1Եւ ասէ ցիս Տէր. Ա՛ռ դու քեզ տոմս մի նո՛ր մեծ. եւ գրեսցես ՚ի նմա՝ գրչաւ առն ճարտարի. Արագարա՛գ զաւար հարկանել՝ եւ վաղվաղակի՛ զապուռ ժողովել. քանզի հասեալ է։ 2Եւ վկա՛յս կացուսցես ինձ արս հաւատարիմս, զՈւրիա քահանայ՝ եւ զԶաքարիա որդի Բարաքեայ։ 3Եւ մերձեցայ առ կինն իմ մարգարէ, եւ յղացաւ եւ ծնաւ որդի. եւ ասէ ցիս Տէր. Կոչեա՛ զանուն նորա Արագարա՛գ կապտեսջիր՝ եւ վաղվաղակի աւա՛ր հարկանիջիր. 4քանզի մինչչեւ ծանուցեալ իցէ մանկանն կոչել զհայր կամ զմայր, առցէ զզօրութիւն Դամասկոսի, եւ զաւար Սամարեայ, յանդիման թագաւորին Ասորեստանեայց։ 5Եւ յաւե՛լ եւս խօսել ընդ իս Տէր՝ եւ ասէ. 6Փոխանակ զի ո՛չ ախորժեաց ժողովուրդդ այդ զջուրն Սելովայ՝ որ գնայ խաղաղ. ※ այլ կամեցան առնել իւրեանց թագաւորս զՌասիմ զորդին Ռոմելայ։ 7Վասն այդորիկ ահաւադիկ ածցէ Տէր ՚ի վերայ ձեր զջուր Գետոյն զհզօրն եւ զյորդ՝ զարքայն Ասորեստանի եւ զփառս նորա։ Եւ եկեսցէ՛ եւ հասցէ՛ յամենայն ձորս ձեր, եւ ճեմեսցի՛ ՚ի վերայ պարսպաց ձերոց։ 8Եւ հանցէ յերկրէդ Հրէաստանէ զայր որ կարօ՛ղ իցէ ամբառնալ զգլուխ իւր, եւ զզօրաւորն որ կարիցէ գործել ինչ. եւ եղիցի բանակ նորա լնուլ զլայնութիւն երկրիդ քո։ 9Ընդ մե՛զ Աստուած՝ գիտացէ՛ք հեթանոսք՝ եւ պարտեցարո՛ւք. լսելի՛ արարէք մինչեւ ՚ի ծագս երկրի. հզօրացեա՛լքդ պարտեցարուք։ Զի թէպէտ եւ դարձեալ զօրանայցէք՝ դարձեալ ՚ի պարտութի՛ւն մատնեսջիք։ 10Եւ զոր խորհուրդ եւ խորհիցիք՝ ցրուեսցէ՛ Տէր. եւ զոր բան եւ խօսիցիք՝ մի՛ հաստատեսցի առ ձեզ. քանզի ընդ մե՛զ Տէր Աստուած։ 11Ա՛յսպէս ասէ Տէր առ այնոսիկ որ զօրութեամբ ձեռին նորա ընդդէ՛մ դառնան ըստ գնացից ճանապարհի ժողովրդեանս այսորիկ, եւ ասեն 12թէ ո՛չ երբէք խօսիցին խստութիւն. զի ամենայն զոր ինչ խօսի ժողովուրդդ այդ՝ խստութի՛ւն է. եւ յերկիւղէ նոցա մի՛ երկնչիցիք, եւ մի՛ խռովիջիք։ 13ԶՏէր զօրութեանց զնո՛յն սուրբ արարէք, եւ նա՛ եղիցի ձեզ յերկեւղ. եւ եթէ ՚ի նա յուսացեալ իցես, 14եղիցի քեզ ՚ի սրբութիւն. եւ ոտն քո զքարի ո՛չ հարկանիցի, եւ գայթագղութիւն քեզ ո՛չ պատահիցէ։ Բայց տուն Յակովբու յորոգա՛յթ եւ ՚ի ծործո՛րս դարանակալաց Երուսաղեմի. 15վասն այնորիկ տկարասցին ՚ի նմա բազումք. անկցին եւ խորտակեսցին. եւ մերձեսցին ՚ի պաշարումն ※ մարդիկ որ ՚ի շինութեան իցեն։ 16Յայնմ ժամանակի յայտնեսցին որ կնքիցեն զօրէնս, զի մի՛ ոք ուսանիցի, 17եւ ասիցէ. Կացից մնացից Աստուծոյ որ դարձոյց զերեսս իւր ՚ի տանէն Յակովբու, եւ եղէ՛ց յուսացեալ ՚ի նա։ 18Ահաւասիկ ե՛ս եւ մանկունք իմ զոր ետ ինձ Աստուած. եւ եղիցին նշանք եւ արուեստք ՚ի վերայ տանն Իսրայէլի, ՚ի Սաբաւովթ Տեառնէ՝ որ բնակեալ է ՚ի լերին Սիովնի։ 19Եւ եթէ ասիցեն ցձեզ. Խնդրեցէ՛ք զվհուկս եւ զգետնակոչս եւ զրախօսս, եւ զորովայնակոչս. ո՛չ իբրեւ զազգ ոք որ յԱստուծոյ իւրմէ խնդրիցէ։ Զի՞նչ խնդրիցեն վասն կենդանեաց ՚ի մեռելոց անտի. 20զի զօրէնս յօգնականութիւն ետ. զի ասիցեն թէ ո՛չ իբրեւ զբանս զայս, վասն որոյ չի՛ք կաշառս տալ վասն նորա։ 21Եւ եկեսցէ ՚ի վերայ ձեր սո՛վ խստութեամբ. եւ եղիցի իբրեւ քաղցիցէք՝ տրտմեսջիք, եւ հայհոյեսջիք զիշխանս եւ զաշխարհ։ Եւ ամբարձցեն զաչս իւրեանց յերկինս ՚ի վեր՝ 22եւ հայեսցին յերկիր ՚ի խոնարհ, եւ ահա կարօտութիւն՝ եւ տառապանք՝ եւ խաւար, նեղութիւն եւ անձկութիւն եւ մութ. զի ո՛չ ոք կարիցէ տեսանել. եւ որ իցէ ՚ի նեղութեանն՝ մի՛ նուազեսցի մինչեւ ՚ի ժամանակն։