1Յաւուրսն յայնոսիկ ոչ գոյր թագաւոր Իսրայելի. եւ յաւուրսն յայնոսիկ ցեղն Դանայ խնդրէր իւր ժառանգութիւն բնակելոյ. զի ոչ եհաս նմա ցաւուրսն ցայնոսիկ ի մէջ ցեղիցն Իսրայելի ժառանգութիւն։ 2Եւ առաքեցին որդիքն Դանայ ի տոհմից իւրեանց արս հինգ, այր ըստ ցեղի՝՝ իւրեանց, որդիս զօրութեան ի Սարաայ եւ յԵսթաւուղայ, լրտեսել զերկիրն եւ հետազօտել զնա. եւ ասեն ցնոսա. Երթայք որոնեցէք զերկիրն։ Եւ չոգան ի լեառնն Եփրեմայ մինչեւ ցտունն Միքայ, եւ հանգեան անդ։ 3Եւ մինչդեռ էին նոքա ի տան Միքայ, ծանեան զձայն պատանեկին Ղեւտացւոյ, եւ խոտորեցան անդ եւ ասեն ցնա. Ո՞ ած զքեզ այսր, եւ զի՞նչ գործես դու աստ, եւ կամ զի՞նչ կայ քո աստ։ 4Եւ ասէ ցնոսա. Այսպէս եւ այսպէս արար ինձ Միքա, եւ կալաւ զիս ի վարձու, եւ եղէ նմա ի քահանայ։ 5Եւ ասեն ցնա. Աղէ հարց զԱստուած, եւ գիտասցուք եթէ յաջողեսցի՞ մեզ ճանապարհս մեր յոր երթամք։ 6Եւ ասէ ցնոսա քահանայն. Երթայք ի խաղաղութիւն. առաջի Տեառն է ճանապարհ ձեր զոր երթայք։

7Եւ գնացին հնգեքին արքն, եւ չոգան ի Լայիսա. եւ տեսին զժողովուրդն, որ ի նմա, որ բնակեալ նստէր յուսով՝ ըստ նմանութեան Սիդոնացւոցն հանդարտելոցն յուսով. եւ ոչ բաւական լինելոյ խօսել ումեք բան մի յերկրի գանձուցն ժառանգաւորի. եւ՝՝ հեռի էին ի Սիդոնէ, եւ բանք ինչ ոչ գոյին նոցա ընդ Ասորիս։ 8Եւ եկին հնգեքին արքն՝՝ առ եղբարս իւրեանց ի Սարաա եւ յԵսթաւուղ. եւ ասեն ցնոսա եղբարք իւրեանց. Զի՞ նստիք դուք՝՝։ 9Եւ ասեն. Արիք ելցուք ի վերայ նոցա, զի մտաք եւ շրջեցաք ընդ երկիրն մինչեւ ցԼայիսա, եւ տեսաք ժողովուրդ բնակեալ ի նմա յուսով հանգոյն Սիդոնացւոց, եւ հեռի են ի Սիդոնէ, եւ բանք ինչ ոչ գոյ նոցա ընդ Ասորիս. արիք՝՝ եւ ելցուք ի վերայ նոցա. զի ահա տեսաք զերկիրն, եւ բարի է յոյժ, եւ դուք դադարեա՞լ կայք. եւ արդ է՞ր վատանայք երթալ մտանել ժառանգել զերկիրն։ 10Եւ եղիցի յորժամ երթայք, ունիք զազգն յուլացեալ եւ զերկիրն ընդարձակ. զի մատնեաց զնա Աստուած ի ձեռս մեր. տեղի յորում ոչ գոյ պակասութիւն ամենայն բանի որ ինչ իցէ յերկրի։

