1Եւ առաքեաց Քիրամ արքայ Տիւրոսի հրեշտակս առ Դաւիթ, եւ փայտս մայրս, եւ շինօղս որմոց եւ հիւսունս փայտից՝ շինել նմա տուն։ 2Եւ ծանեաւ Դաւիթ եթէ պատրաստեաց զնա Տէր՝՝ ի վերայ Իսրայելի. վասն զի աճեաց ի բարձրութիւն թագաւորութիւն նորա, վասն ժողովրդեան իւրոյ Իսրայելի։

3Եւ ա՛ռ Դաւիթ այլ եւս կանայս յԵրուսաղէմ, եւ ծնան նմա այլ եւս ուստերք եւ դստերք։ 4Եւ այսոքիկ են անուանք նոցա որք ծնան նմա եւ էին նորա՝՝ յԵրուսաղէմ. Սամաաս եւ Սոբաբ, Նաթան եւ Սողոմոն 5եւ Յեբաար եւ Եղիսաւ եւ Եղիփաղէտ 6եւ Նագեթ եւ Նափատ եւ Յափիէ 7եւ Եղիսամա եւ Բաղիադա եւ Եղիփաղէտ։

8Եւ լուան այլազգիքն եթէ օծաւ Դաւիթ թագաւոր ի վերայ ամենայն Իսրայելի, եւ ելին ամենայն այլազգիքն խնդրել զԴաւիթ. լուաւ Դաւիթ եւ ել ընդ առաջ նոցա։ 9Եւ այլազգիքն եկին, եւ հանդիպեցան միմեանց՝՝ ի հովտին Սկայից։ 10Եւ եհարց Դաւիթ ցԱստուած եւ ասէ, եթէ՝ Ելի՞ց ի վերայ այլազգեացն, եւ տացե՞ս զնոսա ի ձեռս իմ։ Եւ ասէ ցնա Տէր. Ել, եւ տաց զնոսա ի ձեռս քո։ 11Եւ ել Դաւիթ ի Բաաղփարասիմ, եւ եհար զնոսա Դաւիթ. եւ ասէ Դաւիթ. Խրամատեաց Աստուած զթշնամիս իմ ձեռամբ իմով, իբրեւ զխրամատութիւն ջրոյ։ Յաղագս այնորիկ կոչեաց զանուն տեղւոյն այնորիկ Խրամատութիւն Փարասինայ՝՝։ 12Եւ թողին անդ զաստուածս իւրեանց. եւ ասաց Դաւիթ այրել զնոսա հրով։

13Եւ յաւելին այլ եւս այլազգիքն եւ հանդիպեցան ի հովտին Սկայից։ 14Եւ եհարց Դաւիթ դարձեալ զԱստուած. եւ ասաց ցնա Աստուած. Ոչ երթիցես զկնի նոցա. դարձիր ի նոցանէ, եւ թողցես զնոսա մերձ ի տանձիսն՝՝։ 15Եւ եղիցի ի լսել քո զձայն շարժման ծայրից տանձեացն, յայնժամ ելցես ի պատերազմել, վասն զի ելցէ Աստուած առաջի քո հարկանել զբանակ այլազգեացն։ 16Եւ արար որպէս պատուիրեաց նմա Աստուած, եւ եհար զբանակ այլազգեացն ի Գաբաւոնէ մինչեւ ի Գազերա։ 17Եւ եղեւ անուն Դաւթի յամենայն երկրի, եւ Տէր ետ զերկիւղ նորա ի վերայ ամենայն ազգաց։