1Եւ եղեւ յետ աւուրցն բազմաց, յե՛տ հանգուցանելոյ Տեառն զԻսրայէլ յամենայն թշնամեաց նոցա շուրջանակի. եւ Յեսու ծերացեա՛լ եւ անցեալ զաւուրբք։ 2Կոչեա՛ց Յեսու միանգամայն զամենայն որդիսն Իսրայէլի, եւ զծերակո՛յտս նոցա, եւ զիշխանս նոցա, եւ զդատաւորս նոցա, եւ զդպիրս նոցա, եւ ասէ ցնոսա. Ես ծերացայ եւ անցի՛ զաւուրբք. 3եւ դուք ձեզէ՛ն տեսէք զամենայն զոր արար Տէր Աստուած մեր ընդ ամենայն ազգսն՝ զոր եբարձ յերեսաց ձերոց. զի Տէր Աստուած ինքնի՛ն տայր պատերազմ ընդ ձեր։ 4Եւ արդ տեսէ՛ք՝ զի թողի ձեզ զազգսն զմնացեալսն զայնոսիկ ՚ի ժառանգութիւն ըստ ցեղից ձերոց, ՚ի Յորդանանէ զամենայն ազգսն՝ զոր սատակեցին ՚ի ծովէն մեծէ՝ որ զատուցանէ՛ ՚ի մտիցն արեւու։ 5Արդ՝ Տէր Աստուած մեր նա՛ սատակեսցէ զնոսա յերեսաց ձերոց մինչեւ կորիցեն. եւ արձակեսցէ՛ ՚ի վերայ նոցա զգազանս վայրենիս՝ մինչեւ սատակեսցէ զնոսա, եւ զթագաւորս նոցա յերեսաց ձերոց. եւ ժառանգեսջի՛ք զերկիր նոցա՝ որպէս խօսեցաւ Տէր Աստուած մեր ընդ մեզ։ 6Արդ զօրացարո՛ւք յոյժ զգուշանալ եւ առնե՛լ զամենայն գրեալս ՚ի գիրս օրինացն Մովսիսի. զի մի՛ խոտորիցիք ՚ի նմանէ յաջ կամ յահեակ. 7գուցէ՛ մտանիցէք յազգսն մնացեալս յայնոսիկ. եւ անուանք դից նոցա մի՛ անուանեսցի ՚ի միջի ձերում. մի՛ երդնուցուք ՚ի նոսա, եւ մի՛ պաշտիցէք զնոսա, եւ մի՛ երկիր պագանիցէք նոցա. 8այլ զհետ Տեառն Աստուծոյ մերոյ երթիջիք՝ որպէս արարէք մինչեւ ցայսօր. 9եւ սատակեաց զնոսա Տէր յերեսաց ձերոց, զազգս մեծամեծս եւ զհզօրս. եւ ո՛չ ոք եկաց ընդդէմ ձեր մինչեւ ցայսօր։ 10Մի ՚ի ձէնջ հալածեաց զհազարս. զի Տէր Աստուած ինքնի՛ն տայր պատերազմ ընդ ձեր, որպէս խօսեցաւ ընդ ձեզ։ 11Զգո՛յշ լինիջիք յոյժ անձանց ձերոց, սիրե՛լ զՏէր Աստուած ձեր։ 12Ապա թէ դառնալո՛վ դառնայցէք, եւ յաւելուցուք յազգսն մնացեալս ՚ի ձէնջ, եւ խնամութիւնս առնիցէք ընդ նոսա, եւ խառնակիցիք դուք ընդ նոսա, եւ նոքա՛ ընդ ձեզ. 13գիտելո՛վ գիտասջիք, զի ո՛չ եւս յաւելուցու Տէր սատակել զազգսն զայնոսիկ յերեսաց ձերոց. եւ լինիցին ձեզ յորոգայթս եւ ՚ի գայթագղութիւնս. խո՛չ ՚ի գարշապարս ձեր, եւ նե՛տք յաչս ձեր, մինչեւ կորնչիցիք յերկրէս բարութեան զոր ե՛տ ձեզ Տէր Աստուած ձեր։ 14Եւ ես՝ ահա երթա՛մ այսօր զճանապարհ որպէս ամենեքին որ են յերկրի. եւ ծանիջի՛ք յամենայն սրտէ ձերմէ եւ յամենայն անձնէ ձերմէ. զի ո՛չ վրիպեաց բա՛ն մի յամենայն բանից զոր խօսեցաւ Տէր Աստուած ձեր. այլ ամենայն ինչ ե՛կն եհաս ձեզ, եւ ո՛չ սխալեցաւ ՚ի նոցանէ բան մի։ 15Եւ եղիցի՝ զոր օրինակ եկին ՚ի վերայ ձեր ամենայն բանք բարիք զոր խօսեցաւ Տէր վասն ձեր. նոյնպէս ածցէ Տէր ՚ի վերայ ձեր զամենայն բա՛նս չարս, մինչեւ սատակեսցէ զձեզ յերկրէս բարութեան՝ զոր ետ ձեզ Տէր Աստուած ձեր, 16յանցանել ձեզ զուխտիւն Տեառն Աստուծոյ ձերոյ՝ զոր պատուիրեա՛ց ձեզ, եւ յերթալ պաշտել զաստուածս օտարս՝ եւ երկիր պագանել նոցա. եւ բարկանայցէ ձեզ Տէր, եւ կորնչիջիք վաղվաղակի յերկրէս բարութեան՝ զոր ե՛տ ձեզ Տէր։