշելոց է, եւ ի վերայ կղզեացն որովք պարծէին։ 39Վասն այնորիկ ճիւաղք բնակեսցեն ի կղզիսն՝՝, եւ բնակեսցեն ի նմա դստերք համբարեաց. եւ մի՛ եւս շինեսցի ի սպառ, եւ մի՛ եւս բնակեսցի յաւիտեան. 40որպէս սատակեաց Աստուած զերկիրն Սոդոմացւոց եւ Գոմորացւոց եւ զսահմանակիցս նորա, ասէ Տէր, եւ մի՛ բնակեսցէ անդ մարդ, եւ մի՛ պանդխտեսցի ի նմա որդի մարդոյ։

41Ահաւասիկ գունդ գայ ի հիւսիսոյ, եւ ազգ մեծ եւ թագաւորք բազումք զարթիցեն ի ծագաց երկրէ։ 42Աղեղն եւ վաղակաւոր ի ձեռին իւրում, ժպիրհ է եւ մի՛ ողորմեսցի. ձայն նոցա իբրեւ զծով գոչեսցէ. հեծեալք յերիվարս, պատրաստեալք իբրեւ զհուր ի պատերազմ ի վերայ քո, դուստր Բաբելացւոց։ 43Լուաւ զլուր նոցա արքայն Բաբելացւոց, եւ լքան ձեռք նորա. նեղութիւն տագնապեաց զնա, երկունք իբրեւ ծննդականի։ 44Ահաւադիկ իբրեւ զառեւծ ելցէ ի յորձանացն Յորդանանու ի տեղին Եթամայ. զի՝՝ երագ երագ հալածեցից զնոսա ի նմանէ, եւ զամենայն երիտասարդս յարուցից ի վերայ նորա՝՝. զի ո՞վ ոք է իբրեւ զիս, եւ ո՞վ ընդդէմ դառնայցէ ինձ, եւ ո՞վ ոք հովիւ կայցէ ինձ հակառակ՝՝։ 45Վասն այդորիկ լուարուք զխորհուրդ Տեառն զոր խորհեցաւ ի վերայ Բաբելոնի, եւ զխորհուրդս նորա զոր խորհեցաւ ի վերայ բնակչաց Քաղդէացւոց. Եթէ ո՞չ ապականիցէք զգառինս հօտից նոցա, եթէ ո՞չ ապականեսցին ի նոցանէ արօտք. 46զի ի ձայնէ՝՝ կործանման Բաբելոնի շարժեսցի երկիր, եւ գոյժ նորա լուիցի ի հեթանոսս։