1՚Ի բժշկել ինձ զԻսրայէլ. եւ յայտնեսցին չարիքն Եփրեմայ եւ չարիքն Շամրնի, զի արարին ստութիւն. գո՛ղ մտցէ առ նա, եւ աւազակ մերկացուսցէ ՚ի ճանապարհս նորա։ 2Զի մրմնջեսցեն ՚ի միասին, որպէս մրմնջեն ՚ի միտս իւրեանց. զամենայն չարիս նոցա յիշեցի. արդ՝ պաշարեցին զնոսա խորհուրդք նոցա. յանդիման երեսաց իմոց եղեն։ 3Չարեօք իւրեանց ուրա՛խ արարին զթագաւորն, եւ ստութեամբ իւրեանց զիշխանս։ 4Ամենեքին շնացեալք, իբրեւ զթոնիր վառեալ յեփել, բորբոքեա՛լ ՚ի բոցոյ՝ եւ ՚ի զանգուածոյ ճարպոյ. մինչեւ խմորեսցին նոյն 5աւուրք թագաւորաց ձերոց. սկսան իշխանք զայրանալ ՚ի գինւոյ. եւ ձգեցին զձե՛ռս իւրեանց ՚ի ժանտագործս. 6զի բորբոքեցան իբրեւ զհնոց սիրտք նոցա յանիծանել զնոսա։ Զգիշերն ամենայն քնով յագեցաւ Եփրեմ. եղեւ առաւօտ՝ եւ բորբոքեցա՛ն իբրեւ զբոց հրոյ։ 7Ամենեքին ջեռան իբրեւ զհնոց վառեալ, եւ հո՛ւր եկեր զդատաւորս նոցա. ամենայն դատաւորք նոցա անկան, եւ ո՛չ ոք էր ՚ի նոցանէ որ կարդայր առ իս. 8Եփրեմ ընդ ժողովուրդս խառնակէր. եւ եղեւ Եփրեմ նկա՛ն չդարձուցեալ։ 9Կերան օտարք զզօրութիւն նորա՝ եւ նա ո՛չ գիտաց։ Ծաղկեցին ալիք նորա, եւ նա ո՛չ զգաց։ 10Եւ խոնարհեսցի հպարտութիւնն Իսրայէլի յերեսս նորա. եւ ո՛չ դարձան առ Տէր Աստուած իւրեանց, եւ ո՛չ խնդրեցին զնա յամենայնի յայսմիկ։ 11Եւ է՛ր Եփրեմ իբրեւ զաղաւնի անմիտ՝ որոյ ո՛չ իցէ սիրտ. յԵգիպտո՛ս խրախուսէին, եւ առ Ասորեստանեայս գնացին։ 12Ո՛ւր եւ երթայցեն՝ արկի՛ց ՚ի վերայ նոցա զվարմ իմ, եւ իբրեւ զթռչունս երկնից իջուցից զնոսա. եւ խրատեցից զնոսա համբաւով նեղութեան նոցա։

13Վա՛յ նոցա զի վազեցին զինեւ. եւ եղո՛ւկ են՝ զի ամպարշտեցան յիս։ Ե՛ս փրկեցի զնոսա եւ նոքա բամբասեցին զիս սուտ, 14եւ ո՛չ աղաղակեցին առ իս սիրտք նոցա. այլ ողբացին յանկողինս իւրեանց. եւ ՚ի վերայ ցորենոյ եւ գինւոյ ցտէին. խրատեցան ինեւ՝ 15եւ ես զօրացուցի զբազուկս նոցա. եւ ՚ի վերայ իմ խորհեցան չարութիւն։ 16Դարձան յոչինչ, եւ եղեն իբրեւ զաղեղն լարեալ. անկցին ՚ի սո՛ւր իշխանք նոցա, վասն անխրատութեան խստութեան լեզուի իւրեանց. զի այս անզգամութիւն նոցա յերկրին Եգիպտացւոց։