1Եւ էր պատերազմ սաստիկ ի մէջ տանն Սաւուղայ եւ ի մէջ տանն Դաւթի. եւ տունն Դաւթի՝՝ երթայր եւ զօրանայր, եւ տունն Սաւուղայ երթայր եւ տկարանայր։

2Եւ ծնան Դաւթի որդիք ի Քեբրոն. անդրանիկ նորա՝ Ամմոն յԱքինովամայ Յեզրայելացւոյ, 3եւ երկրորդ նորա՝ Դաւիա, յԱբիգեայ՝՝ Կարմեղացւոյ, եւ երրորդ՝ Աբիսողոմ, ի Մաաքեայ դստերէ Թողմեայ արքայի Գեսուրայ, 4եւ չորրորդ՝ Ադոնիա, որդի Ագգիթայ, եւ հինգերորդ՝ Սափատիա, որդի Ամիտաղայ, 5եւ վեցերորդ՝ Յեթրամ, յԵգղաթայ կնոջէ Դաւթի. սոքա ծնան Դաւթի ի Քեբրոն։

6Եւ եղեւ ի լինել պատերազմին ի մէջ տանն Սաւուղայ եւ ի մէջ տանն Դաւթի, եւ Աբեններ ունէր զտունն Սաւուղայ։ 7Եւ Սաւուղայ էր հարճ մի, որում անուն էր Ռեսփա, դուստր Յուղայ։ Եւ ասէ Յեբուսթէ որդի Սաւուղայ ցԱբեններ. Ընդէ՞ր մտանես դու առ հարճ հօր իմոյ։ 8Եւ բարկացաւ Աբեններ յոյժ վասն բանին Յեբուսթեայ, եւ ասէ ցնա Աբեններ. Միթէ շան գլո՞ւխ իցեմ ես, որ արարի ողորմութիւն այսօր ի վերայ տանն Սաւուղայ հօր քո, եւ ի վերայ եղբարց եւ ի վերայ բարեկամաց, եւ ոչ եղէ անձնատուր ի տունն՝՝ Դաւթի. եւ խնդրես յինէն այսօր վրէժ կնոջ միոյ։ 9Օն եւ օն արասցէ Աստուած Աբեններայ եւ օն եւ օն յաւելցէ նմա, եթէ ոչ որպէս երդուաւ Տէր Դաւթի, այնպէս արարից նմա. 10բառնալ զթագաւորութիւնն Սաւուղայ, եւ կանգնել զթագաւորութիւնն Դաւթի ի վերայ Իսրայելի եւ ի վերայ Յուդայ ի Դանայ մինչեւ ցԲերսաբէէ։ 11Եւ ոչ եւս կարաց Յեբուսթէ տալ պատասխանի Աբեններայ բան մի յերկիւղէն։

12Եւ առաքեաց Աբեններ հրեշտակս առ Դաւիթ ի Թեսաղմու երկիր՝ առ ժամայն՝՝. եւ ասէ. Ուխտեա ընդ իս զուխտ քո, եւ ահա ձեռն իմ ընդ քեզ, դարձուցանել առ քեզ զամենայն տունն Իսրայելի։ 13Եւ ասէ Դաւիթ. Բարւոք է. ես ուխտեցից ընդ քեզ ուխտ. բայց բան մի ես խնդրեմ ի քէն, մի՛ տեսցես զերեսս իմ, եթէ ոչ ածցես զՄեղքող դուստր Սաւուղայ ի գալն քում տեսանել զերեսս իմ։ 14Եւ առաքեաց Դաւիթ առ Յեբուսթէ որդի Սաւուղայ հրեշտակս եւ ասէ. Տուր ցիս զկին իմ զՄեղքող, զոր առի ես ընդ հարեւր անթլփատութեանց այլազգեացն։ 15Եւ առաքեաց Յեբուսթէ եւ առ զնա յառնէ իւրմէ Փաղտիելէ որդւոյ Սեղղայ։ 16Եւ երթայր այր նորա զհետ նորա եւ լայր մինչեւ ցԲարակիմ։ Եւ ասէ ցնա Աբեններ. Երթ դարձիր։ Եւ դարձաւ։

17Եւ խօսեցաւ Աբեններ ընդ ծերս Իսրայելի եւ ասէ. Երէկ եւ եռանդ խնդրէիք զԴաւիթ թագաւորել ի վերայ ձեր. 18եւ արդ արարէք, զի Տէր խօսեցաւ վասն Դաւթի եւ ասէ. Ձեռամբ ծառայի իմոյ Դաւթի փրկեցից զԻսրայէլ ի ձեռաց այլազգեացն եւ ի ձեռաց ամենայն թշնամեաց իւրեանց։ 19Եւ խօսեցաւ Աբեններ յականջս Բենիամինի. եւ գնաց Աբեններ խօսել յականջս Դաւթի ի Քեբրոն զամենայն ինչ որ հաճոյ թուեցաւ յաչս Իսրայելի, եւ յաչս ամենայն տանն Բենիամինի։ 20Եւ եկն Աբեններ առ Դաւիթ ի Քեբրոն, եւ ընդ նմա քսան այր։ Եւ արար Դաւիթ Աբեններեայ եւ արանցն որ ընդ նմա խրախութիւն։ 21Եւ ասէ Աբեններ ցԴաւիթ. Յարեայց եւ գնացից եւ ժողովեցից առ տէր իմ արքայ զամենայն Իսրայէլ, եւ ուխտեցից ընդ քեզ ուխտ, եւ թագաւորեսցես ի վերայ ամենեցուն որոց՝՝ ցանկայ անձն քո. եւ առաքեաց Դաւիթ զԱբեններ, եւ գնաց խաղաղութեամբ։

