1Եւ եկն ամենայն Իսրայէլ առ Դաւիթ ի Քեբրոն եւ ասեն. Ահաւասիկ ոսկերք քո եւ մարմինք քո եմք։ 2Եւ յերէկն եւ յեռանդ, մինչ էր Սաւուղ արքայ, դու էիր որ հանէիր եւ մուծանէիր զԻսրայէլ. եւ ասաց Տէր Աստուած քո ցքեզ. Դու հովուեսցես ժողովրդեան իմում Իսրայելի, եւ դու լիցիս առաջնորդ ի վերայ Իսրայելի։ 3Եւ եկին ամենայն ծերքն Իսրայելի առ արքայ ի Քեբրոն, եւ եդ արքայ Դաւիթ ուխտ ընդ նոսա ի Քեբրոն առաջի Տեառն. եւ օծին զԴաւիթ թագաւոր ի վերայ Իսրայելի, ըստ բանին Տեառն զոր խօսեցաւ ի ձեռն Սամուելի։

4Եւ գնաց արքայ եւ արք նորա՝՝ յԵրուսաղէմ, որ է Յեբուս, եւ անդ Յեբուսացիքն բնակէին յերկրին։ 5Եւ ասեն բնակիչքն Յեբուսայ ցԴաւիթ. Ոչ մտցես դու այսր։ Եւ առ զամրոցն Սիոնի, այն է քաղաք Դաւթի։ 6Եւ ասէ Դաւիթ. Ամենայն որ հարցէ զՅեբուսացին յառաջագոյն, եղիցի իշխան եւ զօրավար։ Եւ ել յառաջ ի վերայ նորա Յովաբ որդի Շարուհեայ, եւ եղեւ իշխան։ 7Եւ նստաւ Դաւիթ յամրոցին, վասն այնորիկ կոչեաց զնա քաղաք Դաւթի։ 8Եւ շինեաց զքաղաքն շուրջանակի, եւ պատերազմեցաւ եւ առ զքաղաքն՝՝։ 9Եւ երթայր Դաւիթ երթալով եւ մեծանայր, եւ Տէր ամենակալ էր ընդ նմա։

10Եւ սոքա իշխանք էին զօրացն Դաւթի, որք զօրանային ընդ նմա ի թագաւորութեան նորա, ընդ ամենայն Իսրայելի, որք թագաւորեցուցանէին զնա ըստ բանին Տեառն ի վերայ Իսրայելի։ 11Եւ այս թիւ զօրաւորացն Դաւթի. Իզբաամ որդի Աքամանի, առաջին յերիցն. նա ձգեաց զսուրն իւր միանգամ ի վերայ երեք հարեւր վիրաւորացն՝՝ ի միում ժամանակի։

12Եւ յետ նորա Եղիազար որդի Դովդայի Աքուքացւոյ. նա յերիս զօրաւորսն էր ընդ Դաւթայ ի Փասասոդոմին։ 13Եւ՝՝ այլազգիքն ժողովեցան անդր ի պատերազմ. եւ էր մասն ինչ անդաստանին լի գարեաւ, եւ զօրն փախեաւ յերեսաց այլազգեացն։ 14Եւ եկաց ի մէջ մասինն եւ պահեաց՝՝ զնա. եւ հարին զայլազգիսն, եւ արար Տէր փրկութին մեծ։

15Եւ իջին երեք յերեսուն իշխանացն ի վէմն առ Դաւիթ յայրն Ոդողոմայ. եւ բանակ այլազգեացն էր բանակեալ ի հովտին Սկայից։ 16Եւ Դաւիթ յայնժամ էր յամրոցին, եւ զօր այլազգեացն էր յայնժամ ի Բեթղեհեմ։ 17Եւ ցանկացաւ Դաւիթ եւ ասէ. Ո՞ արբուցանէր ինձ ջուր ի ջրհորոյն Բեթղեհեմի որ առ դրանն է։ 18Եւ պատառեցին երեքն զբանակ այլազգեացն, եւ հանին ջուր ի ջրհորոյն Բեթղեհեմի որ է առ դրանն, եւ առին եւ եկին առ Դաւիթ. եւ ոչ կամեցաւ Դաւիթ ըմպել զայն, եւ նուիրեաց զայն Տեառն, 19եւ ասէ. Քաւիչ լիցի ինձ Աստուած՝՝ առնել զբանդ զայդ, եթէ զարիւն արանցդ այդոցիկ արբից յանձինս իւրեանց. վասն զի ոգւովքն իւրեանց բերին զայդ։ Եւ ոչ կամեցաւ ըմպել զայն. զայս արարին երեք զօրաւորքն։

