1Եւ եղեն կեանք Սառայի հարիւր եւ քսան եւ եւթն ամ։ 2Եւ մեռաւ Սառա ՚ի քաղաքի Արբոկա՛ ՚ի ձորն, ա՛յն ինքն է Քեբրոն յերկրին Քանանացւոց։ Եւ եկն Աբրաամ կոծե՛լ զՍառա եւ սո՛ւգ առնուլ։ 3Եւ յարեաւ Աբրաամ ՚ի մեռելոյն իւրմէ, եւ խօսեցաւ ընդ որդիսն Քետեայ՝ եւ ասէ. 4Պանդո՛ւխտ եւ նժդեհ եմ ես ՚ի միջի ձերում. արդ՝ տո՛ւք ինձ ստացուած գերեզմանի ընդ ձեզ եւ թաղեցից զմեռեալս իմ։ 5Պատասխանի ետուն որդիքն Քետայ Աբրաամու՝ եւ ասեն. 6Ո՛ւնկն դիր մեզ Տէր, թագաւո՛ր յԱստուծոյ ես ՚ի միջի մերում, յընտի՛ր շիրմաց մերոց թաղեա՛ զմեռեալն. զի ո՛չ ոք ՚ի մէնջ արգելու ՚ի քէն զշիրիմս։ 7Յարեա՛ւ Աբրաամ երկիր եպագ ժողովրդեան երկրին որդւոցն Քետայ։ 8Եւ խօսեցաւ ընդ նոսա Աբրաամ՝ եւ ասէ. Եթէ յօժա՛ր իցէք ՚ի մտի ձերում թաղել զմեռեալդ իմ յերեսաց իմոց, ո՛ւնկն դիք ինձ, եւ խօսեցարո՛ւք վասն իմ ընդ Եփրոնի որդւոյ Սահառայ, 9եւ տացէ ինձ զայրն կրկին, որ է ՚ի վիճակի ագարակի իւրոյ, արծաթոյ՝ որչափ եւ արժան իցէ. տացէ՛ զնա ինձ ՚ի միջի ձերում ՚ի ստացուած բնակաց։ 10Եւ Եփրոն նստէր ՚ի մէջ որդւոցն Քետայ։ Պատասխանի՛ ետ Եփրոն Քետացի Աբրաամու՝ եւ ասէ. Լո՛ւ ՚ի լու որդւոցն Քետայ, եւ ամենեցուն որ մտանէին ընդ դուռն քաղաքի նորա։ 11Եւ ասէ. Յի՛ս դարձ Տէր. եւ ո՛ւնկն դիր ինձ. զագարակն ետու քեզ, եւ զայրն որ ՚ի նմա տա՛ց քեզ առաջի ամենայն քաղաքակցաց իմոց ետու քեզ թաղե՛լ զմեռեալն քո։ 12Եւ երկիր եպագ Աբրաամ առաջի ամենայն ժողովրդեան երկրին. 13եւ խօսեցաւ ընդ Եփրոնի յականջս ժողովրդեան երկրին, եւ ասէ. Որովհետեւ անսացեր ինձ, ո՛ւնկն դիր ինձ. տա՛ց քեզ արծաթ ընդ ագարակին, ա՛ռ յինէն եւ թաղեցից անդ զմեռեալս։ 14Պատասխանի ետ Եփրոն Աբրաամու՝ եւ ասէ ցնա. 15Ո՛չ տէր իմ. լուայ թէ գետինն չորեքհարեւր սատեր արծաթոյ է, ընդ իս եւ ընդ քեզ զի՞նչ է այն. բայց դու թաղեա՛ զմեռեալն քո։ 16Եւ իբրեւ լուաւ Աբրաամ յԵփրոնէ, կշռեա՛ց զարծաթն Եփրոնի, զոր խօսեցաւն յականջս որդւոցն Քետայ, չորեքհարիւր սատեր արծաթոյ ընտրոյ վաճառականաց։ 17Եւ հաստատեցա՛ւ ագարակն Եփրոնի, որ է՛ առ կրկնով այրիւն յանդիման Մամբրէի, ագարակն եւ այրն որ է ՚ի նմա. եւ ամենայն ծառատունկ որ է յագարակի անդ, շուրջ յամենայն սահմանս նորա, 18՚ի ստացուածս Աբրաամու առաջի որդւոցն Քետայ, եւ որ մտանէին ընդ դուռն քաղաքի նորա։ 19Եւ յետ այնորիկ թաղեաց Աբրաամ զՍառա զկին իւր ՚ի կրկնումն այրի ագարակին, որ է յանդիման Մամբրէի. ա՛յն է Քեբրոն յերկրին Քանանացւոց։ 20Եւ հաստատեցա՛ւ ագարակն եւ այրն որ է ՚ի նմա՝ Աբրաամու, ՚ի ստացուածս շիրմաց յորդւոցն Քետայ։