1Եւ Գոթողիա մայր Ոքոզեայ, ետես եթէ մեռան որդիք նորա, կորոյս՝՝ զամենայն զաւակ թագաւորութեանն։ 2Եւ ա՛ռ Յովսաբէէ դուստր արքայի Յովրամայ քոյր Ոքոզեայ, զՅովաս զորդի Ոքոզեայ, եւ գողացաւ զնա ի միջոյ որդւոց արքայի սպանելոցն, զնա եւ զդայեակ նորա ի սենեկի անկողնոց, եւ թաքոյց զնա յերեսաց Գոթողեայ, եւ ոչ մեռաւ։ 3Եւ էր ընդ նմա ի տան Տեառն թաքուցեալ ամս վեց. եւ Գոթողիա թագաւորեալ էր ի վերայ երկրին։

4Եւ յամին եւթներորդի առաքեաց Յովիդայէ եւ առ զհարիւրապետսն եւ զքոռին եւ զռասիմ՝՝, եւ ած զնոսա ի տուն Տեառն, եւ ուխտեաց նոցա զուխտ Տեառն. եւ եցոյց նոցա Յովիդայէ զորդին արքայի։ 5Եւ պատուէր ետ նոցա եւ ասէ. Այս բան է զոր առնիցէք. երրորդ մասն ի ձէնջ մտցէ շաբաթամուտ, եւ պահեսջիք զպահպանութիւն տանն արքունի ի դրանն. 6եւ երրորդ մասն ի դրան ճանապարհացն, եւ երրորդ մասն ի դրան զկնի օժանդակացն, եւ պահեսջիք զպահպանութիւն տանն։ 7Եւ երկու ձեռք ի ձեզ, ամենայն որ ելանիցէ ընդ շաբաթամուտսն զգուշանալ տանն Տեառն՝՝, զգուշասցի պահպանութեամբ տանն Տեառն առ արքայ։ 8Եւ պատեսջիք զարքայիւ այր եւ գործի իւր ի ձեռին իւրում. եւ որ մտանիցէ ի սադերովթն՝ մեռցի. եւ ինքն էր՝՝ ընդ արքայի ի մտանել նորա եւ յելանել նորա։

9Եւ արարին հարիւրապետքն զամենայն զոր պատուիրեաց Յովիդայէ իմաստուն. եւ առնոյր այր զարս իւր, եւ զմտօղսն ի շաբաթամուտսն հանդերձ ելողօքն ի շաբաթամտէն, եւ մտանէր առ Յովիդայէ քահանայ։ 10Եւ ետ քահանայն հարիւրապետացն գեղարդունս եւ զբովանդակ զէնն՝՝ արքայի Դաւթի որ կայր ի տանն Տեառն։ 11Եւ յարեան օժանդակքն, այր եւ գործի իւր ի ձեռին իւրում, յաջոյ ուսոյ տանն մինչեւ ցձախոյ ուս տանն եւ սեղանոյն եւ տանն արքունի շուրջանակի։ 12Եւ առաքեաց զարքայորդին, եւ եդ ի վերայ նորա զյեզերն եւ զվկայութիւնն. եւ թագաւորեցոյց զնա եւ օծ զնա, եւ ծափս եհար եւ ասէ՝՝. Կեցցէ՛ արքայ։

13Եւ լուաւ Գոթողիա զձայն ընթանալոյ ժողովրդեանն, եւ եմուտ առ ժողովուրդն ի տունն Տեառն. 14եւ ետես՝ եւ ահա կայր ի վերայ սեանն ըստ օրինի իւրում, եւ երգիչք եւ փողարք շուրջ զարքայիւ, եւ ամենայն ժողովուրդք երկրին խնդային եւ փողս հարկանէին փողովք, եւ պատառեաց Գոթողիա զհանդերձս իւր, աղաղակեաց եւ ասէ. Դաւ է, դաւ է։ 15Եւ պատուէր ետ Յովիդայէ քահանայ հարիւրապետացն ոստիկանաց զօրուն եւ ասէ ցնոսա. Հանէք զդա ի ներքուստ սադերովթայդ, եւ որ մտանիցէ զկնի դորա՝ մեռցի սրով. քանզի ասաց քահանայն թէ մի՛ մեռցի ի տան Տեառն։ 16Եւ արկին ձեռն ի նա, մտին ընդ ճանապարհ մտից երիվարաց տանն արքայի, եւ մեռաւ անդ։

17Եւ ուխտեաց Յովիդայէ ուխտ ի մէջ Տեառն եւ ի մէջ արքայի եւ ի մէջ ժողովրդեանն, լինել ի ժողովուրդ Տեառն. եւ ի մէջ արքայի եւ ի մէջ ժողովրդեանն։ 18Եւ եմուտ ամենայն ժողովուրդ երկրին ի տուն Բահաղու, եւ կործանեցին զնա եւ զսեղանս նորա, եւ զպատկերս նորա խորտակեցին մանր. եւ զՄաթան զքուրմն Բահաղու սպանին յանդիման սեղանոյն. եւ եդ քահանայն ոստիկանս ի տան Տեառն։ 19Եւ առ զհարիւրապետսն եւ զքոռին եւ զռասիմ՝՝ եւ զամենայն ժողովուրդ երկրին, եւ իջուցին զարքայ ի տանէ Տեառն. եւ եմուտ ընդ ճանապարհն սուրհանդակաց դրան տանն արքունի, եւ նստոյց զնա՝՝ յաթոռ թագաւորացն։ 20Եւ ուրախ եղեւ ամենայն ժողովուրդ երկրին, եւ քաղաքն դադարեաց. եւ զԳոթողիա սպանին սրով ի տան արքայի։ 21Որդի եւթն ամաց Յովաս ի թագաւորել իւրում։