1Եւ լուան որք նեղէին զՅուդա եւ զԲենիամին, եթէ որդիքն Իսրայելի ելեալքն ի գերութենէն շինեն զտունն Տեառն Աստուծոյ Իսրայելի, 2եւ մերձեցան առ Զորաբաբէլ եւ առ իշխանս հայրապետացն, եւ ասեն ցնոսա. Շինեսցուք եւ մեք ընդ ձեզ, եւ որպէս եւ դուք խնդրեսցուք ի Տեառնէ Աստուծոյ ձերմէ. քանզի՝՝ եւ մեք նոյնպէս զոհեմք զոհս, յօրէ յորմէ Ասորդան թագաւոր Ասորւոց ած զմեզ այսր։ 3Եւ ասեն ցնոսա Զորաբաբէլ եւ Յեսու Յովսեդեկեանց եւ մնացորդք իշխանաց հայրապետացն Իսրայելի. Ոչ է արժան մեզ եւ ձեզ հասարակ շինել զտուն Տեառն Աստուծոյ մերոյ. մեք մեզէն իսկ շինեսցուք զտուն Տեառն Աստուծոյ Իսրայելի, որպէս հրամայեաց մեզ Կիւրոս թագաւոր Պարսից։ 4Եւ ժողովուրդք երկրին այնորիկ լքուցանէին զձեռս ժողովրդեանն Հրէաստանի, եւ խափանէին զնոսա ի շինելոյ։ 5Եւ կալեալ վարձաւորս՝ խորհէին զնոսա խափանել զամենայն աւուրս Կիւրոսի թագաւորութեանն Պարսից մինչեւ յաւուրս Դարեհի Պարսից արքայի։ 6Ի թագաւորութեանն Ասարսոյերու Պարսից՝՝, ի սկզբան թագաւորութեան նորա՝ գրեցին թուղթ որք բնակեալ էին ի Հրէաստանի եւ յԵրուսաղէմ։

7Եւ գրեցին յաւուրս Արսասէսի Միթրիդատէս Տաբեէլ՝ հանդերձ եւ այլ ծառայիւք նորա հարկահանօքն. եւ գրեցին գիր Ասորերէն, եւ էր զնա թարգմանեալ Հռէում Բաաղտեմ։ 8Եւ այս են բանք թղթոյն զոր առաքեցին նոքա առ Արսասաս թագաւոր. Ծառայք քո՝ որ եմք բնակեալ յայս կողմն Գետոյն, 9Հռէում Բաաղտեմ եւ Սամսայի գրիչ, եւ այլ եւս ծառայակիցք մեր, Դեենէս, Սփարսաթաքայիէ, Տարփաղէէ, Ափերսէէ, Ոքուէէ, Բաբելոնէէ, Սուսանա, Քեէդաւեէ, 10եւ այլ մնացեալ ազգք, զորս բնակեցոյց Ասենափար մեծ եւ պատուական ի քաղաքս Սոմարոմ, այսինքն Սամարիա յայս կողմն Գետոյն, առ Արսասաս թագաւոր խաղաղութիւն։ 13Այժմ գիտութիւն լիցի քեզ, թագաւոր, որ եթէ քաղաքն այն շինեսցի եւ պարիսպք նորա կանգնեսցին, հարկս քեզ ոչ ոք տայ. 14այլ եւ ընդդիմադարձ եւս լիցին թագաւորաց. եւ զայնպիսի յանդգնութիւն մեք ընդդէմ թագաւորաց՝ ոչ կամիմք տեսանել. եւ վասն այսր ամենայնի գրեցաք առ ձեզ, թագաւոր, 15զի տեսցես եւ արասցես եւ գտցես ի գիրս յիշատակարանաց հարցն քոց. եւ գիտացեալ եթէ քաղաքս այս ապստամբողաց է, եւ յամենայն ժամ ընդդէմ կացին թագաւորաց, եւ ապաստան են ամենայն փախստէից յամենայն ժամանակս յաւիտենից, եւ վասն այսորիկ քաղաքս այս իսկ աւերեցաւ։ 16Արդ տուաք մեք քեզ գիտել, թագաւոր, եթէ քաղաքս այս շինեսցի եւ պարիսպք սորա կանգնեսցին՝ չէ քեզ խաղաղութիւն։ 17Եւ առաքեաց թագաւորն առ Հռէում Բաաղտեմա եւ Սամսայի գրչի. եւ այլ ծառայակցաց նոցա որք բնակեալ էին ի Սամարիա, եւ մնացորդացն յայն կողմն Գետոյն, եւ ասէ. 18Խաղաղութիւն ընդ ձեզ. զհարկահանս զորս առաքեցէք առ իս, մտեալ առաջի իմ եւ տեղեկացուցեալ ինձ զամենայն, 19հասի ի վերայ եւ գտի զի քաղաքդ այդ յաւիտեանս ժամանակաց ապստամբ է, եւ ընդդէմ թագաւորաց լեալ է։ 20Եւ թագաւորք հզօրք եւ բռնաւորք կացեալ են յԵրուսաղէմ, բռնացեալ կալեալ զայն կողմն արեւմտից՝ յայն կողմն Եփրատ գետոյ։ Արդ դիք ի վերայ դոցա հարկս եւ հասս, զի մի՛ եւ այլ կամակարեալ բռնասցին։ 21Արդ այժմ տուեալ ձեզ տեղեկութիւն, երթայք արգելէք եւ խափանեցէք զգործս նոցա, զի մի՛ շինեսցի քաղաքն. 22եւ մի՛ ներէք նոցա եւ թողացուցանէք, այլ փոյթ յանձին կալեալ պահանջել զամենայն հարկս եւ զհասս. զի մի՛ երբեք բազմասցին եւ զօրասցին, եւ լիցին ընդդէմ թագաւորաց։ 23Յայնժամ հարկահանն Արսասաս թագաւորի՝ այսինքն է Արտաշէսի՝ բերեալ կարդաց զգիրն առաջի Հռեսիմայ եւ Սամսայի գրչի, եւ ծառայակցաց նորա. եւ ելեալ փութապէս յԵրուսաղէմ եւ ի Հրէաստան մեծաւ զօրութեամբ եւ այրուձիով՝ արգելին եւ խափանեցին զՀրեայսն ի շինելոյ։՝՝ 24Յայնժամ խափանեալ դատարկացաւ գործ տաճարին Տեառն Աստուծոյ յԵրուսաղէմ, եւ էր դատարկացեալ մինչեւ յերկրորդ ամն Դարեհի արքայի Պարսից։