1Բանն որ եղեւ առ Երեմիա վասն ժողովրդեանն Յուդայ, յամին չորրորդի Յովակիմայ որդւոյ Յովսեայ արքայի Յուդայ, այն ամ առաջին էր Նաբուքոդոնոսորայ արքային Բաբելացւոց, 2զբանն զոր խօսեցաւ Երեմիա մարգարէ առ ամենայն ժողովուրդն Յուդայ, եւ առ բնակիչս Երուսաղեմի, եւ ասէ. 3Յերեքտասաներորդէ ամէ Յովսեայ որդւոյ Ամովնայ արքայի Յուդայ մինչեւ ցայսօր՝ այս քսան եւ երեք ամք, զի եղեւ բան Տեառն առ իս, եւ խօսեցայ ընդ ձեզ կանխեալ ընդ առաւօտս եւ ասէի, եւ ոչ լուարուք։ 4Եւ առաքեցի առ ձեզ զծառայս իմ զմարգարէս ընդ առաւօտս արձակեալ, եւ ոչ լուարուք, եւ ոչ անսացէք ականջօք ձերովք լսել։ 5Ասէի. Դարձարուք իւրաքանչիւր ի ճանապարհէ իւրմէ չարէ, եւ ի գնացից ձերոց չարաց. եւ բնակեսջիք յերկրիդ զոր ետու ձեզ եւ հարց ձերոց յաւիտենից մինչեւ ցյաւիտեանս. 6եւ մի՛ երթայք զհետ աստուածոց օտարաց՝ ծառայել նոցա եւ երկիր պագանել, եւ մի՛ բարկացուցանէք զիս գործովք ձեռաց ձերոց չարչարել զձեզ։ 7Եւ ոչ լուարուք ինձ, ասէ Տէր, զի բարկացուցանիցէք զիս գործովք ձեռաց ձերոց չարչարել զձեզ։

8Վասն այդորիկ այսպէս ասէ Տէր զօրութեանց. Զի ոչ հաւատացէք բանից իմոց, 9ահաւասիկ ես առաքեմ, եւ առից զամենայն ազգս հիւսիսոյ, ասէ Տէր, եւ զՆաբուքոդոնոսոր արքայ Բաբելացւոց զծառայ իմ, եւ ածից զնոսա ի վերայ երկրիդ այդորիկ եւ ի վերայ բնակչաց դորա, եւ ի վերայ ամենայն ազգաց որ շուրջ զդովաւ. եւ աւերեցից զդոսա, եւ տաց զդոսա յապականութիւն եւ ի շչիւն եւ ի նախատինս՝՝ յաւիտենից։ 10Եւ կորուսից ի դոցանէ զձայն ուրախութեան եւ զձայն ցնծութեան, եւ զձայն փեսայի եւ զձայն հարսին, զձայն երկանի եւ զլոյս ճրագի։ 11Եւ եղիցի ամենայն երկիրդ այդ յաւերակ եւ յապականութիւն, եւ ծառայեսցեն ազգացն այնոցիկ եւ՝՝ արքային Բաբելացւոց զեւթանասուն ամ։

12Եւ ի կատարել ամացն եւթանասնից՝ խնդրեցից զվրէժս ի թագաւորէն Բաբելացւոց եւ յազգէն յայնմանէ, ասէ Տէր, ըստ անօրէնութեանց նոցա, եւ յերկրէն Քաղդէացւոց. եւ եդից զնոսա յապականութիւն յաւիտենական։ 13Եւ ածից ի վերայ ամենայն երկրին այնորիկ զամենայն բանս իմ զոր խօսեցայ վասն նորա՝ ըստ ամենայն գրելոցս ի գիրս յայսմիկ, զոր մարգարէացաւ Երեմիա ի վերայ ամենայն ազգաց. 14զի ծառայեցին ի մէջ նոցա. քանզի եւ նոքա՝՝ ազգք բազումք եւ թագաւորութիւնք մեծամեծք են, եւ հատուցից նոցա ըստ անօրէնութեանն նոցա, եւ ըստ գործոց ձեռաց նոցա։

