1Եւ արասցես սեղան յանփուտ փայտից, ի հինգ կանգնոյ զերկայնութիւն եւ ի հինգ կանգնոյ զլայնութիւն. չորեքկուսի լինիցի սեղանն. եւ յերից կանգնոց զբարձրութիւն նորա։ 2Եւ արասցես զեղջեւրս նորա ի վերայ չորեցունց անկեանց իւրոց, զի անդստին ընտրեալ իցեն եղջեւրքն. եւ պատեսցես զնա պղնձով։ 3Եւ արասցես պսակ սեղանոյն, եւ զնուարտանն՝՝ նորա, եւ զտաշտսն եւ զմսահանսն եւ զկրակարանսն, եւ զամենայն սպասն արասցես պղնձի։ 4Եւ արասցես նմա գահաւորակ վանդակակերպ պղնձի. եւ արասցես գահաւորակին չորս օղամանեակս պղնձիս ի չորեցունց կողմանէ։ 5Եւ դիցես զնոսա ընդ գահաւորակաւ՝՝ սեղանոյն ի ներքոյ. եւ եղիցի գահաւորակն մինչեւ ի մէջ սեղանոյն։ 6Եւ արասցես լծակս սեղանոյն՝ լծակս յանփուտ փայտից. եւ պատեսցես զնոսա պղնձով։ 7Եւ արկցես զլծակսն ընդ օղսն, եւ եղիցին լծակքն յերկոցունց կողմանց սեղանոյն՝ առ ի բառնալ զնա։ 8Խոր տախտակամածս արասցես զնա. ըստ օրինակին որպէս ցուցաւ քեզ ի լերին անդ, այնպէս արասցես զնա։

9Եւ արասցես սրահ խորանին. ի կողմ հարաւոյ եւ զառագաստ սրահին ի բեհեզոյ մանելոյ, հարեւր կանգուն յերկայնութիւն միոյ կողմանն, 10եւ սիւնք նորա քսան, եւ խարիսխք նոցա պղնձիք քսան, եւ օղք նոցա եւ խոյակք նոցա արծաթիք։ 11Նոյնպէս եւ ի կողմանն որ ընդ հիւսիսի՝ առագաստքն հարեւր կանգուն յերկայնութիւն. եւ սիւնք նոցա պղնձիք քսան, եւ խարիսխք նոցա պղնձիք քսան, եւ խոյօղք նոցա եւ խարիսխք սեանցն, եւ խարիսխք պատեալ արծաթով՝՝։ 12Եւ ի լայնութիւն սրահին ընդ ծովակողմն՝ առագաստք ի յիսուն կանգնոյ, սիւնք նոցա տասն եւ խարիսխք նոցա տասն։ 13Եւ լայնութիւն առաջին սրահին՝՝ որ ընդ արեւելս՝ առագաստք ի յիսուն կանգնոյ, սիւնք նոցա տասն եւ խարիսխք նոցա տասն։՝՝ 14Եւ ի հնգետասան կանգնոյ բարձրութիւն առագաստիցն ի միոջէ կողմանէ. սիւնք նոցա երեք եւ խարիսխք նոցա երեք։ 15Եւ յերկրորդում կողմանն՝ հնգետասան կանգուն առագաստիցն ի բարձրութիւն. սիւնք նոցա երեք եւ խարիսխք նոցա երեք։ 16Եւ դրան սրահին վարագոյր՝ քսան կանգուն ի բարձրութիւն, ի կապուտակէ եւ ի ծիրանւոյ եւ ի կարմրոյ մանելոյ եւ ի բեհեզոյ նիւթելոյ, նկարէն յասղնագործաց. եւ սիւնք նոցա չորք եւ խարիսխք նոցա չորք։ 17Ամենայն սիւնք սրահին շուրջանակի՝ արծաթապատք, եւ խոյակք՝՝ նոցա արծաթիք, եւ խարիսխք նոցա պղնձիք։ 18Եւ երկայնութիւն սրահին հարեւր առ հարեւր՝՝, եւ լայնութիւն յիսուն առ յիսուն, եւ բարձրութիւն հնգետասան կանգուն, ի բեհեզոյ մանելոյ. եւ խարիսխք նոցա պղնձիք։ 19Եւ ամենայն կահ խորանին եւ ամենայն գործի նորա՝՝ եւ ամենայն ցիցք սրահին՝ պղնձիք։

20Եւ դու պատուիրեա որդւոցն Իսրայելի, եւ առցեն քեզ ձէթ ի ձիթենեաց պարզ, սուրբ, խակակութ,՝՝ ի լոյս. զի եղիցի ճրագ հանապազորդ։ 21Ի խորանին վկայութեան՝ արտաքոյ վարագուրի ուխտին, լուցանիցէ զնա Ահարոն եւ որդիք իւր յերեկորեայ մինչեւ ցառաւօտ առաջի Տեառն. օրէն յաւիտենական յազգս ձեր առ ի յորդւոցն Իսրայելի։