1Ընդ առաւօտս. ընկեցաւ թագաւորն Իսրայէլի։ Քանզի տղա՛յ էր Իսրայէլ, եւ ես սիրեցի զնա, եւ յԵգիպտոսէ՛ կոչեցի զորդիս նորա։ 2Որպէս կոչեցի զնոսա՝ նոյնպէս մերժեցան յերեսաց իմոց. նոքա Բահաղիմա՛յ զոհէին, եւ դրօշելոց խո՛ւնկս արկանէին։ 3Եւ ես խափանեցի զԵփրեմ, եւ ընկալայ զնա ՚ի վերայ բազկաց իմոց. եւ ո՛չ գիտացին թէ բժշկեմ զնոսա 4յապականութենէ մարդկան. ձգեցի զնոսա կապանօք սիրոյ իմոյ. եւ եղէց նոցա որպէս ածիցէ ոք ապտա՛կ ՚ի ծնօտս նորա. հայեցա՛յց ՚ի նա՝ եւ յաղթեցից նմա։ 5Բնակեաց Եփրեմ յԵգիպտոս, եւ Ասորեստանեայն թագաւո՛ր նմա. զի ո՛չ կամեցան դառնալ։ 6Եւ տկարացաւ սրով ՚ի քաղաքս իւր, եւ դադարեաց ՚ի ձեռս նորա, եւ կերիցեն ՚ի խորհրդոց իւրեանց։ 7Եւ ժողովուրդ նորա կախեա՛լ կայցէ զբնակութենէ նորա. եւ Աստուած ՚ի վերայ պատուականաց նորա բարկասցի՛, եւ մի՛ բարձրացուսցէ զնոսա։ 8Զի՞նչ անցուցից ընդ քեզ Եփրեմ. այլ պաշտպա՛ն լինիցիմ քեզ Իսրայէլ. զի՞նչ անցուցից ընդ քեզ. եդից զքեզ իբրեւ զԱդամա՝ եւ իբրեւ զՍեբոյիմ։ Դարձա՛ւ սիրտ իմ ՚ի նոյն. յուզեցա՛ւ խնամք իմ։ 9Եւ ո՛չ արարից ըստ բարկութեան սրտմտութեան իմոյ, եւ ոչ թողից ջնջել զԵփրեմ։ Զի Աստուած եմ ես՝ եւ ո՛չ մարդ, ՚ի միջի ձերում Սուրբ. եւ ո՛չ մտից ՚ի քաղաք. 10այլ զկնի Տեառն գնացից. իբրեւ առեւծ մռնչեսցէ. զի ինքն մռնչեսցէ, եւ յիմարեցուսցէ զորդիս ջուրց։ 11Թռիցեն եկեսցեն իբրեւ զհաւ յԵգիպտոսէ, եւ իբրեւ զաղաւնիս յերկրէն Ասորեստանեայց. եւ պատսպարեցուցից զնոսա ՚ի տունս իւրեանց՝ ասէ Տէր։ 12Պաշարեա՛ց զիս ստութեամբ Եփրեմ, եւ ամպարշտութեամբ տունն Իսրայէլի եւ Յուդայ. արդ ծանեա՛ւ զնոսա Աստուած, եւ ժողովուրդ սուրբ կոչեսցի Աստուծոյ։