1Այսպէս ասէ Տէր. Վա՜յ ձեզ, որդիք ապստամբք, զի խորհեցարուք խորհուրդ եւ ոչ ինեւ, եւ դաշինս կռեցէք՝ եւ ոչ իմով Հոգւով, յաւելուլ մեղս ի վերայ մեղաց. 2որ գնայիք իջանել յերկիրն Եգիպտացւոց, եւ զիս ոչ հարցանէիք. գտանել օգնականութիւն ի փարաւոնէ, եւ թիկունս առնել զԵգիպտացիսն։ 3Եւ եղիցին ձեզ թիկունք փարաւոն յամօթ, եւ յուսացելոց յԵգիպտացիսն նախատինք։ 4Զի են յերկրին Տայանու իշխանք հրեշտակք չարք. 5զուր ջանան առ ժողովուրդն՝՝ որ ոչ լինիցի դոցա շահ յօգնականութիւն. ոչ յօգուտ, այլ յամօթ եւ ի նախատինս։

6Տեսիլ չորքոտանեաց յանապատի, ի նեղութեան եւ յանձկութեան՝՝. առեւծ եւ կորիւն առիւծու, եւ ի նոցանէն իժք եւ կորիւնք իժից թռչունք, որ բարձեալ բերեն իշոց զգանձս իւրեանց, եւ լցեալ ուղտուց զմեծութիւն իւրեանց. առ ազգ մի՝ որ ոչինչ օգուտ լինիցի նոցա յօգնականութիւն, այլ յամօթ եւ ի նախատինս։՝՝ 7Եգիպտացիքն որ զուր եւ տարապարտ օգնիցեն ձեզ, պատմեա նոցա եթէ ի զուր է այդ մխիթարութիւն ձեր։ 8Արդ նիստ եւ գրեա ի տախտակի եւ ի գիրս, զի եղիցի այդ յաւուր իւրում եւ ի ժամանակս յաւիտենից, 9թէ՝՝ ժողովուրդ անհաւան է, եւ որդիք սուտք. եւ ոչ կամեցան լսել զօրէնս Աստուծոյ։ 10Որք ասէին ցմարգարէսն, թէ՝ Մի՛ պատմէք մեզ. այլ խօսեցարուք ընդ մեզ եւ պատմեցէք մեզ այլ մոլորութիւն. 11եւ դարձուցէք զմեզ ի ճանապարհէդ յայդմանէ, եւ ի բաց արարէք ի մէնջ զշաւիղդ զայդ. եւ հանէք ի մէնջ զօրէնս Աստուծոյ Իսրայելի։՝՝ 12Վասն այսորիկ այսպէս ասէ Տէր՝ Սուրբն Իսրայելի. Փոխանակ զի անարգեցէք դուք զբանսդ զայդոսիկ, եւ յուսացարուք ի ստութիւն սնոտի, եւ զի տրտնջեցէք՝ եւ յուսացարուք ի բանդ յայդ՝՝։ 13Վասն այնորիկ եղիցին ձեզ մեղքդ այդոքիկ իբրեւ զպարիսպ կործանեալ առժամայն ամուր քաղաքի առելոյ՝՝, որում յանկարծակի հասանիցէ կործանումն։ 14Եւ կործանումն նորա եղիցի իբրեւ զբեկումն խեցեղէն անօթոյ բրտի՝ մանր խորտակելոյ, զի մի՛ ոք գտանիցէ ի նմանէ որով հուր բառնայցէ՝ կամ որով մարթիցէ առնուլ սակաւ մի ջուր։ 15Զի այսպէս ասէ Տէր Տէր՝ Սուրբն Իսրայելի. Յորժամ դարձցիս եւ յոգւոց հանիցես, յայնժամ կեցցես, եւ գիտասցես թէ ուր իցես. զի յուսացեալ էիր դու ի սնոտիսն, սնոտի եղեւ եւ՝՝ զօրութիւն ձեր. եւ ոչ կամէիք լսել. 16այլ ասէիք. Երիվարօք մերովք՝՝ փախիցուք. վասն այսորիկ փախստականք լինիցիք. եւ ասիցէք. Երագ երիվարօք մերովք փախիցուք. վասն այսորիկ երագագոյնք քան զձեզ՝՝ եղիցին որ հալածենն զձեզ։ 17Զի ի միոջէ բարբառոյ հազարք փախիցեն, եւ ի բարբառոյ հնգից բազումք փախիցեն. մինչեւ մնասջիք իբրեւ զձող ցցեալ ի վերայ լերին, եւ իբրեւ զկոթող կանգնեալ ի վերայ բլրոյ։ 18Եւ դարձեալ կանխեսցէ Աստուած գթալ ի ձեզ, եւ վասն այսորիկ բարձրասցի ողորմել ձեզ. զի դատաւոր Տէր Աստուած մեր է՝՝, երանի ամենեցուն ոյք սպասեն նմա։

