1Տէր Աստուած իմ փառաւո՛ր արարից զքեզ. օրհնեցի՛ց զանուն քո, զի արարեր սքանչելի՛ իրս, զխորհուրդն առաջին զճշմարիտ։ 2Այո՛ Տէր. զի եդիր զքաղաքս ՚ի հողաբլուրս, եւ զքաղաքս ամուրս ՚ի կործանումն հիմանց նոցա. քաղաքք ամպարշտաց յաւիտենից մի՛ շինեսցի։ 3Վասն այսորիկ օրհնեսցէ՛ զքեզ ժողովուրդ աղքատ, եւ քաղաքք մարդկան զրկելոց օրհնեսցե՛ն զքեզ. 4զի եղեր ամենայն քաղաքի խոնարհի օգնական, եւ տրտմելոց վասն կարօտութեան՝ յա՛րկ ապաւինի. ՚ի մարդոց չարաց փրկեցեր զնոսա։ 5Ապաւէն ծարաւեաց եւ ոգի մարդկան զրկելոց. ※ իբրեւ մարդոց թալկացելոց՝ ծարաւեաց ՚ի Սիովն. ՚ի մարդոց ամպարշտաց որոց մատնեցե՛ր զմեզ։ 6Եւ արասցէ Տէր Սաբաւովթ ամենայն հեթանոսաց ՚ի լերինս յայսմիկ. արբցե՛ն ուրախութիւն, արբցե՛ն գինի. օծցի՛ն իւղով ՚ի մրրոյ պարզելոյ, 7եւ ընկլցին ՚ի լերինս յայսմիկ։ Պատմեա՛ զայս ամենայն հեթանոսաց. զի ա՛յս խորհուրդ է ՚ի վերայ ամենայն ազգաց։ 8Զօրացա՛ւ մահ եւ եկո՛ւլ. եւ դարձեալ եհատ Աստուած զամենայն արտօսր յամենայն երեսաց, եւ զնախատինս ժողովրդեանն եբա՛րձ յամենայն երկրէ. զի բերան Տեառն խօսեցաւ. ※ զտապն հովանեա՛ւ ամպոյ, եւ զբազուկս հզօրաց խոնարհեցուսցէ։ 9Եւ ասասցեն յաւուր յայնմիկ. Ահաւասիկ Տէր Աստուած մեր յոր յուսացեալ էաք, եւ ապրեցուսցէ՛ զմեզ. զի սա՛ է Տէր, եւ սպասէա՛ք սմա. եւ ցնծասցուք՝ եւ ուրա՛խ եղիցուք ՚ի փրկութեան մերում։ 10Եւ տացէ մեզ հանգիստ Աստուած ՚ի լերինս յայսմիկ. եւ լիցի կոխա՛ն Մովաբացին, զոր օրինակ կոխիցէ ոք զկա՛լ կամնասայլիւք. 11եւ հանգուցանիցէ զձեռս իւր. նոյնպէս եւ նա՛ չուառեցոյց զնոսա ՚ի կորուսանել. եւ խոնարհեցուսցէ՛ զբարձրութիւն նորա, յոր արկանէր զձեռս իւր։ 12Եւ զբարձրութիւն ապաստանի պարսպաց քոց խոնարհեցուսցէ՛. եւ իջցե՛ն մինչեւ ՚ի յատակս։