1Եւ տիկինն Սաբայ լուաւ զանուն Սողոմոնի եւ զանուն Տեառն եւ զիմաստութիւն Սողոմոնի՝՝. եւ եկն փորձել զնա առակօք։ 2Եւ եկն յԵրուսաղէմ զօրու ծանու յոյժ, եւ ուղտուք որ բարձեալ բերէին խունկս եւ ոսկի բազում յոյժ եւ ականս պատուականս. եւ եմուտ առ Սողոմոն, եւ խօսեցաւ ընդ նմա զամենայն ինչ որ էր ի սրտի իւրում։ 3Եւ մեկնեաց նմա Սողոմոն զամենայն բանս նորա, եւ ոչ էր բան սխալեալ յարքայէ զոր ոչ մեկնեաց նմա։ 4Եւ ետես տիկինն զամենայն իմաստութիւնն Սողոմոնի, եւ զտունս զոր շինեաց, 5եւ զխորտիկսն Սողոմոնի, եւ զաթոռ ծառայից նորա, եւ զկարգ պաշտօնէից նորա, եւ զհանդերձանս նորա, եւ զմատռուակս նորա, եւ զողջակէզս նորա զոր մատուցանէր՝՝ Տեառն, եւ յիմարեցաւ։ 6Եւ ասէ ցարքայ Սողոմոն. Ճշմարիտ էր բանն զոր լուայ յերկրին իմում վասն բանից քոց եւ վասն իմաստութեան քո. 7եւ ոչ հաւատացի խօսելեացն առ իս, մինչեւ ինձէն եկի եւ տեսին աչք իմ. եւ ահա ի կէս չէ զոր պատմեցին ինձ իմաստութեանդ զոր յաւելեր եւ բարութեան, եւ ամենայն համբաւոյն զոր լսէին յերկրին իմում։ 8Երանելի են կանայք քո եւ երանելի ծառայք քո որ կան առաջի քո՝ եւ հանապազ լսեն զիմաստութիւն քո։ 9Եւ եղիցի Տէր Աստուած քո օրհնեալ որ հաճեցաւ ընդ քեզ տալ զքեզ յաթոռդ Իսրայելի. վասն սիրելոյ Տեառն զԻսրայէլ հաստատել յաւիտեան. եւ կացոյց զքեզ արքայ ի վերայ նոցա, առնել իրաւունս եւ արդարութիւն յատեանս նոցա՝՝։ 10Եւ ետ Սողոմոնի հարեւր եւ քսան տաղանդ ոսկւոյ եւ խունկս բազումս յոյժ եւ ականս պատուականս. եւ ոչ էին եկեալ այնպիսի խունկք բազումք եւ անուշունք՝՝, զորս ետ տիկինն Սաբայ արքայի Սողոմոնի։

11Եւ նաւն Քիրամայ որ բերէր ոսկի ի Սովփերայ, եբեր ի Սովփերայ փայտ անտաշ բազում յոյժ եւ ականս պատուականս։ 12Եւ արար արքայ զփայտսն անտաշս մոյթս տանն Տեառն եւ տանն արքայի, եւ քնարս եւ տաւիղս երգեցողաց. եւ չէր եկեալ այնպիսի փայտ անտաշ յերկիրն՝՝, եւ ոչ երեւեցաւ ուրեք մինչեւ ցայսօր։

13Եւ արքայ Սողոմոն ետ տիկնոջն Սաբայ զամենայն ինչ զոր կամեցաւ եւ զոր խնդրեաց, բաց յայնմանէ զորս տուեալ էր նորա ի ձեռս՝՝ արքայի Սողոմոնի. եւ դարձաւ եւ գնաց յերկիր իւր՝ ինքն եւ ամենայն ծառայք իւր։

14Եւ էր կշիռ ոսկւոյն եկելոյ Սողոմոնի ի միում տարւոջ վեց հարեւր եւ վաթսուն եւ վեց տաղանդ ոսկւոյ. 15թող զհարկացն կարգելոց եւ զվաճառաց վաճառականաց, եւ զամենայն թագաւորաց այնր կողման՝՝ եւ նախարարաց երկրին։

