1Ո՛րդեակ՝ մի՛ չար գործեր, եւ չար ո՛չ հասցէ քեզ: 2Յանիրաւաց ՚ի բա՛ց լեր, եւ նոքա մերժեսցին ՚ի քէն: 3Յակօսս անիրաւ մի՛ սերմաներ, զի մի՛ հնձեսցես եւթնապատիկ չար ՚ի նմանէ: 4Իշխանութիւն ՚ի Տեառնէ մի՛ խնդրեր, եթէ ո՛չ գնասցես ըստ կամաց նորա: Զաթոռ փառաց ՚ի թագաւորէ մի՛ խնդրեր, եթէ հպատակ հնազանդ ո՛չ իցես կամաց նորա: 5Առաջի թագաւորաց ձեւ բանից մի՛ առներ: 6Դատաւոր մի՛ զքեզ կամիր, եթէ ո՛չ կարես կորզել զիրաւն յանիրաւէն: Մի՛ զանգիտեր դու յերեսաց իշխանին, զի մի՛ դնիցես գայթագղութիւն յիրաւունս: 7՚Ի բազմութիւն քաղաքաց մի՛ մեղանչեր, եւ յամբոխ զանձն քո մի՛ տացես: 9Յաղօթս քո կարճամիտ մի՛ լինիր, եւ ողորմութիւն մի՛ յապաղեր առնել: Զպատուիրանս Աստուծոյ մի՛ յամեր առնել. 12եւ զմարդով ՚ի դառնութիւն սրտի նորա մի՛ ծիծաղիր: Զի որ խոնարհեցուցանէ՝ նոյն եւ բարձր առնէ: 13Ո՛րդեակ՝ յեղբարս եւ ՚ի բարեկամս ստութիւն մի՛ սերմաներ. 15՚ի մէջ ծերոց մի՛ ճոխանար, եւ յուխտի քում զբանս մի՛ կրկներ: 17Առ արդարս զանձն քո մի՛ ունիր, եւ առ մեղաւորս անզեղջ զքեզ մի՛ համարիր: 19Դահիճ ամբարշտաց եւ մեղաւորաց՝ յաւիտենից հուրն եւ որդն անմահ: 20Ո՛րդեակ՝ զբարեկամս ընդ կաշառոյ մի՛ փոխանակեր, եւ զեղբայր հարազատ ընդ ոսկւոյ Սափիրայ: 21Մի՛ վրիպեր ՚ի բարեկամէ եւ ՚ի հանճարեղ կնոջէ, զի լաւ է շնորհք նորա քան զոսկի: 22Զծառայ ճշմարիտ որ վաստակիցէ քեզ՝ մի՛ զայրացուսցես: Եւ զվարձկան որ տուեալ իցէ զանձն իւր ՚ի վերայ քո՝ մի՛ զզուեր: 23Զծառայ ժիր սիրեա՛ դու, եւ յազատութենէ կարօտ զնա մի՛ առներ: 24Գրաստ քո իցէ պիտանի՝ խնամ տա՛ր նմա եւ դարմանեա՛: 25Որդիք իցեն քո՝ խրատեա՛, եւ զպարանոց նոցա խոնարհեցո՛: 26Դստերք իցեն քո՝ զգո՛յշ կաց, եւ մի՛ գգուեր զնոսա եւ համարձակեցուցաներ: 27Առն իմաստնոյ տո՛ւր զնոսա, եւ քո գործ մեծ գտանի կատարեալ: 28Եթէ ըստ կամաց քոց իցէ կին՝ մի՛ հաներ զնա ՚ի քէն, եւ զքեզ ՚ի նա մի՛ հաւատար՝ եթէ նա զքեզ ատիցէ: 29Ո՛րդեակ՝ զհայր քո պատուեսջիր յամենայն զօրութենէ, եւ զմօր երկունս մի՛ մոռանար. 30հատո՛ նոցա որպէս նոքա քեզ, զի նոքօք ծնար: 31Երկի՛ր ՚ի Տեառնէ յամենայն սրտէ քումմէ, եւ մեծարեա՛ զքահանայս նորա: 32Սիրեա՛ զարարիչն քո, եւ զպաշտօնեայս նորա մի՛ արհամարհեր: 33Պատուեա՛ զքահանայս, եւ տո՛ւր զմասն նոցա զլերդաբոյդն եւ զերիկամունսն ճարպովն: 36Բարի արա՛ աղքատաց, զի օրհնութիւն քո կատարեալ լիցի: 38՚Ի վերայ մեռելոց մի՛ կարօտ առներ զարտասուս քո, 40եւ վախճան քո յուշ լիցի քեզ: