Տեսիլ անապատին ՚ի ծովու։

1Իբրեւ մրրիկ ընդ անապա՛տ անցցէ, յանապատէ եկեալ յերկրէ։ Ահագի՛ն է տեսիլն, 2եւ խստութիւն պատմեցաւ ինձ. որ արհամարհելոցն է՝ արհամարհէ, եւ որ անօրինելոցն է՝ անօրինէ։ ՚Ի վերայ իմ հասին Ելամացիք, եւ հրեշտակք Պարսից գա՛ն ՚ի վերայ իմ. արդ հեծեծից՝ եւ մխիթարեցի՛ց զանձն իմ։ 3Վասն այսորիկ լցա՛ւ մէ՛ջ իմ դողութեամբ, եւ երկունք կալա՛ն զիս իբրեւ զծննդական. պնդեցայ՝ զի մի՛ լուայց, փութացայ՝ զի մի՛ տեսից։ 4Սիրտ իմ դարձաւ ՚ի մոլորութիւն, եւ անօրէնութիւն դեռ ընկղմէր զիս. անձն իմ եկաց ՚ի դողութեան. դիտեա՛ զդիտաւորութիւն քո. 5պատրաստեա՛ սեղան, կե՛ր արբ. արի՛ք իշխանք պատրաստեցէ՛ք վահանս։ 6Զի ա՛յսպէս ասաց ցիս Տէր. Գնա՛ դու անձամբ անձին դէ՛տ լինիջիր, եւ զոր ինչ տեսանիցես պատմեսջի՛ր։ 7Եւ տեսի հեծեալս երկուս. հեծեալ մի իշոյ, եւ հեծեալ մի ուղտու. լսել լուր բազում ※ ունկնդրութեան։ Եւ կոչեա՛ զՈւրիա ՚ի դիտանոցդ, ասէ Տէր։ 8Եւ կացի զտիւն ողջոյն՝ եւ զգիշերն ամենայն ՚ի վերայ բանակին. 9եւ տեսի զի գայր նո՛յն հեծեալ երկձի. պատասխանի՛ ետ եւ ասէ. Անկա՛ւ կործանեցաւ Բաբելովն, եւ ամենայն պատկերք նորա եւ ձեռագործք իւր կործանեցա՛ն յերկրի։ 10Լուարո՛ւք մնացորդք եւ ցաւագնեալք. լուարո՛ւք զոր լուայ ՚ի Տեառնէ զօրութեանց, զոր Աստուած Իսրայէլի պատմեաց մեզ։

11Տեսիլ Եդովմայեցւոցն։ Առ ի՛ս կոչեա՛ ՚ի Սէիր լեռնէ. Պահեցէ՛ք զմահարձանս. 12պահեցի՛ց ըստ առաւօտն եւ զցայգ. եթէ խնդրիցես, խնդրեսջիր եւ առ ի՛ս բնակեսջիր։

13Առած ՚ի վերայ Արաբացւոց։ Ընդ երեկո՛յս ննջեսցես յանտառի ճանապարհին Դովդանիմ։ 14Բերէ՛ք ջուր ընդ առաջ ծարաւեաց բնակիչք Թեմանու։ Հացի՛ւ ընդ առաջ ելէք փախստէից։ 15Վասն բազմութեան սպանելոցն, եւ վասն բազմութեան մոլորելոցն, եւ վասն բազմութեան սրոյն, եւ վասն բազմութեան աղեղանցն լարելոց, եւ վասն բազմութեան անկելոցն ՚ի պատերազմի։ 16Զի ա՛յսպէս ասաց ցիս Տէր. Ա՛մ մի եւս իբրեւ զտարի վարձանի, եւ պակասեսցեն փառք որդւոցն Կեդարու։ 17Եւ մնացորդք աղեղնաւորաց զօրաւորաց որդւոցն Կեդարու եղիցին սակաւաւո՛րք. զի Տէր Աստուած Իսրայէլի խօսեցաւ։