1Եւ եղեւ յամին երկոտասաներորդի, յամսեանն երկոտասաներորդի, որ օր մի էր ամսոյն, եղեւ բան Տեառն առ իս եւ ասէ. 2Որդի մարդոյ, ողբս առ ի վերայ փարաւոնի արքային Եգիպտացւոց եւ ասասցես ցնա. Առիւծացար ի մէջ ազգաց, եւ նմանեցար վիշապի՝՝ ի մէջ ծովու, եւ ոգորէիր ընդ գետս քո, եւ առ սմբակ պղտորէիր զջուրսն, եւ առաթուր կոխան առնէիր զգետս քո։ 3Այսպէս ասէ Տէր Տէր. Պատեցից զքեզ թակարդօք իմովք ժողովովք զօրաց բազմաց, եւ հանից զքեզ կարթիւ իմով։ 4Տախտապարեցից զքեզ ի վերայ երկրի, եւ լցցին քեւ դաշտք՝՝. եւ իջուցից ի վերայ քո զամենայն թռչունս երկնից, եւ յագեցուցից ի քէն զամենայն գազանս երկրի։ 5Եւ տաց զմարմինս քո ի վերայ լերանց, եւ լցուցից զձորս յարենէ քումմէ. 6եւ արբեսցի երկիր յապաւառէ քումմէ՝ ի բազմութեան քո ի վերայ լերանց, զձորս լցից՝՝ ի քէն։ 7Եւ պատրուակեցից զերկինս ի շիջանել քում, եւ խաւարեցուցից զաստեղս նորա. զարեգակն ամպով ծածկեցից, եւ լուսին մի՛ տացէ զլոյս իւր։ 8Եւ զամենայն լուսաւորս խաւարեցուցից ի վերայ քո, եւ տաց խաւար ի վերայ քո, ասէ Տէր Տէր։ 9Եւ զայրացուցից զսիրտս ազգաց բազմաց, ի ժամանակի իբրեւ հանից զգերութիւն քո ընդ ազգս յերկիր զոր ոչ գիտիցես։ 10Եւ տրտմեսցին ի վերայ քո ազգք բազումք՝՝, եւ թագաւորք նոցա զարհուրելով զարհուրեսցին, ի թռչել սրոյ իմոյ առաջի երեսաց նոցա ակն ունել կործանման իւրեանց յօրէ՝՝ կործանման քո։

11Զի այսպէս ասէ Տէր Տէր. Սուր արքային Բաբելացւոց եկեսցէ ի վերայ քո 12հանդերձ սրով սկայից, եւ կործանեցից զզօրութիւն քո. եկեսցեն ամենայն՝՝ ժանտագործք ազգաց, եւ կորուսցեն զհպարտութիւն Եգիպտացւոց, եւ խորտակեսցի ամենայն զօրութիւն նորա։ 13Եւ կորուսից զամենայն անասունս նորա ի ջուրց բազմաց, եւ մի՛ պղտորեսցէ զնա՝՝ ոտն մարդոյ, եւ կճղակ անասնոյ մի՛ կոխեսցէ զնա։ 14Եւ ապա դադարեսցեն ջուրք նոցա, եւ գետք նոցա նման իւղոյ գնասցեն՝՝, ասէ Ադոնայի Տէր։ 15Յորժամ տաց զԵգիպտոս ի կորուստ, եւ աւերեսցի երկիրն լրիւ իւրով, յորժամ ցրուեցից զամենայն բնակիչսն ի նմանէ՝՝, եւ ծանիցեն թէ ես եմ Տէր։

16Ողբք են, եւ ողբասցեն զնա, եւ դստերք ազգաց ողբասցեն զնա. ի վերայ Եգիպտոսի եւ ի վերայ ամենայն զօրութեան նորա ողբասցեն զնա, ասէ Տէր Տէր։

17Եւ եղեւ յամին երկոտասաներորդի, յամսեանն առաջնում՝՝, որ օր հնգետասան էր ամսոյն, եղեւ բան Տեառն առ իս եւ ասէ.

