1Իսկզբան թագաւորութեանն Յովակիմայ որդւոյ Յովսեայ՝ արքայի Յուդայ, եղեւ բանս այս առ Երեմիա ի Տեառնէ, եւ ասէ. 2Այսպէս ասէ Տէր ցիս. Արա դու քեզ կապանս եւ անուրս, եւ արկ ընդ պարանոց քո. 3եւ առաքեսցես զայն առ թագաւորն Եդովմայեցւոց, եւ առ թագաւորն Մովաբացւոց, եւ առ թագաւոր որդւոցն Ամոնայ, եւ առ թագաւորն Տիւրոսի, եւ առ թագաւորն Սիդոնացւոց, ի ձեռն հրեշտակաց նոցա որ գան յԵրուսաղէմ առ Սեդեկիա արքայ Յուդայ. 4եւ պատուիրեսցես նոցա ասել ցտեարս իւրեանց. Այսպէս ասէ Տէր զօրութեանց Աստուած Իսրայելի. Այսպէս ասասջիք ցտեարսն ձեր. 5Ես արարի զերկիր եւ զմարդիկ եւ զանասուն, եւ որ ինչ ի վերայ երեսաց երկրի՝ զօրութեամբ իմով մեծաւ եւ բազկաւ իւրով բարձու. եւ տաց զնա ում եւ կամ իցէ առաջի աչաց իմոց։ 6Եւ արդ ես եմ որ ետու զամենայն երկիր ի ձեռս Նաբուքոդոնոսորայ արքային Բաբելացւոց ծառայի իմոյ, նա եւ զգազանս անապատի ի գործ արկանել, եւ՝՝ ետու նմա ի ծառայութիւն։ 7Եւ ծառայեսցեն նմա ամենայն ազգք, եւ որդւոյ նորա եւ որդւոյ որդւոյ նորա, մինչեւ եկեսցէ ժամանակ բարկութեան երկրի նորա, եւ ծառայեսցեն նմա՝՝ ազգ բազումք եւ թագաւորք մեծամեծք։ 8Եւ եղիցի՝ ազգ եւ թագաւորութիւն որ ոչ ծառայեսցեն Նաբուքոդոնոսորայ արքայի Բաբելացւոց, եւ որք միանգամ ոչ մուծցեն զպարանոցս իւրեանց ընդ լծով արքային Բաբելացւոց, սրով եւ սովով եւ մահուամբ արարից այցելութիւն ի վերայ ազգին այնմիկ ասէ Տէր, մինչեւ սատակեսցին ի ձեռաց՝՝ նորա։

9Եւ դուք մի՛ լսէք մարգարէից ձերոց եւ ըղձութեանց ձերոց եւ երազոց ձերոց եւ կիւսից ձերոց եւ հաւահմայից ձերոց եւ՝՝ կախարդաց ձերոց, որք ասեն ձեզ թէ՝ Ոչ հարկիցէք արքային Բաբելացւոց. 10զի սուտ մարգարէանան դոքա ձեզ՝ առ ի հեռացուցանելոյ զձեզ յերկրէդ ձերմէ, եւ ցրուեցից զձեզ եւ կորիջիք։ 11Եւ ազգ որ մուծանիցէ զպարանոց իւր ընդ լծով արքային Բաբելացւոց, եւ կայցէ նմա ի հարկի՝ թողից զնա յերկրի իւրում, ասէ Տէր, եւ գործեսցէ զնա եւ բնակեսցէ ի նմա։

12Եւ առ Սեդեկիա արքայ Յուդայ խօսեցայ ըստ ամենայն բանիցս այսոցիկ, եւ ասեմ. Մուծէք զպարանոցս ձեր ընդ լծով արքային Բաբելացւոց, եւ ծառայեցէք նմա եւ ազգի նորա, եւ կեցջիք։ 13Եւ ընդէ՞ր մեռանիք, դու եւ ժողովուրդ քո, սրով եւ սովով եւ մահուամբ, որպէս եւ խօսեցաւ Տէր առ ազգ, որ ոչ ծառայիցէ արքային Բաբելացւոց։ 14Մի՛ լսէք բանից մարգարէիցն որ ասեն ձեզ թէ՝ Մի՛ հարկիք՝՝ արքային Բաբելացւոց. զուր մարգարէանան նոքա ձեզ։ 15Զի ոչ առաքեցի զնոսա, ասէ Տէր, եւ նոքա մարգարէանան յանուն իմ սուտ առ ի կորուսանելոյ զձեզ. եւ կորիցէք դուք եւ մարգարէքդ, որ մարգարէանան ձեզ տարապարտուց ստութեամբ։՝՝

16Եւ ցքահանայս եւ ցամենայն ժողովուրդն՝ զոր խօսեցայ ասասցես՝՝. Այսպէս ասէ Տէր. Մի՛ լսէք բանից մարգարէիցն որ մարգարէանան ձեզ եւ ասեն. Ահա սպաս տան Տեառն դարձցի ի Բաբելոնէ այժմ ընդ հուպ. զուր մարգարէանան ձեզ, եւ ես ոչ առաքեցի զնոսա՝՝։ 17Մի՛ լսէք նոցա, այլ ծառայեցէք արքային Բաբելացւոց՝ եւ կեցջիք. եւ ընդէ՞ր լինիցի քաղաքդ աւերակ։ 18Եթէ մարգարէք իցեն եւ իցէ բան Տեառն առ նոսա, եկեսցեն եւ յանդիման լիցին ինձ. զի այսպէս ասէ Տէր. Եւ մնացեալ սպասն զոր ոչ ա՛ռ արքայն Բաբելացւոց՝ յորժամ գերեաց զՅեքոնիա յԵրուսաղեմէ, ի Բաբելոն երթիցէ, ասէ Տէր զօրութեանց։ Այլ վասն չերթալոյ սպասուցն մնացելոց ի տան Տեառն եւ ի տան թագաւորին Յուդայ յԵրուսաղեմէ ի Բաբելոն, 19այսպէս՝՝ ասէ Տէր զօրութեանց վասն սեանցն եւ վասն ծովուն եւ վասն մեքենովթիցն եւ մնացորդաց սպասուցն՝ որ մնացին ի քաղաքիդ յայդմիկ, 20զոր ոչ ա՛ռ Նաբուքոդոնոսոր արքայ Բաբելացւոց ի գերելն իւրում զՅեքոնիա որդի Յովակիմայ արքայի Յուդայ յԵրուսաղեմէ ի Բաբելոն, եւ զամենայն ազատսն Յուդայ եւ զԵրուսաղեմի, 21այսպէս ասէ Տէր զօրութեանց Աստուած Իսրայելի վասն սպասուցն մնացելոց ի տան Տեառն, եւ ի տան թագաւորին Յուդայ եւ յԵրուսաղէմ. 22Ի Բաբելոն երթիցեն, եւ անդ եղիցին մինչեւ յօրն յորում այց արարից նոցա, այսպէս ասէ Տէր. Հանից զնոսա եւ դարձուցից ի տեղիդ յայդ։