1Եւ յամին ութուտասներորդի թագաւորութեանն Յերոբովամայ որդւոյ Նաբատայ թագաւորէ Աբիու որդի Ռոբովամայ՝՝ ի վերայ Յուդայ։ 2Եւ երեք ամ թագաւորեաց ի վերայ Երուսաղեմի. եւ անուն մօր նորա Մաաքա դուստր Աբիսողոմայ։ 3Եւ գնաց ի մեղս հօր իւրոյ զոր արար առաջի Տեառն Աստուծոյ իւրոյ՝՝, եւ ոչ էր սիրտ նորա կատարեալ ընդ Տեառն Աստուծոյ իւրոյ իբրեւ զսիրտն Դաւթի հօր իւրոյ։ 4Զի ի ձեռն Դաւթի ետ նմա Տէր Աստուած մնացորդ յԵրուսաղէմ, զի կացուսցէ զորդի նորա յետ նորա, եւ հաստատեսցէ զԵրուսաղէմ. 5որպէս արար Դաւիթ ուղղութիւն առաջի Տեառն, եւ ոչ խոտորեցաւ յամենայնէ զոր պատուիրեաց նմա զամենայն աւուրս կենաց իւրոց, բաց ի բանին Ուրիայ Քետացւոյ։ 6Եւ պատերազմ էր ի մէջ Աբիայ եւ ի մէջ Յերոբովամայ զամենայն աւուրս կենաց նորա։

7Եւ մնացորդք բանից Աբիայ եւ ամենայն ինչ զոր արար, ո՞չ աւանիկ գրեալ են ի գիրս բանից աւուրց թագաւորացն Յուդայ. եւ պատերազմ էր ի մէջ Աբիայ եւ ի մէջ Յերոբովամայ։ 8Եւ ննջեաց Աբիու ընդ հարս իւր, եւ թաղեցաւ ի քաղաքի Դաւթի. եւ թագաւորէ Ասա որդի նորա ընդ նորա։

9Եւ յամի քսաներորդի Յերոբովամայ արքայի Իսրայելի թագաւորէ Ասա ի վերայ Յուդայ. 10եւ քառասուն եւ մի ամ թագաւորեաց յԵրուսաղէմ. եւ անուն մօր նորա Մաաքա դուստր Աբիսողոմայ։ 11Եւ արար Ասա ուղղութիւն առաջի Տեառն իբրեւ զԴաւիթ զհայր իւր։ 12Եւ եբարձ զնուէրս յերկրէն, եւ ջնջեաց զամենայն խարդախութիւնսն զոր արարին հարք նորա։ 13Եւ զՄաաքա զմայր իւր ի բաց արար ի տիկնութենէ. քանզի արար ժողովս յանտառին իւրում.՝՝ եւ կոտորեաց Ասա զամրոցս նորա, եւ այրեաց հրով ի հեղեղատին Կեդրոնի։ 14Սակայն զբարձունսն ոչ եբարձ. բայց սիրտ նորա կատարեալ էր ընդ Տեառն զամենայն աւուրս իւր։ 15Եւ եբեր զսիւնսն հօր իւրոյ եւ զսիւնսն զիւր եմոյծ՝՝ ի տուն Տեառն, արծաթ եւ ոսկի եւ անօթս։