18Որդի մարդոյ, ողբս առ ի վերայ զօրութեանն Եգիպտոսի, եւ իջուսցեն զդստերս նորա ազգքն՝ զմեռեալս ի խորս երկրի։ 19Առ իջեալսն ի խորխորատ՝ ի ջուրց վայելչութեան, էջ ննջեա ընդ անթլփատս ի մէջ վիրաւորաց. 20սրով անկցին ընդ նմա, եւ դադարեսցէ ամենայն զօրութիւն նորա։ 21Եւ ասասցեն ցքեզ սկայքն. Եկ էջ ի խորս խորինս, զի քան զո՞վ լաւ էիր դու. էջ եւ դադարեա ընդ անթլփատս ի մէջ վիրաւորաց՝՝ սրոյ։

22Անդ Ասուր եւ ամենայն ժողովք նորա, ամենեքին վիրաւորք՝՝. 23անդ տուաւ գերեզման նորա ի խորս խորխորատին, եւ եղեն ժողովք նորա շուրջ զշիրմօք նորա. ամենայն վիրաւորք անկան սրով, որ արարին զգերեզմանս իւրեանց յատակս գբոց, եւ եղեն ժողովք շուրջ զգերեզմանօք նորա.՝՝ ամենեքին վիրաւորք անկեալք ի սրոյ, որ ետուն զահ իւրեանց ի վերայ երկրին կենդանութեան։

24Անդ Եղամ, եւ ամենայն զօրութիւն նորա շուրջ զգերեզմանաւ նորա. ամենեքին վիրաւորք անկեալք ի սրոյ՝ իջին անթլփատք ի խորս երկրի, որ ետուն զահ իւրեանց յերկրին կենդանութեան, եւ ընկալան զտանջանս իւրեանց ընդ իջեալսն ի խորխորատ 25ի մէջ վիրաւորաց։ 26Անդ տուան՝՝ Մոսոք եւ Թոբէլ, եւ ամենայն զօրութիւնք նոցա շուրջ զգերեզմանաւ նորա. ամենայն վիրաւորք նորա՝՝ ամենեքեան անթլփատք վիրաւորք անկեալք ի սրոյ, որ ետուն զահ իւրեանց ի վերայ երկրին կենդանութեան։ 27Եւ ոչ ննջեցին ընդ հսկայսն անկեալսն յաւիտենից, որ իջին ի դժոխս պատերազմօղ զինուքն իւրեանց, եւ եդան անօրէնութիւնք նոցա ի վերայ ոսկերաց իւրեանց. զի զարհուրեցուցին զհսկայս ի կենդանութեան իւրեանց։ 28Եւ դու ի մէջ անթլփատիցն խորտակեսցիս, եւ ննջեսցես ի մէջ վիրաւորացն սրոյ։

29Անդ Եդովմ եւ թագաւորք իւր եւ ամենայն իշխանք նորա, որ ետուն զզօրութիւն իւրեանց ի հարուածս սրոյ. եւ նոքա ընդ վիրաւորս ննջեցին՝՝ ընդ իջեալսն ի խորխորատ։

30Անդ ամենայն իշխանք հիւսիսոյ, եւ ամենեքեան նոքա զօրավարք Ասորեստանւոյն՝՝, իջեալք վիրաւորք հանդերձ ահիւն զօրութեամբ իւրեանց. ամօթալից ննջեցին անթլփատք ընդ վիրաւորս սուսերաց, եւ տարան զտանջանս իւրեանց ընդ իջեալսն ի խորխորատ։

31Զնոսա տեսցէ փարաւոն եւ մխիթարեսցի ի վերայ ամենայն զօրութեան նոցա. վիրաւորք փարաւոնի ի սրոյ, եւ ամենայն զօրութիւն նորա՝՝, ասէ Տէր Տէր։ 32Զի ետ զահ իւր՝՝ յերկրին կենդանութեան, եւ ննջեսցէ ի մէջ անթլփատիցն վիրաւորելոց սրով, փարաւոն եւ ամենայն բազմութիւն իւր ընդ նմին՝՝, ասէ Տէր Տէր։