20Եւ Աբեսսա եղբայր Յովաբու էր իշխան երիցն. նա ձգեաց զսուրն ի վերայ վեց հարեւր վիրաւորացն ի միում ժամանակի՝՝. 21եւ նա էր անուանի ի մէջ երիցն ի վերայ նոցա՝՝, քան զերկուսն փառաւորագոյն, եւ էր նոցա իշխան, եւ մինչ յերիսն ոչ ժամանէր։

22Եւ Բանեա որդի Յովիդայեայ, որդի առն զօրաւորի. բազում էին գործք նորա ի Կաբեսեղայ. նա եհար զերկուս որդիսն Արիել Բանեայ՝՝. եւ նա էջ եւ եհար զառեւծն ի մէջ գբին յաւուր ձեան։ 23Նա եհար զայրն Եգիպտացի զայր երեւելի հինգկանգնեան, եւ ի ձեռն Եգիպտացւոյն նիզակ իբրեւ զստորի ոստայնանկաց. եւ էջ առ նա Բանեա բրաւ, եւ եհան ի ձեռանէ Եգիպտացւոյն զնիզակն, եւ սպան զնա նիզակաւն նորին։ 24Զայս արար Բանեա որդի Յովիդայեայ. եւ անուն նորա ի մէջ երից զօրաւորաց. 25քան զերիսն փառաւորագոյն, եւ առ երիսն ոչ ժամանէր. եւ կացոյց զնա Դաւիթ ի վերայ տոհմին իւրոյ։

26Եւ սոքա էին զօրաւորք զօրացն. Ասայէլ եղբայր Յովաբայ, Եղէանան որդի Դովդայի ի Բեթղեհեմէ, 27Սամովթ Արովրացի, Գեղէս Փաղովնացի, 28Ովրէ որդի Թեկուացւոյն՝՝, Աբիեզեր Անաթովթացի, 29Սովբաք Ասովթացի, Եղիաք Ովնացի, 30Մովարէ Նետոփաթացի, Եղեադ որդի Բաանայ Նետոփաթացւոյ, 31Եթայի որդի Հռեփայի ի բլրոյն Բենիամինի. Բանեա Փարաթոնացի, 32Ուրի ի Նեքեղայ, Գաասաբիէլ Սարափթացի՝՝։ 33Աղամովթ Բարումացի, Եղիաբա Սաղաբոնացի, 34որդի Ասամայ Գովթնացւոյ՝ Յովնաթան որդի Սադէի Արարացւոյ, 35Աքիամ որդի Սաքարայ Արարացւոյ, Եղիբաաղ որդի Ովրայ, 36Ոփեր Մեքուրաթացի, Աքիա Փեղոնացի, 37Ասարա Կարմեղացի, Նոարէ որդի Ասբեայ, 38Յովէլ եղբայր Նաթանայ, Մաբար որդի Ագարայ, 39Սեղեկ Ամոնացի, Նաար Աբերոնացի՝ կապարճակիր Յովաբայ որդւոյ Շարուհեայ, 40Իրաս Ուրեթացի, Գարեբ Յեթերացի, 41Ուրիաս Քետացի, Զաբադ որդի Աղայեայ 42որդւոյ Սեղքայ ի Ռուբենայ, իշխան ի վերայ երեսնիցն՝՝, 43Անան որդի Մաաքայ, Յովսափատ Մատթանացի, 44Ոզիաս Աստարովթացի, Սամաա եւ Յեւեղ որդիք Քովթանացւոյն Արարացիք, 45Յեդիէլ որդի Սամարեայ եւ Յովազա եղբայր նորա, Թովսացիք, 46Յեղիէլ Մաովնացի, Այիրաբ եւ Յովսէ որդի նորա, Եղնամացիք՝՝, Յեթեմա Մովաբացի, Յեղիէլ եւ Ոբէդ եւ Յասիէլ Մովսաբացի։