1Ահաւասիկ Տէր Տէր զօրութեանց բարձցէ՛ ՚ի Հրէաստանէ եւ յԵրուսաղեմէ զայր հզօր՝ եւ զկին զօրաւոր, զզօրութիւն հացի, եւ զզօրութիւն ջրոյ. 2զհսկայն եւ զզօրաւորն, եւ զայր պատերազմօղ, եւ զդատաւոր, եւ զմարգարէ, եւ զքննիչ, եւ զծեր. 3եւ զյիսնապետ, եւ զսքանչելի խորհրդական, եւ զիմաստուն ճարտարապետ, եւ զհանճարե՛ղն զունկնդիր։ 4Եւ կացուցից ՚ի վերայ նոցա մանկո՛ւնս իշխանս. եւ խաբեբա՛յք տիրեսցեն նոցա։ 5Եւ անկցի՛ ժողովուրդն՝ այր ընդ այր, եւ այր ընդ ընկերի իւրում. ընդհարցի մանուկն ընդ ծերոյն, եւ անարգն ընդ պատուականին։ 6Զի բուռն հարկանիցէ այր զեղբօրէ իւրմէ, կամ զընտանւոյ հօր իւրոյ, եւ ասիցէ. Հանդերձք գո՛ն քո, լե՛ր մեր իշխան. եւ կերակուր մեր ընդ քե՛զ լիցի։ 7Տացէ՛ պատասխանի յաւուր յայնմիկ՝ եւ ասասցէ. Ո՛չ եղէց իշխան, զի ո՛չ գոյ ՚ի տա՛ն իմում հաց՝ եւ ո՛չ հանդերձ. եւ ո՛չ եղէց իշխան ժողովրդեանս ա՛յսմիկ։ 8Զի լքա՛ւ Երուսաղէմ, եւ Հրէաստան կործանեցա՛ւ. եւ լեզուք նոցա անօրէնութեամբ ՚ի Տեառնէ ապստամբեցին։ 9Վասն որոյ խոնարհեցա՛ն փառք նոցա, եւ ամօթ երեսաց նոցա ծածկեա՛ց զնոսա. զի զամպ փառաց նորա թշնամանեցին. եւ զմեղս իւրեանց իբրեւ զՍոդոմացւոցն պատմեցին եւ յա՛յտ արարին։ Վա՞յ անձանց նոցա զի խորհեցան խորհուրդ չար առանձինն՝ 10եւ ասեն. Կապեսցո՛ւք զարդարն՝ զի դժպհի՛ եղեւ մեզ։ Այսուհետեւ զարդիւնս գործոց իւրեանց կերիցեն։ 11Վա՛յ անօրինին. չարիք ըստ գործոց ձեռաց իւրոց անցցեն ընդ նա։ 12Ժողովո՛ւրդ իմ՝ հարկահանք ձեր ճռաքա՛ղ առնեն զձեզ, եւ պահանջօղք տիրե՛ն ձեզ. ժողովուրդ իմ որ երանենդ ձեզ՝ խաբե՛ն զձեզ, եւ զշաւիղս ոտից ձերոց խռովեցուցանե՛ն։ 13Այլ արդ հասցէ՛ Տէր ՚ի դատաստան, եւ կացուսցէ յայտնի զժողովուրդ իւր. 14ինքնի՛ն Տէր ՚ի դա՛տ եկեսցէ ընդ ծերս ժողովրդեան իւրոյ՝ եւ ընդ իշխանս նոցա. դուք զի՞ հրկէ՛զ արարէք զայգի իմ, եւ յափշտակութիւն տնանկի՛ն է ՚ի տունս ձեր։ 15Դուք զի՞ զրկէք զժողովուրդ իմ, եւ զերեսս տնանկաց լի՛ առնէք ամօթով, ասէ Տէր Տէր զօրութեանց։

16Ա՛յսպէս ասէ Տէր. Փոխանակ զի հպարտացան դստերք Սիովնի, եւ գնացին ՚ի բա՛րձր պարանոց. յօնիւքն ակնարկէին, եւ ՚ի գնացս իւրեանց քարշէին զստորոտս իւրեանց, եւ ոտիւքն կաքաւէին։ 17Եւ խոնարհեցուսցէ Աստուած զիշխանս դստեր Սիոնի, եւ մերկասցէ՛ Տէր զզարդ նոցա 18յաւուր յայնմիկ. եւ հանցէ Տէր զփառս հանդերձից նոցա, եւ զպատմուճանս նոցա. 19եւ զհեւսս, զծամակալս, եւ զպսակակալս, 20եւ զմահիկս, եւ զզարդ երեսաց նոցա, եւ զպատճուճանս զարդու փառաց նոցա, եւ զքօղէս, եւ զապարանջանս, եւ զմեհեւանդս, եւ զգինդս, 21եւ զմատանիս, եւ զկշտապանակս նոցա, զդիպակս, եւ զճեղանակս։ 22Զեզրածիրանին, եւ զմիջնածիրանին, զառտնին արկանելի, եւ զերեւելի լակոնացին. 23զբեհեզն, եւ զերկնագոյն, եւ զկարմիր շղաշատեռն, եւ զճամկաւորն, եւ զոսկեճամուկն, եւ զոսկէտտուն։ 24Եւ եղիցի փոխանակ հոտոցն անուշից՝ փոշի՛. եւ փոխանակ կամարացն՝ չուա՛ն գօտի. եւ փոխանակ ոսկեզարդո՛ւ գլխոյն կնդութիւն՝ վասն գործոց քոց. եւ փոխանակ ոսկեհուռ դիպակին՝ քո՛ւրձ զգեցցիս։ 25Եւ որդիդ քո սիրելի զոր սիրես՝ սրո՛վ մեռցի. եւ իշխանք ձեր սրո՛վ անկցին. 26եւ թշուառասցին, եւ սո՛ւգ զգեցցին սապատք զարդուց ձերոց. եւ մնասջիր միայն, եւ յերկի՛ր կործանեսջիր։