՚Ի Հեբրայեցւոց գրոց երկոքեան սոքա ընդ մի համար են։ Սաղմոս. Բ։

՚Ի Հեբրայեցւոց գրոց երկոքեան սոքա ընդ մի համար են։ Սաղմոս. Բ։ [5]

1Ընդէ՞ր խռովեցան հեթանոսք. եւ ժողովուրդք խորհեցան ՚ի սնոտիս։ 2Յանդիմա՛ն եղեն թագաւորք երկրի, եւ իշխանք ժողովեցան ՚ի միասին վասն Տեառն եւ վասն Օծելոյ նորա։ 3Խզեսցուք զկապանս նոցա, եւ ընկեսցո՛ւք ՚ի մէնջ զլուծ նոցա։ 4Բնակեալն յերկինս ծիծաղեսցի զնոքօք, եւ Տէր արհամարհեսցէ զնոսա։ 5Յայնժամ խօսեսցի՛ ընդ նոսա բարկութեամբ իւրով, եւ սրտմտութեամբ իւրով խռովեցուսցէ զնոսա։ 6Ես կացի թագաւոր ՚ի նմանէ, ՚ի վերայ Սիոնի լերին սրբոյ նորա՝ պատմել ինձ զհրամանս Տեառն։ 7Տէր ասաց ցիս Որդի իմ ես դու, ես այսօր ծնա՛յ զքեզ։ 8Խնդրեա՛ յինէն եւ տա՛ց քեզ զհեթանոսս ՚ի ժառանգութիւն, եւ իշխանութիւն քեզ զամենայն ծա՛գս երկրի։ 9Հովուեսցե՛ս զնոսա գաւազանաւ երկաթեաւ. որպէս զանօթ բրտի փշրեսցե՛ս զնոսա։ 10Արդ թա՛գաւորք՝ զայս ՚ի մի՛տ առէք, խրատեցարո՛ւք ամենեքեան ոյք դատիք զերկիր։ 11Ծառայեցէ՛ք Տեառն երկիւղի՛ւ, եւ ցնծացէ՛ք առաջի նորա դողութեամբ։ 12Ընկալարո՛ւք զխրատ նորա՝ զի մի՛ բարկասցի Տէր, եւ կորնչիցիք ՚ի ճանապարհացն արդարութեան։ 13՚Ի ժամանակի որպէս բորբոքեսցի բարկութիւն նորա։ Երանի՛ ամենեցուն՝ ոյք յուսացեալ են ՚ի Տէր։ Տունք. ժդ։