15Զի այսպէս ասէ ցիս Տէր Աստուած Իսրայելի. Առ զբաժակ գինւոյս անապակիս այսորիկ ի ձեռաց իմոց, եւ արբուսցես զդա ամենայն ազգաց առ որս առաքեմ զքեզ. 16արբցեն, եւ քամեսցեն, եւ մոլեսցին յերեսաց սրոյն, զոր ես առաքեցից ի մէջ դոցա։ 17Եւ առի զբաժակն ի ձեռանէ Տեառն, եւ արբուցի ամենայն ազգաց առ որս առաքեաց զիս Տէր. 18Երուսաղեմի եւ քաղաքացն Յուդայ, եւ թագաւորաց նորա եւ իշխանաց նորա, դնել զնոսա յաւերակ եւ յանապատ եւ ի շչիւն եւ յանէծս ըստ աւուրս ըստ այսմիկ. 19եւ փարաւոնի արքայի Եգիպտացւոց, եւ ծառայից նորա եւ մեծամեծաց նորա, եւ ամենայն ազգի նորա, 20եւ ամենայն խառնիճաղանճ զօրաց նորա. եւ ամենայն թագաւորաց կղզւոյն, եւ ամենայն թագաւորաց երկրին այլազգեաց՝ Ասկաղոնի եւ Գազայ եւ Ակկարովնի, եւ մնացորդացն Ազովտայ, 21եւ Եդովմայ եւ Մովաբացւոցն եւ որդւոցն Ամոնայ, 22եւ ամենայն թագաւորացն Տիւրոսի, եւ ամենայն թագաւորացն Սիդովնացւոց, եւ թագաւորաց կղզւոյն որ յայն կոյս ծովուն. 23եւ Դեդանայ, եւ Թեմանայ, եւ Բովկայ, եւ ամենայն յապաւելոցն զերեսօք. 24եւ ամենայն թագաւորացն Արաբացւոց, եւ ամենայն թագաւորաց խառնաղանճից՝ օթագայելոցն յանապատին. 25եւ ամենայն թագաւորացն Զամբրեայ, եւ ամենայն թագաւորացն Եղամայ, եւ ամենայն թագաւորացն Պարսից. 26եւ ամենայն թագաւորացն հիւսիսոյ արեւելից, մերձաւորաց եւ հեռաւորաց իւրաքանչիւր առ եղբօր իւրում, եւ ամենայն թագաւորաց երկրի, որ ի վերայ երեսաց երկրի. եւ թագաւորն Սիսակ արբցէ յետ ամենեցուն։ 27Եւ ասասցես ցնոսա. Այսպէս ասէ Տէր ամենակալ Աստուած Իսրայելի. Արբէք եւ արբեցարուք, յիմարեցարուք, եւ կործանեցարուք եւ մի՛ կանգնեսջիք յերեսաց սրոյն զոր եսն առաքեցից ի մէջ ձեր։ 28Եւ եղիցի յորժամ ոչ կամիցին ընդունել զբաժակն ի ձեռանէ քումմէ ըմպել, ասասցես ցնոսա. Այսպէս ասէ Տէր զօրութեանց. Ըմպելով արբջիք. 29զի ահա ի քաղաքէն՝ յորում կոչեցեալ է անուն իմ ի նմա, արարից սկիզբն չարչարելոյ, եւ դուք սրբելով սրբիցի՞ք. ոչ սրբեսջիք. զի սուր կոչեցից ես ի վերայ ամենեցուն որ բնակեալ են յերկրի, ասէ Տէր զօրութեանց։ 30Եւ դու մարգարէասցիս ի վերայ նոցա զամենայն զպատգամս զայսոսիկ, եւ ասասցես ցնոսա. Տէր ի բարձանց ի սրբութենէ իւրմէ տացէ հրաման, տացէ զձայն իւր, զբան հրամանի ի տեղւոջէ իւրմէ. եւ նոքա իբրեւ կթօղք տացեն պատասխանի ի վերայ ամենայն բնակչաց երկրին, թէ եկն սատակումն ի կողմանէ երկրին. 31զի դատաստան Տեառն է ի մէջ ազգաց, եւ դատեսցի ինքն զամենայն մարմին. եւ ամպարիշտք տուան՝՝ ի սուր, ասէ Տէր։

32Այսպէս ասէ Տէր զօրութեանց. Ահաւադիկ չարիք գան յազգէ ի վերայ ազգի, եւ մրրիկ մեծ ելցէ ի ծագաց երկրէ։ 33Եւ եղիցին վիրաւորք ի Տեառնէ յաւուր Տեառն՝ ի կողմանէ մինչեւ ցկողմն երկրին. մի՛ կոծեսցին եւ մի՛ ժողովեսցին, ընդ երեսս դաշտին իբրեւ զաղբ ընկեսցին։

34Գուժեցէք, հովիւք, եւ աղաղակեցէք, եւ կոծեցարուք, խոյք մաքեաց՝՝. զի կատարեցան աւուրք ձեր ի սպանումն եւ ի ցրումն ձեր. կործանեսջիք իբրեւ խոյք ընտիրք։ 35Եւ կորիցէ փախուստ ի հովուաց, եւ փրկութիւն ի խոյոցն մաքեաց՝՝։ 36Ձայն գուժի հովուաց, եւ աղաղակ խոյոցն մաքեաց՝՝. զի սպառեաց Տէր զարօտս նոցա։ 37Եւ դադարեսցէ գեղեցկութիւն՝՝ խաղաղութեանն յերեսաց բարկութեան սրտմտութեան Տեառն։ 38Թողին իբրեւ առեւծ զմորի իւր, եւ եղեւ երկիր նոցա յանապատ՝ յերեսաց բարկութեան սրտմտութեան սրոյն մեծի, եւ յերեսաց բարկութեան սրտմտութեան նորա։