11Եւ խաղացին անտի յազգականութենէ տոհմիցն Դանայ, ի Սարաայ եւ յԵսթաւուղայ, արք վեց հարեւրք վառեալք զինու պատերազմի։ 12Եւ ելին բանակեցան ի Կարիաթարիմ Յուդայ. վասն այնորիկ կոչեցաւ տեղին այն բանակետղ Դանայ մինչեւ ցայսօր. որ է ի թիկանց Կարիաթարիմայ։ 13Եւ անցին անտի եւ եկին մինչեւ ցլեառնն Եփրեմայ, եւ հասին մինչեւ ի տունն Միքայի։ 14Պատասխանի ետուն արքն հնգեքին որ երթեալ էին լրտեսել զերկիրն Լայիսա, եւ ասեն ցեղբարս իւրեանց. Եթէ գիտիցէ՞ք զի ի տունս յայսոսիկ եփուդ եւ թերափ եւ դրօշեալ եւ ձուլածոյ. արդ գիտասջիք զինչ առնիցէք։ 15Եւ խոտորեցան անդ, եւ մտին ի տուն պատանեկին Ղեւտացւոյ, որ էր ի տան Միքայ, եւ հարցին զողջունէ նորա։ 16Եւ վեց հարեւր արքն վառեալք պատերազմական զինու իւրեանց արձանացեալք կային առ մուտս դրանն որ էին յորդւոցն Դանայ։ 17Եւ ելին հնգեքին արքն որ երթեալ էին լրտեսել զերկիրն, յարձակեցան եւ առին զդրօշեալն եւ զեփուդ եւ զթերափ եւ զձուլածոյ. եւ քահանայն արձանացեալ կայր ի մուտս դրանն. եւ վեց հարեւր արքն վառեալք պատերազմական զինու։ 18Եւ նոքա մտին ի տունն Միքայ, եւ առին զդրօշեալն եւ զեփուդ եւ զթերափ եւ զձուլածոյ. եւ ասէ ցնոսա քահանայն. Զի՞նչ գործէք դուք։ 19Եւ ասեն ցնա. Կարկեաց, ափիբերան լեր, եկ ընդ մեզ եւ լեր մեզ ի հայր եւ ի քահանայ. միթէ լա՞ւ իցէ լինել քեզ քահանայ տան միոյ առն, քան լինել քահանայ ցեղի միոյ եւ ազգի Իսրայելի։ 20Եւ զուարթացաւ սիրտ քահանային, եւ առ զեփուդն եւ զթերափ եւ զդրօշեալ եւ զձուլածոյ՝՝, եւ եմուտ ի մէջ զօրուն։ 21Եւ դարձան գնացին, եւ հարին համօրէն զտունն, եւ զստացուածն վայելչութեան նորա առաջի նոցա՝՝։ 22Եւ ի հեռանալ նոցա ի տանէ Միքայ, եւ ահա Միքա եւ արքն որ ի տունս նորա էին ընդ Միքայ, բողոք բարձին եւ հասին որդւոցն Դանայ։ 23Եւ դարձուցին՝՝ զերեսս իւրեանց որդիքն Դանայ, եւ ասեն ցՄիքա. Զի՞ է քեզ, զի՞ աղաղակես՝՝։ 24Եւ ասէ Միքա. Զի զաստուածսն իմ զոր արարի ինձ առէք, եւ զքահանայն, եւ գնացէք. եւ զի՞նչ կայ այսուհետեւ ինձ. եւ զի՞նչ է այդ զոր ասէք ցիս թէ՝ Զի՞ աղաղակես։ 25Եւ ասեն ցնա որդիքն Դանայ. Մի՛ լուիցի ձայն քո զկնի մեր, գուցէ պատահիցեն քեզ արք դառնացեալք ոգւով, եւ դնիցեն զանձն քո եւ զանձն տան քո։ 26Եւ գնացին որդիքն Դանայ զճանապարհս իւրեանց. եւ իբրեւ ետես Միքա եթէ բռնագոյն քան զնա են, դարձաւ ի տուն իւր։

27Եւ նոքա առին զոր ինչ արարն Միքա եւ զքահանայն նորա, եւ չոգան ի Լայիսա՝ ի ժողովուրդն հանդարտացեալ եւ վստահացեալ յուսով. եւ հարին զնոսա սրով սուսերի, եւ զքաղաքն այրեցին։ 28Եւ ոչ ոք էր որ փրկէր. զի հեռի էին ի Սիդոնացւոց, եւ բանք ինչ ոչ էին նոցա ընդ ումեք ի մարդկանէ. եւ նա կայ ի հովտի տանն Ռովբայ. եւ շինեցին զքաղաքն եւ բնակեցան ի նմա։ 29Եւ կոչեցին զանուն նորա Դան՝ ըստ անուան հօրն իւրեանց որ եղեւ Իսրայելի. եւ էր անուն քաղաքին յառաջագոյն Լայիսա։ 30Եւ կանգնեցին իւրեանց որդիքն Դանայ զդրօշեալն Միքայ. եւ Յովնաթան որդի Գերսոնի որդւոյ Մանասէի, ինքն եւ որդիք իւր, էին քուրմք ցեղին Դանայ, մինչեւ ցօր գերութեան երկրին։ 31Եւ կարգեցին իւրեանց զդրօշեալն զոր արար Միքա, զամենայն աւուրս զորս էր տունն Աստուծոյ ի Սելով։