1Գուցէ տեսեալ զարջառ եւ զոչխար եղբօր քո մոլորեալս ի ճանապարհի, եւ անտես առնիցես զնոսա. այլ դարձուցանելով դարձուսցես զնոսա եւ ածցես առ եղբայրն քո։ 2Ապա թէ չիցէ մօտ եղբայրն քո առ քեզ, եւ ոչ ճանաչիցես զնա, ժողովեսցես զնոսա ի տուն քո, եւ եղիցին առ քեզ, մինչեւ խնդրեսցէ զնոսա եղբայր քո, եւ տացես ցնա։ 3Նոյնպէս արասցես զէշ նորա, նոյնպէս արասցես զհանդերձ նորա, նոյնպէս արասցես եւ զամենայն կորուստ եղբօր քո, որ ինչ կորնչիցի ի նմանէ եւ գտանիցես. մի՛ իշխեսցես անտես առնել զայն։

4Գուցէ տեսանիցես զէշ եղբօր քո, կամ զեզն նորա անկեալ ի ճանապարհի, եւ զանց առնիցես զնոքօք, այլ յարուցանելով յարուսցես ընդ նմա։

5Մի՛ եղիցի հանդերձ առնացի զկանամբք, եւ մի՛ զգեցցի այր զգեստ կանացի. զի պիղծ է Տեառն Աստուծոյ քում ամենայն որ առնէ զայն։

6Եւ եթէ դիպեսցիս բունոյ հաւուց առաջի քո ի ճանապարհի, եթէ ի ծառ եւ եթէ ի գետնի, ձագուց կամ ձուոց, եւ մայրն ջեռեալ նստիցի ի վերայ ձագուցն կամ ձուոց, մի՛ առնուցուս զմայրն հանդերձ որդւովքն. 7արձակելով արձակեսցես զմայրն, եւ զորդիսն առցես քեզ. զի բարի լիցի քեզ, եւ բազմօրեայ լինիցիս ի վերայ երկրի՝՝։

8Եւ եթէ շինեսցես տուն նորաշէն, արասցես պսակ շուրջ զտանեօքն, եւ մի՛ սպանումն գործեսցես ի տան քում, զի մի՛ անկանիցի որ անկանելոցն իցէ՝՝ ի նմանէ։

9Մի՛ վարեսցես զայգի քո այլ եւ այլ, զի մի՛ սրբեսցին արմտիքն եւ սերմն զոր սերմանիցես ընդ բերից այգւոյն քո։

10Մի՛ վարեսցես զէշ եւ զեզն ի միասին։

11Մի՛ զգենուցուս այլայլախառն՝ զասր եւ կտաւն ի միասին։

12Ծոպս մանուածոյս արասցես ի վերայ չորեցունց տտնոց հանդերձից քոց, զոր եւ զգենուցուս։

13Եւ եթէ առնուցու ոք կին եւ ամուսնասցի ընդ նմա, եւ ատեսցէ զնա, 14եւ դիցէ ի վերայ պատճառս բամբասական բանից, եւ անուն չար հանիցէ զնմանէ եւ ասիցէ՝ Զկինս զայս առի, եւ մերձեցեալ ի սա ոչ գտի զկուսութիւն սորա. 15եւ առեալ հայր եւ մայր աղջկանն, հանցեն զկուսութիւնս աղջկանն առ ծերակոյտն ի դուռն. 16եւ ասասցէ հայր աղջկանն ցծերակոյտն. Զդուստրս իմ զայս ետու առնդ այդմիկ կնութեան. եւ ատեցեալ զսա՝ 17դնէ ի վերայ պատճառս բամբասաւոր բանից՝ եւ ասէ. Ոչ գտի զկուսութիւն դստեր քո, եւ ահաւասիկ կուսութիւնք դստեր իմոյ. եւ բացցեն զհանդերձն առաջի ծերոց քաղաքին այնորիկ։ 18Եւ առցէ ծերակոյտ քաղաքին այնորիկ զայրն զայն եւ խրատեսցեն զնա, 19եւ տուժեսցեն ի նմանէ հարեւր սիկղ, եւ տացեն հօր աղջկանն, փոխանակ զի եհան անուն չար զկուսէն Իսրայելացւոյ. եւ նորին լիցի կին, եւ մի՛ իշխեսցէ արձակել զնա զամենայն ժամանակս։ 20Ապա թէ ճշմարիտ իցէ բանն, եւ ոչ գտցին կուսութիւնք աղջկանն, 21հանցեն զաղջիկն առ դուրս հօր իւրոյ, եւ քարկոծ արասցեն զնա արք քաղաքին իւրոյ եւ մեռցի. զի արար անզգամութիւն ի մէջ որդւոցն Իսրայելի, պոռնկել ի տան հօր իւրոյ. եւ բարձջիք զչարն ի ձէնջ։

22Եւ եթէ գտցի այր շնացեալ ընդ առնակնոջ, սպանջիք զերկոսեան, զայրն շնացեալ ընդ կնոջն եւ զկինն. եւ բարձջիք զչարն յԻսրայելէ։

23Եւ եթէ եղիցի աղջիկ կոյս խօսեցեալ առն, եւ գտանիցէ զնա այր ոք ի քաղաքի եւ ննջեսցէ ընդ նմա. 24հանջիք զերկոսին ի դուռն քաղաքին իւրեանց, եւ քարկոծեսցեն զնոսա քարամբք եւ մեռցին. զաղջիկն՝ զի ոչ բողոքեաց ի քաղաքին, եւ զայրն որ լլկեաց զկին ընկերի իւրոյ. եւ բարձջիք զչարն ի միջոյ ձերմէ։

25Ապա թէ ի դաշտի գտցէ այր զաղջիկ ոք խօսեալ առն, եւ բռնաբար ննջեսցէ ընդ նմա, սպանջիք զայրն որ ննջեաց ընդ նմա։ 26Եւ աղջկանն մի՛ ինչ առնիցէք. զի ոչ է աղջկանն վնաս մահու. զի որպէս յառնիցէ մարդ ի վերայ ընկերի իւրոյ եւ սպանանիցէ զնա, այնպէս է իրն։ 27Զի ի բացի եգիտ զնա. եւ բողոքեաց աղջիկն խօսեալ, եւ ոչ ոք էր որ օգնէր նմա։

28Եւ եթէ գտանիցէ ոք զաղջիկ կոյս որ չիցէ խօսեալ առն, եւ բռնաբար ննջեսցէ ընդ նմա, 29տացէ այրն որ ննջեաց ընդ նմա՝ հօր աղջկանն յիսուն երկդրամեան արծաթոյ, եւ նորա լիցի կին. եւ մի՛ իշխեսցէ արձակել զնա զամենայն ժամանակս իւր։

30Մի՛ առցէ այր զկին հօր իւրոյ, եւ մի՛ յայտնեսցէ զծածուկս հօր իւրոյ։