16Եւ պատերազմ էր ի մէջ Ասայի եւ ի մէջ Բաասայ արքայի Իսրայելի զամենայն աւուրս նոցա։ 17Եւ ել Բաաս արքայ Իսրայելի ի վերայ Յուդայ, եւ շինեաց զՌամա, զի մի՛ լիցի ելանել եւ մտանել Ասայի արքայի Յուդայ։ 18Եւ ա՛ռ Ասա զամենայն արծաթն եւ զոսկի գտեալ ի գանձս տանն Տեառն եւ ի գանձս տան թագաւորին, եւ ետ զայն ի ձեռս ծառայից իւրոց, եւ առաքեաց զնոսա Ասա արքայ առ որդին Ադերայ՝ որդւոյ Աբենրայիմայ որդւոյ Ազայելի՝՝ արքայի Ասորւոց բնակելոյ ի Դամասկոս՝ եւ ասէ. 19Ուխտեա ուխտ՝՝ ընդ իս եւ ընդ քեզ, եւ ի մէջ հօր իմոյ եւ ի մէջ հօր քո. ահաւադիկ առաքեցի քեզ պատարագ արծաթ եւ ոսկի, եւ լոյծ զուխտ քո որ ընդ Բաասայ արքայի Իսրայելի, եւ գնասցէ յինէն։ 20Եւ լուաւ որդի Ադերայ՝՝ արքայի Ասայի, եւ առաքեաց զիշխանսն իւր՝՝ ի քաղաքսն Իսրայելի. եւ եհար զԱյին եւ զԴան եւ զԱբէլ տանն Մաաքայ՝՝, եւ զամենայն զՔեներէթ մինչեւ յամենայն երկիրն Նեփթաղիմայ։ 21Եւ եղեւ իբրեւ լուաւ Բաասա, դադարեաց ի շինելոյ զՌամա, եւ դարձաւ ի Թերսա։ 22Եւ արքայ Ասա պատուիրեաց ամենայն Յուդայ որ էին յԵնակիմ՝՝, զի առցեն զքարինսն Ռամայ եւ զփայտ նորա, զոր շինեաց Բաասա. եւ շինեաց նոքօք արքայ Ասա զամենայն բլուր Բենիամինի եւ զդիտանոցն՝՝։

23Եւ մնացորդք բանիցն Ասայի եւ ամենայն զօրութիւն նորա, եւ ամենայն ինչ զոր արար, եւ քաղաքն զոր՝՝ շինեաց, ո՞չ աւանիկ գրեալ են ի գիրս բանից աւուրց թագաւորացն Յուդայ. բայց ի ժամանակի ծերութեան իւրոյ ցաւեցին ոտք իւր։ 24Եւ ննջեաց Ասա ընդ հարս իւր, եւ թաղեցաւ ընդ հարս իւր ի քաղաքին Դաւթի. եւ թագաւորէ Յովսափատ որդի նորա ընդ նորա։

25Եւ Նաբատ որդի Յերոբովամայ թագաւորէ յԻսրայելի, յամին երկրորդի Ասայի արքայի Յուդայ. եւ թագաւորեաց ի վերայ Իսրայելի ամս երկուս. 26եւ արար չար առաջի Տեառն, եւ գնաց զճանապարհ հօր իւրոյ եւ ի մեղս իւր որովք յանցոյց զԻսրայէլ։ 27Եւ նստաւ զնովաւ Բաասա որդի Աքիայ ի վերայ տանն՝՝ Իսաքարու, եւ եհար զնա Բաասա ի Գաբաթոնն այլազգեաց. եւ Նաբատ եւ ամենայն Իսրայէլ նստէին զԳաբաթոնաւ. 28եւ սպան զնա Բաասա յամին երրորդի Ասայի արքայի Յուդայ, եւ թագաւորեաց ընդ նորա։ 29Եւ եղեւ իբրեւ թագաւորեաց, եհար զամենայն տունն Յերոբովամու. եւ ոչ թողոյր զամենայն շնչաւոր տանն Յերոբովամայ, մինչեւ սատակել զնա ըստ բանին Տեառն զոր խօսեցաւ ի ձեռն ծառայի իւրոյ Աքիայ Սիլովնացւոյ, 30վասն ամենայն մեղացն Յերոբովամայ որ մեղաւ եւ յանցոյց զԻսրայէլ ի զայրացուցանել իւրում, որովք զայրացոյց զՏէր Աստուած Իսրայելի։

31Եւ մնացորդք բանից Նաբատայ եւ ամենայն ինչ զոր արար, ո՞չ աւանիկ գրեալ են ի գիրս բանից աւուրց թագաւորացն Իսրայելի։ 32Եւ էր պատերազմ ի մէջ Ասայի եւ ի մէջ Նաբատայ արքայի Իսրայելի զամենայն աւուրս նոցա։

33Եւ յամին երրորդի Ասայի արքայի Յուդայ թագաւորէ Բաասա որդի Աքիայ ի վերայ ամենայն Իսրայելի ի Թերսա ամս քսան եւ չորս։ 34Եւ արար չար առաջի Տեառն, եւ գնաց զճանապարհ Յերոբովամայ որդւոյ Նաբատայ՝՝, եւ ի մեղս նորա որպէս յանցոյց զԻսրայէլ։