Առ որդիսն Իսրայելի։՝՝

1Եւ եղեւ բան Տեառն առ իս եւ ասէ. 2Եւ դու, որդի մարդոյ, եթէ դատիցես, դատեսջիր՝՝ զքաղաքն արեանց, եւ խայտառակեսցես զամենայն զանօրէնութիւնս նորա, 3եւ ասասցես. Այսպէս ասէ Տէր Տէր Աստուած՝՝. Ո՛ քաղաք, որ հեղու զարիւն ի միջի իւրում, ի հասանել ժամանակի իւրոյ. եւ խորհի խորհուրդ զանձնէ՝ պղծել զանձն իւր յարիւնս նոցա։ 4Զուր հեղեր, թաթաւեցար, եւ ի խորհուրդսն քո զոր խորհեցար՝՝ պղծեցար, եւ մերձեցուցեր զաւուրս քո, եւ ածեր զժամանակ ամաց քոց՝՝. վասն այնորիկ ետու զքեզ ի նախատինս ազգաց, եւ յայպն ամենայն աշխարհաց։ 5Որ մօտ ի քեզ էին եւ հեռի ի քէն՝ այպանեսցեն զքեզ եւ ասասցեն, թէ՝ Անուանիդ ի պղծութիւն մատնեցար. քանզի յաճախեցեր յանօրէնութիւնս՝՝։ 6Ահաւասիկ առաջնորդք տանդ Իսրայելի՝ իւրաքանչիւր ընդ մերձաւորս ազգի իւրեանց խառնակէին ի քեզ, զի հեղցեն արիւն՝՝։ 7Զհայր եւ զմայր անարգէին ի քեզ, եւ ընդ եկին եւ ընդ պանդխտին անիրաւութեամբ գնային ի քեզ, զորբն եւ զայրին բռնադատէին ի քեզ. 8զսրբութիւնս իմ արհամարհէին եւ զշաբաթս իմ պղծէին ի քեզ։ 9Արք աւազակք՝՝ կային ի միջի քում զի հեղուցուն ի քեզ արիւն. եւ ի վերայ լերանց զոհէին ի քեզ, եւ գործս անսուրբս գործէին ի միջի քում։ 10Զամօթ հօր յայտնէին ի քեզ, եւ պղծութեամբ զդաշտանն լլկէին ի քեզ։ 11Եւ իւրաքանչիւր զկին ընկերի իւրոյ պղծէին, եւ իւրաքանչիւր զնու իւր պղծէին ամպարշտութեամբ, եւ իւրաքանչիւր զքոյր իւր, զդուստր հօր իւրոյ լլկէին ի քեզ։ 12Կաշառս առնուին ի միջի քում զի հեղուցուն արիւն, վաշխս եւ տոկոսիս առնուին ի միջի քում. եւ ածից կատարեցից զվախճան չարեաց քոց ըստ բռնութեան քում, քանզի՝՝ մոռացար զիս, ասէ Տէր Տէր։ 13Ահաւասիկ հարից ծափ զծափի ի վերայ գործոցն քոց զոր արարեր, եւ ի վերայ արեանցն գործելոց ի միջի քում։ 14Եւ եթէ ժուժկալեսցի սիրտ քո, եթէ զօրասցին՝՝ ձեռք քո յաւուրսն յորս ես արարից ընդ քեզ. ես Տէր խօսեցայ, եւ արարից։ 15Եւ ցրուեցից զքեզ ընդ ազգս, եւ ցանեցից զքեզ ընդ գաւառս, եւ պակասեսցէ պղծութիւն քո ի քէն։ 16Եւ ժառանգեցից՝՝ ի քեզ յանդիման ազգացն, եւ ծանիջիք թէ ես եմ Տէր։

17Եւ եղեւ բան Տեառն առ իս եւ ասէ. 18Որդի մարդոյ, աւասիկ եղեն ինձ տունդ Իսրայելի խառնակեալ, որպէս խառնակեալ իցէ պղինձ եւ երկաթ եւ անագ եւ կապար եւ արծաթ ի հալոցի։ 19Վասն այնորիկ ասա.՝՝ Այսպէս ասէ Տէր Տէր. Փոխանակ զի եղերուք դուք ամենեքեան ի մի խառնակութիւն, վասն այնորիկ ես ընկալայց՝՝ զձեզ ի մէջ Երուսաղեմի։ 20Որպէս ընդունիցի ոք զարծաթ եւ զպղինձ, զերկաթ եւ զկապար ի մէջ հալոցի՝ փչել ի նա հուր եւ ձուլել, նոյնպէս ընկալայց զձեզ բարկութեամբ իմով եւ հաւաքեցից եւ ձուլեցից զձեզ։ 21Եւ փշրեցից ի ձեզ՝՝ հրով բարկութեամբ իմով. եւ ձուլեսջիք ի մէջ նորա։ 22Զոր օրինակ ձուլեսցի արծաթ ի մէջ բովոյ, այնպէս ձուլեսջիք ի միջի դորա, եւ ծանիջիք թէ ես Տէր հեղի զսրտմտութիւն իմ ի վերայ ձեր։

23Եւ եղեւ բան Տեառն առ իս եւ ասէ. 24Որդի մարդոյ, ասա ցդա. Դու այն երկիր ես որ ոչ թանաս՝՝, եւ ոչ եկն անձրեւ ի վերայ քո յաւուր բարկութեան. 25որոյ իշխանք իւր ի միջի իւրում իբրեւ զառիւծունս գոչէին յափշտակել զյափշտակութիւնս, ուտեն զանձինս տնանկաց բռնութեամբ, եւ առնուն պատիւս անիրաւութեամբ, եւ բազմացան այրիք ի միջի քում։՝՝ 26Եւ քահանայք նորա անարգէին զօրէնս իմ եւ պղծէին զսրբութիւնս իմ. եւ զսուրբն ի պղծոյն ոչ ընտրէին, եւ զարատաւորն յանարատէ անտի ոչ զատուցանէին. եւ ի շաբաթուց իմոց ծածկէին զաչս իւրեանց, եւ զշաբաթս իմ պղծէին՝՝ ի միջի նոցա։ 27Իշխանք նորա ի միջի նորա որպէս գայլք յափշտակողք, յափշտակել յափշտակութիւնս, հեղուլ զարիւն, կորուսանել զանձինս, զի ագահութիւն յոյժ ստասցին։ 28Եւ մարգարէք նորա որ ծեփէին զնոսա անկցին, որք՝՝ տեսանէին սնոտիս, ըղձանային նոցա ստութիւն եւ ասէին. Այսպէս ասէ Ադոնայի Տէր, եւ Տեառն չէր խօսեցեալ. 29զժողովուրդ երկրին տառապեցուցանէին անիրաւութեամբ, եւ յափշտակէին յափշտակութիւնս. զաղքատն եւ զտնանկն բռնադատէին, ընդ պանդխտին իրաւամբք ոչ գնային։ 30Եւ խնդրեցի ի նոցանէ այր մի որ ուղիղ գնայցէ, եւ կայցէ առաջի իմ մտադիւր ի ժամանակի բարկութեան՝՝ զի մի՛ ջնջեցից զնա, եւ ոչ գտի։ 31Եւ հեղի ի վերայ նոցա զսրտմտութիւն իմ. հրով բարկութեան իմոյ կատարել ի նոսա՝՝. ըստ ճանապարհաց նոցա ետու ի գլուխս նոցա, ասէ Տէր Տէր։