16Եւ արար արքայ Սողոմոն երեքհարեւր նիզակ՝՝ ոսկի կռածոյ, եւ երեքհարեւր դահեկան՝՝ ի վերայ միոյ նիզակի. 17եւ երեքհարեւր զէն ոսկի կուռ, եւ երեք մանք ոսկւոյ ի մի զէն՝՝. եւ եդ զայն արքայ ի տուն անտառին Լիբանանու։

18Եւ արար արքայ աթոռ փղոսկրեայ մեծ, եւ պատեաց զնա ոսկւով փորձով. 19վեց աստիճան աթոռոյն, եւ դէմք եզանց՝՝ ի թիկանց կողմանէ աթոռոյն, եւ ձեռք աստի եւ անտի ի վերայ աթոռոյն նստելոյ, եւ երկու առիւծունք կային առընթեր ձեռացն։ 20Եւ երկոտասան առեւծք կային ի վերայ վեցեցունց աստիճանացն աստի եւ անտի. եւ ոչ եղեւ այնպիսի յամենայն թագաւորութեան։

21Եւ ամենայն կահ սպասու արքայի Սողոմոնի ոսկի գործեալ, եւ աւազանք ոսկիք՝՝, եւ ամենայն կահ տան անտառին Լիբանանու ոսկւով պատեալ՝՝. եւ ոչ գոյր արծաթ, քանզի ոչ էր համարեալ արծաթ յաւուրս Սողոմոնի թէ իցէ ինչ։ 22Զի նաւ Թարսսացի էր Սողոմոնի արքայի ի ծովու ընդ նաւս Քիրամայ, եւ յերեամ գայր արքայի նաւ ի Թարսսէ, ոսկւոյ եւ արծաթոյ եւ ժանեաց փղաց եւ կապկաց եւ սիրամարգաց։

23Եւ մեծացաւ Սողոմոն քան զամենայն թագաւորս երկրի մեծութեամբ եւ իմաստութեամբ։ 24Եւ ամենայն թագաւորք երկրի խնդրէին տեսանել՝՝ զերեսս Սողոմոնի, լսել զիմաստութիւն նորա զոր ետ Տէր ի սիրտ նորա։ 25Եւ նոքա բերէին իւրաքանչիւր զպատարագս իւրեանց, անօթս արծաթեղէնս եւ անօթս ոսկեղէնս եւ հանդերձս, ստաշխն եւ խունկս եւ ձիս եւ ջորիս, ամի ամի։

26Եւ ժողովեաց Սողոմոն կառս եւ հեծեալս. եւ էին Սողոմոնի քառասուն հազար ձիք մատակք՝՝ կառաց, եւ երկոտասան հազար երիվարաց, եւ եդ զնոսա ի քաղաքս կառաց, եւ որ ընդ արքայի յԵրուսաղէմ։ Եւ էր իշխան ամենայն թագաւորաց ի Գետոյն մինչեւ ցայլազգիս, եւ մինչեւ ցսահմանս Եգիպտացւոց։՝՝ 27Եւ ետ արքայ զարծաթ եւ զոսկի՝՝ յԵրուսաղէմ իբրեւ զքարինս, եւ զեղեւնափայտ՝ իբրեւ զմոլաթզենիս ի դաշտս բազմութեամբ։ 28Եւ ելք երիվարաց Սողոմոնի յԵգիպտոսէ, եւ ի Թեկուայ վաճառք արքայի. եւ առնուին ի Թեկուայ գնովք՝՝։ 29Եւ ելանէին ելք կառաց յԵգիպտոսէ փոխանակ արծաթոյ, եւ ձի ընդ հարեւր եւ յիսուն արծաթոյ. եւ նոյնպէս թագաւորացն ամենեցունց Քետտիմայ, եւ թագաւորացն Ասորւոց որ ընդ ծովակողմն՝՝ ելանէին։