1Իքսաներորդի եւ երրորդի ամի Յովասու որդւոյ Ոքոզեայ արքայի Յուդայ, թագաւորեաց Յովաքազ որդի Յէուայ ի վերայ Իսրայելի ի Սամարիա ամս եւթն եւ տասն։ 2Եւ արար չար առաջի Տեառն, եւ գնաց զհետ մեղացն Յերոբովամայ որդւոյ Նաբատայ որ յանցոյցն զԻսրայէլ, եւ ոչ մեկնեցաւ ի նոցանէն։ 3Եւ բարկացաւ սրտմտութեամբ Տէր Իսրայելի, եւ ետ զնոսա ի ձեռս Ազայելի արքայի Ասորւոց, եւ ի ձեռս որդւոյ Ադերայ՝՝ որդւոյ Ազայելի զամենայն աւուրս։

4Եւ աղաչեաց Յովաքազ զերեսս Տեառն, եւ լուաւ նմա Տէր. զի ետես զնեղութիւն Իսրայելի զոր նեղեաց զնա արքայն Ասորւոց։ 5Եւ ետ Տէր փրկիչ Իսրայելի, եւ ելին ի ձեռանէ Ասորւոց, եւ նստան որդիքն Իսրայելի ի բնակութիւնս իւրեանց որպէս յերէկն եւ յեռանդն։ 6Սակայն ոչ մեկնեցան ի մեղացն Յերոբովամայ որդւոյ Նաբատայ որ յանցոյցն զԻսրայէլ, այլ ի նոսա գնացին. նա եւ անտառն կայր ի Սամարիա։ 7Եւ ոչ մնաց Յովաքազայ զօր, այլ հեծեալք յիսուն եւ կառք տասն, եւ տասն հազար հետեւակաց. զի կորոյս զնոսա արքայն Ասորւոց եւ եդ զնոսա իբրեւ զհող ի կոխումն։

8Եւ մնացորդք բանից Յովաքազու եւ ամենայն ինչ զոր արար եւ զօրութիւնք նորա, ո՞չ աւանիկ գրեալ են ի գիրս բանից աւուրց թագաւորացն Իսրայելի։ 9Եւ ննջեաց Յովաքազ ընդ հարս իւր, եւ թաղեցին զնա ընդ հարս նորա՝՝ ի Սամարիա. եւ թագաւորեաց Յովաս որդի նորա ընդ նորա։

10Յամի երեսներորդի եւ եւթներորդի Յովասու արքայի Յուդայ թագաւորեաց Յովաս որդի Յովաքազու ի վերայ Իսրայելի ի Սամարիա ամս երկոտասան։ 11Եւ արար չար առաջի Տեառն, եւ ոչ մեկնեցաւ յամենայն մեղաց Յերոբովամու որդւոյ Նաբատայ որ յանցոյցն զԻսրայէլ, այլ ի նոսա գնաց։

12Եւ մնացորդք բանից Յովասու եւ ամենայն ինչ զոր արար եւ զօրութիւնք նորա զոր արար ընդ արքային՝՝ Յուդայ, ո՞չ աւանիկ գրեալ են ի գիրս բանից աւուրց թագաւորացն Իսրայելի։ 13Եւ ննջեաց Յովաս ընդ հարս իւր, եւ Յերոբովամ նստաւ յաթոռ նորա. եւ թաղեցաւ Յովաս ի Սամարիա ընդ թագաւորս Իսրայելի։

14Եւ Եղիսէ հիւանդացաւ հիւանդութիւն, որով եւ մեռաւ իսկ. եւ էջ առ նա Յովաս արքայ Իսրայելի, եւ ելաց ի վերայ երեսաց նորա եւ ասէ. Հայր, հայր, կառքդ Իսրայելի եւ հեծեալք նորա։ 15Եւ ասէ ցնա Եղիսէ. Ա՛ռ դու զաղեղն քո եւ զնետս քո՝՝։ Եւ առ զաղեղն եւ զնետս։ 16Եւ ասէ ցարքայն Իսրայելի. Մուտ ընդ աղեղնդ ձեռօք քովք։ Եւ եմուտ ընդ աղեղնն ձեռօք իւրովք. եւ եդ Եղիսէ զձեռն իւր ի վերայ ձեռաց արքային, 17եւ ասէ. Բաց զպատուհանդ որ է ընդ արեւելս։ Եւ եբաց. եւ ասէ Եղիսէ. Ձգեա։ Եւ ձգեաց. եւ ասէ. Նետ փրկութեան Տեառն, եւ նետ փրկութեան ընդդէմ Ասորւոց. եւ հարցես զԱսորիս յԱփեկ մինչեւ ի սպառ։ 18Եւ ասէ ցնա Եղիսէ. Ա՛ռ դու քեզ նետս։ Եւ առ։ Եւ ասէ ցարքայն Իսրայելի. Ձգեա եւ հար զգետինդ։ Եւ եհար արքայն երիցս եւ եկաց։ 19Եւ տրտմեցաւ ի վերայ նորա այրն Աստուծոյ, եւ ասէ. Եթէ հարեալ էիր հնգիցս կամ վեցիցս, յայնժամ հարկանէիր զԱսորիս մինչեւ ի սպառ. եւ արդ երիցս հարցես զԱսորիս։

20Եւ մեռաւ Եղիսէ եւ թաղեցին զնա. եւ մեկնակազէնքն Մովաբու ելին յերկիրն ի գալ տարւոյն։ 21Եւ եղեւ ի թաղել նոցա զայր մի, եւ ահա տեսին զմեկնակազէնսն եւ ընկեցին զայրն ի գերեզմանն Եղիսէի. եւ գնաց եւ մերձեցաւ յոսկերսն Եղիսէի եւ կենդանացաւ, եւ կանգնեցաւ ի վերայ ոտից իւրոց։

22Եւ Ազայէլ արքայ Ասորւոց նեղեաց զԻսրայէլ զամենայն աւուրս Յովաքազու։ 23Եւ ողորմեցաւ նոցա Տէր եւ գթացաւ ի նոսա եւ հայեցաւ ի նոսա վասն ուխտին իւրոյ որ ընդ Աբրահամու եւ ընդ Իսահակայ եւ ընդ Յակոբայ. եւ ոչ կամեցաւ Տէր ապականել զնոսա, եւ ոչ ընկէց զնոսա յերեսաց իւրոց։

24Եւ մեռաւ Ազայէլ արքայ Ասորւոց, եւ թագաւորեաց որդի Ադերայ՝՝ որդի նորա ընդ նորա։ 25Եւ դարձաւ Յովաս որդի Յովաքազու, եւ առ զքաղաքսն ի ձեռաց որդւոյ Ադերայ՝՝ որդւոյ Ազայելի, զորս ա՛ռ ի ձեռաց Յովաքազու հօր նորա ի պատերազմին. երիցս եհար զնա Յովաս, եւ դարձոյց զքաղաքսն Իսրայելի։