2Տէր Աստուած իմ ՚ի քեզ յուսացայ եւ փրկեա՛ զիս, յամենայն հալածչաց իմոց ապրեցո՛ զիս։ 3Գուցէ երբէք յափշտակիցէ որպէս առե՛ւծ զանձն իմ, ո՛չ ոք իցէ որ փրկիցէ, եւ ո՛չ այն որ ապրեցուցանէ։ 4Տէր Աստուած իմ թէ արարից զայս, թէ իցեն անօրէնութիւնք ՚ի ձեռս իմ։ 5Թէ հատուցի՛ երբէք այնոցիկ ոյք հատուցին ինձ չար. անկա՛յց եւ ես ՚ի թշնամեաց իմոց ընդունայն։ 6Հալածեսցէ՛ ապա թշնամին զանձն իմ. հասցէ՛ կոխեսցէ յերկիր զկեանս իմ, եւ զփառս իմ ՚ի հո՛ղ բնակեցուսցէ։ 7Արի՛ Տէր բարկութեամբ քով, եւ բա՛րձր լեր ՚ի սպառել թշնամեաց իմոց։ Զարթի՛ր Տէր Աստուած իմ ՚ի հրամանս քո զոր պատուիրեցեր, 8եւ ժողովք ժողովրդոց շո՛ւրջ եղիցին զքեւ։ Վասն այսորիկ ՚ի բարձունս դա՛րձ Տէր. 9եւ Տէր դատի զժողովուրդս իւր։ Դա՛տ արա ինձ Տէր ըստ արդարութեան իմում. ըստ անբծութեան իմում որ յիս։ 10Կատարեսցի՛ն չարիք ՚ի վերայ մեղաւորաց, եւ յաջողեսցե՛ս դու արդարոյն։ Որ քննէ զսիրտս եւ զերիկամունս Աստուած արդար. յիրաւի՛ է 11օգնութիւն ինձ յԱստուծոյ՝ որ ապրեցուցանէ զայնոսիկ, որ ուղիղ են սրտիւք։ 12Աստուած դատաւոր արդա՛ր հզօր եւ երկայնամիտ. որ ո՛չ ածէ զբարկութիւն իւր զօրհանապազ։ 13Ապա թէ ո՛չ դառնայ առ նա՝ զսուր իւր սրեալ է՝ եւ զաղեղն իւր լարեալ. 14՚ի նմա է պատրաստեալ զանօթս մահու, եւ զնետս իւր այրեցելո՛վք է գործեալ։ 15Ահաւասիկ երկնեաց զանօրէնութիւն, յղացաւ զցա՛ւս եւ ծնաւ զանօրէնութիւն։ 16Գուբն՝ զոր փորեաց եւ պեղեաց, ՚ի նո՛յն անկցի ՚ի խորխորատ զոր եւ գործեաց։ 17Դարձցին ցաւք ՚ի գլուխ նորա. ՚ի վերայ գագաթա՛ն նորա անօրէնութիւնք իւր իջցեն։ 18Խոստովան եղէց Տեառն ըստ արդարութեան նորա, եւ սաղմոս ասացից անուան Տեառն բարձրելոյ։ Տունք. ժէ։