1Եւ յայնմ աւուր պարգեւեաց թագաւորն Եսթերայ զգանձն Համանայ քսուի. եւ զՄուրթքէ կոչեցեալ՝՝ թագաւորին, քանզի պատմեաց նմա Եսթեր եթէ ազգական իմ է։ 2Եւ ա՛ռ թագաւորն զմատանին զոր եհան ի Համանայ, եւ ետ զնա Մուրթքէի, եւ կացոյց Եսթեր զՄուրթքէ ի վերայ ամենայն ընչից Համանայ։

3Եւ յաւել եւս խօսել ընդ արքայի, եւ անկաւ առաջի ոտից նորա եւ աղաչէր՝ զի մի՛ մինչեւ ի վախճան լիցի պատուհասն ի վերայ Հրէիցն զոր հասոյց Համան՝՝։ 4Եւ ձգեաց արքայ առ Եսթեր զգաւազանն ոսկի. եւ յարեաւ Եսթեր երթալ ի սենեակն՝՝ արքայի։ 5Եւ ասէ Եսթեր. Եթէ կամք իցեն քեզ եւ գտեալ է իմ շնորհս առաջի քո, առաքեսցէ արքայ հրեշտակս եւ դարձուսցէ զհրովարտակսն որ գրեցանն ի Համանայ կորուսանել զՀրեայսն որք են ի քում թագաւորութեանդ։ 6Եւ զիա՞րդ կարիցեմ ես տեսանել զչարիս ժողովրդեան իմոյ, եւ կամ զիա՞րդ կարացից ապրել ես ի բնակչաց հայրենի գաւառին իմոյ՝՝։

7Եւ ասէ թագաւորն ցԵսթեր. Իսկ եթէ զամենայն ինչս եւ զստացուածս՝՝ Համանայ ետու շնորհեցի քեզ, եւ զնա կախեցի զփայտէ, զի ձեռն էարկ նա ի Հրեայսն, զի՞նչ այլ եւս ինչ խնդրես՝՝։ 8Գրեցէք արդ դուք հրամանաւ բանի իմոյ որպէս կամք իցեն ձեզ, եւ կնքեսցի մատանեաւս իմով. զի որչափ եւ գրէք՝ իմ արքայի հրաման տուեալ. զի մի՛ ոք գտցի դիմակաց այնց հրամանաց՝՝։

9Եւ կոչեցին զդպիրսն յառաջնում աւուրն յամսեանն Նիսան՝ որ է Արեգ, ի քսաներորդի յերրորդի ամի՝՝. եւ գրեցաւ՝ որպէս եւ ետ հրաման աշխարհամար դպրացն. որք միանգամ իշխանքն եւ կուսակալքն էին ի գաւառս գաւառս, նախարարացն, եւ իշխանաց նախարարացն՝՝, ի Հնդկաց մինչեւ յԵթովպացիս՝ հարեւր քսան եւ եւթն կուսակալացն, ըստ գաւառաց գաւառաց յիւրաքանչիւր լեզուս նոցա, 10հրամանաւ թագաւորին. եւ կնքեցաւ մատանեաւ նորա։ Եւ առաքեցին զհրովարտակսն ի ձեռն հրեշտակաց, 11որպէս զի կացցեն Հրեայք ողջ եւ անարատք իւրեանց օրինօք յամենայն քաղաքի. օգնականք եւ թիկունք լինել առ ի հատուցանել նոցա զփոխարէն թշնամեաց իւրեանց՝ որպէս եւ կամիցին՝ 12յաւուրս միում ընդ ամենայն տեղիս թագաւորութեան իմում, յաւուրն երեքտասաներորդի ամսոյն Ադարայ։՝՝