1Եւ մեռաւ Աբիա ընդ հարս իւր, եւ թաղեցին զնա ի քաղաքին Դաւթի. եւ թագաւորեաց Ասա որդի նորա փոխանակ նորա. յաւուրս Ասայի հանդարտեաց երկիրն Յուդայ ամս տասն։ 2Եւ արար բարի եւ ուղղութիւն առաջի Տեառն Աստուծոյ իւրոյ. 3եւ ի բաց արար զսեղանս օտարացն եւ զբարձունսն, եւ խորտակեաց զարձանսն, եւ այրեաց զանտառսն։ 4Եւ ասաց ցՅուդա խնդրել զՏէր Աստուած հարցն իւրեանց, եւ առնել զօրէնս եւ զպատուիրանս։ 5Եւ ի բաց արար յամենայն քաղաքացն Յուդայ զսեղանս եւ զկուռս. 6եւ խաղաղացան քաղաքք պարսպաւորք՝՝ յերկրին Յուդայ. վասն զի խաղաղացաւ երկիրն, եւ ոչ գոյր ուստեք նմա պատերազմ յամսն յայնոսիկ. վասն զի հանգոյց զնա Տէր. 7եւ ասէ ցՅուդա. Շինեսցուք զքաղաքսն զայնոսիկ, եւ արասցուք պարիսպս եւ աշտարակս եւ դրունս եւ նիգս որով տիրեմք երկրիս՝՝. զի զոր օրինակ խնդրեցաք զՏէր Աստուած մեր, եւ նա խնդրեաց զմեզ՝՝ եւ հանգոյց զմեզ շուրջանակի, եւ յաջողեաց մեզ՝՝։ 8Եւ եղեւ Ասայի զօր զինակրաց որք բառնային վահանս եւ նիզակս յերկրին Յուդայ՝ երեք հարեւր հազար. եւ յերկրին Բենիամինի ասպարաւորք եւ աղեղնաւորք՝ երկերիւր եւ վաթսուն հազար. ամենեքեան նոքա պատերազմողք զօրութեամբ։

9Եւ ել ի վերայ նոցա Զարեհ Եթէովպացի զօրութեամբ հազար հազարօք եւ երեք հարեւր կառօք, եւ եկն մինչեւ ի Մարիսա։ 10Եւ գնաց Ասա ընդդէմ նորա, եւ ճակատեցաւ պատերազմն ի ձորն՝ ի հիւսիսոյ Մարիսայ՝՝։ 11Եւ գոչեաց Ասա առ Տէր Աստուած իւր, եւ ասէ. Տէր, ոչ տկարանայ քեզ ապրեցուցանել բազմօք եւ սակաւուք. զօրացո զմեզ, Տէր Աստուած մեր, վասն զի ի քեզ յուսացաք, եւ անուամբ քով եկաք ի վերայ բազմութեանս այսորիկ. Տէր Աստուած մեր, մի՛ յաղթահարեսցէ զքեզ մարդ։ 12Եւ եհար Տէր զԵթէովպացիսն առաջի Յուդայ, եւ փախեան Եթէովպացիքն։ 13Եւ հալածեաց Ասա եւ զօրն իւր մինչեւ ի Գեդովր, եւ անկան Եթէովպացիքն մինչեւ ոչ մնալ ի նոցանէ ապրեալ. քանզի խորտակեցան առաջի Տեառն եւ առաջի զօրութեան նորա, եւ կողոպտեցին աւար բազում։ 14Եւ կործանեցին զգեղս նոցա շուրջ զԳեդուրաւն՝՝, վասն զի եղեն արհաւիրք ի Տեառնէ ի վերայ նոցա. եւ առին աւար զամենայն քաղաքս նոցա, քանզի աւար բազում եղեւ նոցա։ 15Այլ եւ զվրանս անասնոցն նոցա առին։ Եւ զմիաստնիսն կոտորեցին, եւ առին՝՝ խաշինս բազումս եւ ուղտս, եւ դարձան յԵրուսաղէմ։