Ալէլուիա. Անգեայ եւ Զաքարիայ. ՃԽԹ։

1Օրհնեցէ՛ք զՏէր յօրհնութիւն նոր, օրհնութիւն նմա յեկեղեցիս սրբոց։ 2Ուրախ եղեւ Իսրայէլ յԱրարիչ իւր, որդիք Սիովնի ցնծասցեն ՚ի Թագաւորն իւրեանց։ 3Օրհնեսցեն զանուն նորա օրհնութեամբ, սաղմոսիւք եւ օրհնութեամբ սաղմո՛ս ասասցեն նմա։ 4Հաճի Տէր ընդ ժողովուրդս իւր սուրբ, եւ բարձր առնէ զհեզս ՚ի փրկութեան։ 5Պարծեսցին սուրբքն փառօք, եւ ցնծասցեն ՚ի հանգիստ իւրեանց, 6եւ բարձր արասցեն զԱստուած բերանովք իւրեանց։ Սուրք երկսայրիք են ՚ի ձեռս նոցա, 7առնուլ հատուցումն ՚ի հեթանոսաց, յանդիմանութիւն ամենայն ժողովրդոց։ 8Կապել զթագաւորս նոցա կապանօք, զզօրաւորս նոցա ձեռակապաւ երկաթեաւ։ 9Առնել ՚ի նոսա զդատաստանն գրեալ. փառք ա՛յս են յամենայն սրբոց նորա։ Տունք. ը։