22Եւ ահա ծառայք Դաւթի եւ Յովաբ եկին յասպատակէ, եւ աւար բազում ածին ընդ իւրեանս. եւ Յովաբ չէր ընդ Դաւթի ի Քեբրոն յորժամ արձակեաց զնա եւ գնաց խաղաղութեամբ։ 23Եւ Յովաբ եւ ամենայն զօրն նորա եկին. եւ ազդ եղեւ Յովաբայ եւ ասեն. Եկն Աբեններ որդի Ներեայ առ Դաւիթ, եւ արձակեաց զնա եւ գնաց խաղաղութեամբ։ 24Եւ եմուտ Յովաբ առ Դաւիթ արքայ եւ ասէ. Զի՞նչ գործեցեր զայդ, զի եկն Աբեններ առ քեզ. եւ ընդէ՞ր արձակեցեր զնա խաղաղութեամբ. 25եթէ ո՞չ գիտիցես զչարութիւն Աբեններայ որդւոյ Ներեայ. զի խաբել զքեզ եկն, եւ իմանալ զմուտ եւ զել քո, եւ տեղեկանալ ամենայնի զինչ եւ գործիցես։ 26Եւ ել Յովաբ ի Դաւթէ, եւ արձակեաց հրեշտակս զկնի Աբեններայ, եւ դարձուցին զնա ի ջրհորոյ անտի Սէիրմայ. եւ Դաւիթ ոչ գիտէր։ 27Եւ դարձոյց զԱբեններ ի Քեբրոն, եւ խոտորեցոյց զնա Յովաբ ի կողմանց դրանն խօսել ընդ նմա դաւաճանութեամբ. եւ եհար ընդ սնակուշտն, եւ մեռաւ. վասն արեանն Ասայելի եղբօր Յովաբայ։

28Եւ լուաւ Դաւիթ յետ այնորիկ եւ ասէ. Անպարտ եմ ես եւ թագաւորութիւն իմ ի Տեառնէ մինչեւ ցյաւիտեան՝ յարենէն Աբեններայ որդւոյ Ներեայ։ 29Հասցեն ի գլուխ Յովաբայ եւ ի վերայ ամենայն տան հօր նորա. եւ մի՛ պակասեսցէ ի տանէ Յովաբայ սերմնակաթ եւ բորոտ եւ մուրող որ շրջիցի ի ցպոյ, եւ սրամահ եւ սովամահ։ 30Եւ Յովաբ եւ Աբեսսա եղբայր նորա սպասէին Աբեններայ՝՝, փոխանակ զի սպան զԱսայէլ զեղբայր նոցա ի Գաբաւոն ի պատերազմին։

31Եւ ասէ Դաւիթ ցՅովաբ եւ ցամենայն ժողովուրդն որ ընդ նմա. Պատառեցէք զհանդերձս ձեր, եւ զգեցարուք քուրձ, եւ կոծեցարուք առաջի Աբեններայ։ Եւ արքայ Դաւիթ երթայր զհետ դագաղացն։ 32Եւ թաղեցին զԱբեններ ի Քեբրոն. եւ ամբարձ արքայ զձայն իւր եւ ելաց ի վերայ գերեզմանի նորա, եւ ելաց ամենայն ժողովուրդն ի վերայ Աբեններայ։

33Եւ ա՛ռ ողբս արքայ ի վերայ Աբեններայ, եւ ասէ. Միթէ որպէս մեռանիցի անզգա՞մ, մեռաւ Աբեններ. եթէ ըստ մահուան Նաբաղա՞յ մեռաւ Աբեններ.՝՝ 34ձեռք քո ոչ կապեցան, եւ ոտք քո ոչ աղխեցան ի շղթայս. եւ ոչ մատեար իբրեւ զՆաբաղ առաջի որդւոց անիրաւութեան եւ անկար. այլ՝ որպէս անկանիցին առաջի անիրաւաց անկար։ Եւ ժողովեցան ամենայն ժողովուրդն լալ զնա։ 35Եւ եկն ամենայն ժողովուրդն տալ ընթրիս Դաւթի մինչդեռ աւուր կայր. եւ երդուաւ Դաւիթ եւ ասէ. Օն եւ օն արասցէ ինձ Աստուած եւ օն եւ օն յաւելցէ, եթէ ոչ մտանիցէ արեգակն եւ ապա ճաշակեցից հաց, եւ կամ զայլ ինչ ամենայն։ 36Եւ գիտաց ամենայն ժողովուրդն, եւ հաճոյ թուեցաւ առաջի նոցա ամենայն ինչ զոր արար արքայ առաջի ժողովրդեանն զբարութիւն։ 37Եւ գիտաց ամենայն ժողովուրդն եւ ամենայն Իսրայէլ յաւուր յայնմիկ եթէ ոչ յարքայէ եղեւ սպանանել զԱբեններ որդի Ներեայ։ 38Եւ ասէ արքայ ցծառայսն իւր. Ո՞չ գիտէք եթէ առաջնորդ մեծ անկաւ յաւուր յայսմիկ յԻսրայելի. 39եւ զի սա ազգական է այսօր եւ յարքայէ կացուցեալ է՝՝. եւ արքդ այդոքիկ որդիք Շարուհեայ խստագոյնք քան զիս են. հատուսցէ Տէր չարին ըստ չարութեան իւրում։