Սաղմոս ՚ի Դաւիթ. չորեքշաբաթու. ՂԳ։

Սաղմոս ՚ի Դաւիթ. չորեքշաբաթու. ՂԳ։ [776]

1Աստուած վրէժխնդիր, Տէր Աստուած վրէժխնդի՛ր յայտնեցար։ 2Բա՛րձր լեր որ դատիս զերկիր, հատո՛ զհատուցումն ամբարտաւանից։ 3Մինչեւ յե՞րբ մեղաւորք Տէր, մինչեւ յե՞րբ մեղաւորք պարծեսցին։ 4Բարբառեալ խօսեսցին զանիրաւութիւն, խօսեսցին ամենեքեան որ գործեն զանօրէնութիւն։ 5Զժողովուրդ քո Տէր խոնարհ արարին, եւ զժառանգութիւն քո չարչարեցին։ 6Զայրին եւ զպանդուխտն սպանին զորբսն կոտորեցին, 7եւ ասացին ո՛չ տեսանէ զայս Տէր, եւ ո՛չ ՚ի միտ առնու Աստուած Յակոբայ։ 8Իմացարո՛ւք անզգամք ժողովրդեան, եւ անմիտք մինչեւ յե՞րբ ո՛չ առնուք ՚ի միտ։ 9Որպէս զի թէ որ տնկեաց զունկն՝ ինքն ո՞չ լուիցէ, կամ որ ստեղծ զակն՝ ինքն ո՞չ տեսանիցէ։ 10Որ խրատէն զազինս որպէս թէ ո՛չ յանդիմանեսցէ. ո՛ ուսուցանէ մարդոյ գիտութիւն. 11Տէր ճանաչէ զխորհուրդս մարդկան զի են ընդունայն։ 12Երանի՛ մարդոյ զոր խրատես դու Տէր, եւ յօրինաց քոց ուսուցանես դու նմա։ 13Ցածուցանես դու նմա զաւուրս չարութեան, մինչեւ փորեսցի՛ խորխորատ մեղաւորի։ 14Ո՛չ մերժէ Տէր զժողովուրդ իւր, եւ զժառանգութիւն իւր ո՛չ առնէ անտես։ 15Մինչեւ դարձցին իրաւունք յարդարութիւն. ընկալցի՛ն զնա ամենեքեան ոյք ուղիղ են սրտիւք։ 16Ո՛ յարիցէ ընդ իս ՚ի վերայ չարաց, կամ ո՛ հաւասարեսցէ ինձ ՚ի վերայ այնոցիկ որ գործեն զանօրէնութիւն։ 17Թէ ո՛չ Տեառն օգնեալ էր ինձ, փոքր միւս եւս եւ բնակեալ էր անձն իմ ՚ի դժոխս։ 18Եթէ ասէի թէ ահա սասանեցան ոտք իմ, ողորմութիւն քո Տէր օգնէր ինձ։ 19Ըստ բազում ցաւոց սրտի իմոյ, մխիթարութիւն քո ուրախ առնէր զանձն իմ։ 20Մի՛ հաւասարեսցէ քեզ աթոռ անօրէնութեան, ո՛ պատճառէ զվաստակս ընդդէ՛մ հրամանի։ 21Որսացան զանձն արդարոյ, եւ զարիւն անբիծ պարտաւո՛ր առնէին։ 22Եղեւ Տէր ապաւէն իմ, Աստուած օգնական յուսոյ իմոյ։ 23Հատուսցէ նոցա Տէր ըստ անօրէնութեան նոցա, ըստ չարութեան նոցա կործանեսցէ զնոսա Տէր Աստուած մեր։ Տունք. իա։