1Անկա՛ւ Բէլ. խորտակեցաւ Դագովն. եղեն դրօշեալք նոցա ՚ի գազանս եւ յանասունս. բարձէ՛ք զնոսա կապեալս իբրեւ զբեռն աշխատելոյն եւ քաղցելոյն, 2լքելոյ եւ կարօտելոյ ՚ի միասին, որք ո՛չ կարացին ապրել ՚ի պատերազմէ. եւ նոքա ՚ի գերութեան վարեցան։ 3Լուարո՛ւք ինձ տունդ Յակովբայ, եւ ամենայն մնացեալքդ Իսրայէլի. ընտրեալքդ յորովայնէ՝ եւ խրատեալք ՚ի մանկութենէ 4մինչեւ ցծերութիւն, թէ ե՛ս եմ. եւ մինչեւ կարի՛ իսկ ծերասջիք՝ սակայն ե՛ս եմ. ե՛ս համբերեմ ձեզ. ես արարի, եւ ե՛ս անսացից. ե՛ս ընկալայց՝ եւ ապրեցուցի՛ց զձեզ։ 5Ո՞ւմ նմանեցուցէք զիս. տեսէք հնարեցարո՛ւք մոլորեալքդ. 6որ արկանէք ոսկի՛ հանգանակ ՚ի քսակէ, եւ կշռէք զարծաթ ՚ի կշիռս, եւ ՚ի վարձո՛ւ ունիք զոսկերիչս գործել կուռս ձեռագործս. եւ խոնարհեալ երկի՛ր պագանէք նմա։ 7Բարձեալ բերէք ՚ի վերայ ուսոց. եւ եթէ դնիցէք ՚ի գետնի, անդէ՛ն ՚ի տեղւոջ մնան, եւ ո՛չ շարժեսցին. եւ եթէ ոք կարդասցէ առ նա՝ ո՛չ լսէ. եւ ՚ի չարեաց ո՛չ փրկեսցէ զնա։ 8Յիշեցէ՛ք զայս եւ յոգո՛ց հանէք. ապաշաւեցէ՛ք մոլորեալքդ. դարձարո՛ւք սրտիւք, 9եւ յիշեցէ՛ք զառաջին գործսն յաւիտենից. զի ե՛ս եմ Աստուած, եւ չի՛ք այլ ոք բա՛ց յինէն, 10որ պատմիցէ յառաջագոյն զվերջինսն՝ մինչչեւ՛ եղեալ իցեն, եւ միանգամայն կատարեսցին. եւ ասացի թէ ամենայն խորհուրդք իմ հաստատեսցին, եւ զամենայն զոր կամիմ արարի՛ց։ 11Կոչե՛լ յարեւելից թռչունս, եւ յերկրէ հեռաստանէ՝ վասն որոյ խորհեցայն, խօսեցայ եւ ածի, հաստատեցի եւ արարի. ածի զնա՝ եւ յաջողեցի զճանապարհս նորա։ 12Լուարո՛ւք ինձ կորուսեալքդ սրտիւք՝ հեռացեալքդ յարդարութենէն. 13մերձեցուցից զարդարութիւն իմ ※ եւ այլ ո՛չ հեռասցի. եւ զճշմարտութիւն եւ զփրկութիւն իմ ո՛չ յամեցուցից. ※ ետո՛ւ ՚ի Սիոն զփրկութիւն Իսրայէլի ՚ի փառաւորութիւն։