19Զի ժողովուրդ սուրբ ի Սիոն, բնակեսցէ եւ Երուսաղէմ լալով ելաց, եթէ՝ Ողորմեաց ինձ.՝՝ ողորմեսցի քեզ՝ ձայնի աղաղակի քում, իբրեւ ետես՝ եւ լուաւ քեզ՝՝։ 20Եւ տացէ քեզ Տէր հաց նեղութեան եւ ջուր կարօտանաց, եւ ոչ եւս մերձեսցին ի քեզ որ մոլորեցուցանէին զքեզ, զի աչք քո տեսցեն ի մոլորեցուցիչսն՝՝ քո. 21եւ ականջք քո լուիցեն բանս զհետ մոլորեցուցչացն քոց. որք ասէին եթէ՝ Այս է ճանապարհ, եւ գնասցուք ընդ սա, կամ թէ յաջ կամ թէ յահեակ։ 22Եւ գարշեցուսցես զկուռսն զարծաթապատս եւ զոսկիապատս, մանրեսցես զնոսա եւ հոսեսցես իբրեւ զջուր դաշտանաց, եւ իբրեւ զաղբ մերժեսցես զնոսա։՝՝ 23Յայնժամ եղիցի անձրեւ սերմանեաց երկրին քում, եւ հաց արդեանց երկրի քո եղիցի յագուրդ եւ ի պարար. եւ ճարակեսցին խաշինք քո յաւուր յայնմիկ ի տեղւոջ պարարտութեան եւ յանդորրու. 24զուարակք ձեր եւ եզինք՝՝ որ գործեն զերկիր՝ կերիցեն յարդ խառնեալ ընդ գարի, հոսեալ ի կալոյ՝՝։ 25Եւ եղիցին ի վերայ ամենայն լերանց բարձանց եւ ի վերայ ամենայն բլրոց բարձուանդակաց՝ ջուր բղխեալ՝՝, յաւուր յայնմիկ յորժամ կորիցեն բազումք եւ կործանեսցին աշտարակք։ 26Եւ եղիցի լոյսն լուսնի իբրեւ զլոյս արեգական, եւ լոյսն արեգական եւթնպատիկ եղիցի՝ իբրեւ զլոյս աւուրցն եւթանց, յաւուր յորում բժշկեսցէ Տէր զբեկումն ժողովրդեան իւրոյ, եւ զցաւս վիրաց քոց բժշկեսցէ։

27Ահաւասիկ անուն Տեառն գայ յամայր ամս՝ յետ բազում ժամանակաց՝՝, վառեալ բարկութեամբ եւ լի փառօք. բանք շրթանց նորա եւ բանք բերանոյ նորա լի բարկութեամբ. եւ բարկութիւն սրտմտութեան՝՝ նորա իբրեւ զհուր կերիցէ. 28եւ հոգի նորա իբրեւ զջուր ձորալիր պարանոցաթաղ յորդեսցէ. եւ բաժանեսցի խռովեցուցանել զազգս վասն սնոտի մոլորութեանն. եւ հալածեսցէ զնոսա մոլորութիւնն, եւ հասցէ նոցա յանդիման նոցին։ 29Միթէ հանապա՞զ պարտ իցէ ձեզ ուրախութեամբ մտանել ի սրբութիւնս իմ, յամենայն ժամ տօնիւք եւ ուրախութեամբ եւ փողո՞վք մտանել ի լեառն Տեառն՝ առ Աստուած Սուրբն Իսրայելի։ 30Եւ լսելի արասցէ՝՝ զփառս բարբառոյ իւրոյ, եւ զսրտմտութիւն բազկի իւրոյ ցուցցէ բարկութեամբ՝ եւ սրտմտութեամբ եւ բոցով որ ուտիցէ. եւ սաստիկ բարկութեամբ հրացանից, եւ ջրով եւ կարկտիւ միանգամայն հոսելով բռնութեամբ՝՝։ 31Զի ի բարբառոյ Տեառն ընկճեսցին Ասորեստանեայք. հարուածովքն զոր հարկանիցէ զնոսա։ 32Եւ եկեսցէ նմա շուրջ յօգնականաց իւրոց՝ յոր կողմ եւ յուսացեալ իցէ. զի նոքա փողովք եւ թմբկաւ եւ պէսպէս պատերազմաւ փոխփոխ մարտիցեն ընդ նմա, եւ դու ոչ յառաջագոյն քան զաւուրսն պահանջեսցիս։ 33Իսկ արդ եւ քե՞զ պատրաստեալ իցէ թագաւորել, ի վերայ ձորոյն խորոյ փայտ դիզեալ, հուր եւ փայտակոյտ բազում վառեալ. սրտմտութիւն Տեառն իբրեւ զձոր լի ծծմբով բորբոքեալ։՝՝