Օրհնութեանց Սաղմոս ՚ի Դաւիթ. ՃԽԴ։

ալեփ

1։ Բարձր առնեմ զքեզ Աստուած իմ եւ Թագաւոր իմ, եւ օրհնեմ զանուն քո յաւիտեան՝ եւ յաւիտեանս յաւիտենից։ 2Զօ՛րհանապազ օրհնեցից զքեզ, եւ գովեցից զանուն քո յաւիտեան եւ յաւիտեանս յաւիտենից։

գամէղ

3Մեծ է Տէր եւ օրհնեալ է յոյժ, եւ մեծութեան նորա ո՛չ գոյ չափ։

տալեթ

4Ազգք եւ ազգք գովեսցեն զգործս քո, եւ զզօրութիւնս քո պատմեսցեն։ 5Զմեծվայելչութիւն փառաց սրբութեան քոյ խօսեսցին, եւ զսքանչելիս քո պատմեսցեն։ 6Զզօրութիւն ահի քոյ ասասցեն, եւ զմեծութիւնս քո պատմեսցեն։ 7Զյիշատակ բազում քաղցրութեան քո բղխեսցեն, եւ արդարութեամբ քով ցնծասցեն։ 8։ Գթած ողորմած է Տէր, երկայնամիտ եւ բազումողորմ։ 9Քաղցր է Տէր առ ամենեսեան, եւ գթութիւն նորա ՚ի վերայ ամենայն արարածոց իւրոց։ 10Խոստովան եղիցին առ քեզ Տէր ամենայն գործք քո, եւ սուրբք քո օրհնեսցեն զքեզ։ 11։ Զփառս արքայութեան քոյ ասասցեն, եւ զզօրութիւնս քո պատմեսցեն։

ղամէք

12Ճանաչել որդւոց մարդկան զզօրութիւն քո, զփառս մեծվայելչութիւն արքայութեան քոյ։ 13Արքայութիւն քոյ արքայութիւն ամենայն յաւիտենից. եւ տէրութիւն քոյ ազգէ մինչեւ յազգ։ նուն Հաւատարիմ է Տէր յամենայն ՚ի բանս իւր, եւ արդա՛ր է յամենայն ՚ի գործս իւր։

սամքաթ

14Հաստատէ Տէր զամենայն գայթագղեալս, եւ կանգնէ զամենայն գլորեալս։ 15Աչք ամենեցուն ՚ի քեզ յուսան, եւ դու տաս կերակուր նոցա ՚ի ժամու։ Տաս դու նոցա եւ կերակրին, 16բանաս զձեռն քո, լցուցանես զամենեսեան քաղցրութեամբ կամօք քովք։

ծադէ

17Արդա՛ր է Տէր յամենայն ճանապարհս իւր, եւ սուրբ է յամենայն ՚ի գործս իւր։ 18Մերձ է Տէր առ ամենեսեան ոյք կարդան առ նա, առ ամենեսեան ոյք կարդան առ նա ճշմարտութեամբ։ 19Զկամս երկիւղածաց իւրոց առնէ Տէր. աղօթից նոցա լսէ եւ կեցուցանէ զնոսա։ 20Պահէ Տէր զամենեսեան ոյք սիրեն զնա, եւ զամենայն մեղաւորս սատակէ Տէր։ 21Զօրհնութիւնս Տեառն խօսեսցի բերան իմ. օրհնեսցէ ամենայն կենդանի զանուն սուրբ նորա յաւիտեան, եւ յաւիտեանս յաւիտենից։ Տունք. իբ։ Գոբղայս. ծբ։