1Եւ արար իւր տունս ի քաղաքի Դաւթի, եւ պատրաստեաց զտեղի տապանակին Աստուծոյ, եւ արար նմա խորան։ 2Յայնժամ ասաց Դաւիթ. Ոչ այլ ումեք է բառնալ զտապանակն Աստուծոյ, բայց միայն Ղեւտացւոցն. վասն զի զնոսա ընտրեաց Տէր բառնալ զտապանակն իւր, եւ պաշտել առաջի նորա մինչեւ յաւիտեանս։

3Եւ ժողովեաց Դաւիթ զամենայն Իսրայէլ յԵրուսաղէմ հանել զտապանակն Տեառն ի տեղին զոր պատրաստեաց նմա։ 4Եւ ժողովեաց Դաւիթ զորդիսն Ահարոնի եւ զՂեւտացիսն. 5յորդւոցն Կահաթու՝ Ուրիէլ իշխան, եւ եղբարք նորա հարեւր քսան. 6յորդւոցն Մերարեայ՝ Ասայիաս իշխան, եւ եղբարք նորա երկերիւր յիսուն. 7յորդւոցն Գերսոնի՝ Յովէլ իշխան, եւ եղբարք նորա հարեւր երեսուն. 8յորդւոցն Եղիսափանայ՝ Սամայիաս իշխան, եւ եղբարք նորա երկերիւր. 9յորդւոցն Քեբրոնի՝ Եղիէլ իշխան, եւ եղբարք նորա ութսուն. 10յորդւոցն Ոզիելի՝ Ամինադաբ իշխան, եւ եղբարք նորա հարեւր եւ երկոտասան։

11Եւ կոչեաց Դաւիթ զՍադովկ եւ զԱբիաթար, զքահանայսն եւ զՂեւտացիսն, զՈւրիէլ եւ զԱսայիաս եւ զՅովէլ եւ զՍամայիաս եւ զԵղիէլ եւ զԱմինադաբ, 12եւ ասէ ցնոսա. Դուք էք իշխան տոհմից Ղեւտացւոց, դուք սրբեցարուք եւ եղբարք ձեր, եւ հանէք զտապանակն Աստուծոյ Իսրայելի ի տեղին զոր պատրաստեցի նմա։ 13Ո՞չ ապաքէն՝՝ զի ոչ էիք դուք յառաջ, խրամատեաց Աստուած ձեր՝՝ ի մեզ, վասն զի ոչ խնդրեցաք իրաւամբք զնա։ 14Եւ սրբեցան քահանայքն եւ Ղեւտացիք բերել զտապանակն Աստուծոյ Իսրայելի։ 15Եւ առին որդիք Ղեւտացւոցն զտապանակն Աստուծոյ, որպէս եւ պատուիրեաց Մովսէս բանիւ Աստուծոյ ըստ գրոց, բառնալեօքն ի վերայ ուսոց իւրեանց։

16Եւ ասէ Դաւիթ ցիշխանս Ղեւտացւոցն. Կացուցէք զեղբարսն ձեր որք երգեն զսաղմոսս՝ նուագարանօք երգոցն, քնարօք եւ սրնգօք եւ ծնծղայիւք, ամբառնալ զձայնս ի բարձունս ուրախութեան ձայնիւ։ 17Եւ կացուցին Ղեւտացիքն զԵման որդի Յովելի, եւ յեղբարց նորա զԱսափ որդի Բարաքեայ, եւ յորդւոցն Մերարեայ յեղբարցն նորա զԵթան որդի Կիսեայ։ 18Եւ ընդ նոսա եղբարքն իւրեանց երկրորդք, Զաքարիա, եւ Յովէլ՝՝ եւ Սամիրամովթ եւ Յեքիէլ եւ Անանիաս եւ Եղիաբ եւ Բանեա եւ Մասիաս եւ Մատաթիաս եւ Եղիաբաղա եւ Մակէդիաս եւ Աբդեդովմ եւ Յեէլ եւ Ոզիաս՝՝ դռնապանքն։ 19Եւ սաղմոսանուագքն՝ Եման եւ Ասափ եւ Եթան տաւղօք պղնձեօք, լսելի առնել զձայնն։ 20Զաքարիաս եւ Ոզիէլ եւ Սամիրամովթ եւ Եքիէլ եւ Անանիաս եւ Եղիաբ եւ Մասիաս եւ Բանեա՝ քնարօք, եւ Աղեմովթ՝՝, 21եւ Մատաթիաս եւ Եղիփաղէտ եւ Մակենիա եւ Աբդեդովմ եւ Յեէլ եւ Ոզիաս՝ սրնգօք. Սենեթիաս՝ զօրացուցանել՝՝. 22եւ Քոնենիաս իշխան Ղեւտացւոցն՝ իշխան ի վերայ երգոցն, վասն զի էր հանճարեղ։ 23Եւ Բարաքիաս եւ Եղկանա՝ դռնապանք տապանակին։ 24Եւ Սովբենիաս եւ Յովսափատ եւ Նաթանիէլ եւ Ամեսայի եւ Զաքարիաս եւ Բանեա եւ Եղիազար, քահանայքն յուսացեալք փողովք՝՝ առաջի տապանակին Աստուծոյ. եւ Աբդեդովմ եւ Յէիաս՝ դռնապանք տապանակին Աստուծոյ։

25Եւ Դաւիթ եւ ծերքն Իսրայելի եւ հազարապետք երթային հանել զտապանակ ուխտին Տեառն ի տանէն Աբեդդարայ ուրախութեամբ։ 26Եւ եղեւ ի զօրացուցանելն Աստուծոյ զիշխանսն որ բարձին զտապանակ ուխտին Տեառն, զենին եւթն զուարակս եւ եւթն խոյս։ 27Եւ Դաւիթ զգեցեալ էր պատմուճան բեհեզեղէն. եւ ամենայն Ղեւտացիքն բարձին զտապանակ ուխտին Տեառն, եւ սաղմոսանուագքն, եւ Քոնենիաս էր իշխան երգոցն որք՝՝ նուագէին. եւ Դաւիթ զգեցեալ պատմուճան բեհեզեղէն։ 28Եւ ամենայն Իսրայէլ հանին զտապանակ ուխտին Տեառն հռչակաւ, ձայնիւ յոբելեաւն, եւ փողով եւ ծնծղայիւք նուագելով քնարօք եւ տաւղօք։ 29Եւ եղեւ մինչդեռ տապանկն Աստուծոյ գայր ի քաղաքն Դաւթի, եւ Մեղքող դուստր Սաւուղայ կարկառեալ ընդ պատուհանն՝ ետես զարքայ Դաւիթ զի կաքաւէր եւ խաղայր, եւ անգոսնեաց զնա ի միտս իւր։