1Եւ այս են պատուիրանք եւ իրաւունք եւ դատաստանք զոր պատուիրեաց ձեզ Տէր Աստուած մեր, ուսուցանել զձեզ՝ առնել այնպէս յերկրին յոր դուք մտանիցէք ժառանգել. 2զի երկնչիցիք ի Տեառնէ Աստուծոյ մերմէ, պահել զամենայն իրաւունս նորա եւ զպատուիրանս նորա զոր ես պատուիրեմ ձեզ այսօր՝՝, դու եւ որդիք քո եւ որդիք որդւոց քոց, զամենայն աւուրս կենաց քոց, զի երկայնօրեայք լինիցիք։ 3Եւ լուր, Իսրայէլ, եւ զգոյշ լեր առնելոյ, զի բարի լինիցի քեզ եւ բազմանայցէք յոյժ, որպէս խոստացաւ Աստուած հարցն քոց տալ քեզ զերկիրն որ բղխէ զկաթն եւ զմեղր։ Այս են իրաւունք եւ դատաստանք զոր պատուիրեաց Մովսէս որդւոցն Իսրայելի յանապատին, յելանել նոցա յերկրէն Եգիպտացւոց։՝՝

4Լուր, Իսրայէլ, Տէր Աստուած մեր՝ Տէր մի է։ 5Եւ սիրեսցես զՏէր Աստուած քո յամենայն սրտէ քումմէ եւ յամենայն անձնէ քումմէ եւ յամենայն զօրութենէ քումմէ։ 6Եւ եղիցին պատգամքս այսոքիկ զոր ես պատուիրեմ քեզ այսօր՝ ի սրտի քում եւ յանձին քում. 7եւ իմացուսցես՝՝ զայս որդւոց քոց, եւ խօսեսցիս սոքօք ի նստել ի տան եւ ի գնալ ի ճանապարհի եւ ի ննջել եւ ի յառնել. 8եւ արկցես զսոսա նշան ի ձեռին քում, եւ եղիցի անշարժ առաջի աչաց քոց. 9եւ գրեսցես զնոսա ի վերայ սեմոց տանց քոց եւ ի դրունս քո։

10Եւ եղիցի յորժամ տանիցի զքեզ Տէր Աստուած քո յերկիրն զոր երդուաւ Տէր հարցն քոց Աբրահամու եւ Իսահակայ եւ Յակոբայ՝ տալ քեզ քաղաքս մեծամեծս եւ գեղեցիկս զոր ոչ շինեցեր, 11եւ տունս լի ամենայն բարութեամբք զոր ոչ լցեր, եւ ջրհորս փորեալս զոր ոչ փորեցեր, եւ այգիս եւ ձիթենիս զորս ոչ տնկեցեր, եւ ուտիցես եւ յագիցիս, 12զգոյշ լինիջիր անձին քում, գուցէ մոռանայցես զՏէր Աստուած քո՝՝ որ եհան զքեզ յերկրէն Եգիպտացւոց ի տանէ ծառայութեան։ 13Ի Տեառնէ Աստուծոյ քումմէ երկիցես եւ զնա միայն պաշտեսցես, եւ ի նա յարեսցիս՝՝ եւ յանուն նորա երդնուցուս։ 14Մի՛ երթայցէք զհետ աստուածոց օտարաց, եւ զհետ աստուածոց ազգացն որ շուրջ զձեւք իցեն. 15զի Աստուած նախանձոտ, Տէր Աստուած քո ի միջի քում. գուցէ բարկացեալ սրտմտիցի Տէր Աստուած քո սատակել զքեզ յերեսաց երկրէ։

16Մի՛ փորձեսցես զՏէր Աստուած քո որպէս փորձեցէք ի Փորձութեանն։ 17Պահելով պահեսցես զպատուիրանս Տեառն Աստուծոյ քո, զվկայութիւնս եւ զիրաւունս զոր պատուիրեաց քեզ։ 18Եւ արասցես զբարին եւ զհաճոյսն առաջի Տեառն Աստուծոյ քո՝՝, զի քեզ բարի լինիցի, եւ մտցես եւ ժառանգեսցես զերկիրն բարի զոր երդուաւ Տէր հարցն մերոց, 19հալածել զամենայն թշնամիս յերեսաց քոց, որպէս եւ խօսեցաւ։

20Եւ եղիցի յորժամ հարցանիցէ ցքեզ վաղիւ որդին քո եւ ասիցէ. Զի՞նչ են վկայութիւնքն եւ իրաւունք եւ դատաստանք զոր պատուիրեաց Տէր Աստուած մեր մեզ։ 21Եւ ասասցես ցորդին քո. Ծառայք էաք փարաւոնի յԵգիպտոս, եւ հան զմեզ Տէր Աստուած անտի հզօր ձեռամբ եւ բարձր բազկաւ՝՝. 22եւ ետ Տէր նշանս եւ արուեստս մեծամեծս եւ չարաչարս յերկրին Եգիպտացւոց, ի փարաւոն եւ ի տուն նորա առաջի մեր. 23եւ զմեզ եհան անտի, զի ածցէ այսր տալ մեզ զերկիրս զայս զոր երդուաւ տալ հարցն մերոց։ 24Եւ պատուիրեաց մեզ Տէր առնել զամենայն իրաւունս զայսոսիկ, երկնչել ի Տեառնէ Աստուծոյ մերմէ, զի բարի լիցի մեզ զամենայն աւուրս, զի կեցցուք որպէս եւ այսօր։ 25Եւ ողորմութիւն եղիցի մեզ, եթէ զգուշասցուք առնել զամենայն պատուիրանս զայսոսիկ առաջի Տեառն Աստուծոյ մերոյ, որպէս եւ պատուիրեաց մեզ։