1Եւ չուեա՛ց անտի Աբրաամ յերկիրն հարաւոյ, եւ բնակեցա՛ւ ընդ Կադէս եւ ընդ Սուր. եւ պանդխտեցաւ ՚ի Գերարայ։ 2Եւ ասա՛ց Աբրաամ վասն Սառայի կնոջ իւրոյ թէ քոյր իմ է։ Եւ առաքեաց Աբիմելէք արքայ Գերեարացւոց, եւ ա՛ռ զՍարրա։ 3Եւ եկն Աստուած առ Աբիմելէք ՚ի տեսլեան ※ գիշերոյ, եւ ասէ. Ահա մեռանի՛ս վասն կնոջդ զոր առեր, զի կին՝ առնակի՛ն է։ 4Բայց Աբիմելէք ո՛չ մերձեցաւ ՚ի նա։ Եւ ասէ. Տէր, զազգ մի զանգէ՛տ եւ զարդար՝ կորուսանիցե՞ս։ 5Ոչ ապաքէն նա՛ ասաց ցիս քոյր իմ է, եւ սա՝ ասաց ցիս եղբա՛յր իմ է, եւ ես սրբութեամբ սրտի՝ եւ արդարութեամբ ձեռաց արարի զայս։ 6Եւ ասէ ցնա Աստուած ՚ի տեսլեանն. Ես գիտացի՛ զի սրբութեամբ սրտի արարեր դու զայդ. եւ խնայեցի ես ՚ի քեզ չմեղանչել քեզ յիս. վասն այնորիկ ո՛չ ետու թոյլ քեզ մերձենալ ՚ի դա։ 7Բայց արձակեա՛ զկինդ յա՛յր իւր. զի այր մարգարէ է, եւ արասցէ աղօթս վասն քո եւ կեցցես։ Ապա թէ ո՛չ տացես, գիտեա՛ զի մեռանի՛ս դու եւ ամենայն որ ինչ քո է։ 8Եւ կանխեաց Աբիմելէք ընդ առաւօտն՝ եւ կոչեաց զամենայն զծառայս իւր, եւ խօսեցաւ զամենայն բանս զայսոսիկ յականջս նոցա։ Եւ զահի՛ հարան ամենայն մարդիկն յոյժ։ 9Եւ կոչեաց Աբիմելէք զԱբրաամ, եւ ասէ ցնա. Զի՞նչ գործեցեր դու զայդ ընդ մեզ. միթէ մեղա՞ք ինչ քեզ՝ զի ածեր ՚ի վերայ իմ եւ ՚ի վերայ թագաւորութեան իմոյ մե՛ղս մեծամեծս. գործ զոր ո՛չ ոք գործէ՝ գործեցեր ընդ իս։ 10Եւ ասէ Աբիմելէք ցԱբրաամ. Զի՞նչ տեսեալ արարեր զբանդ զայդ։ 11Եւ ասէ Աբրաամ. Զի ասացի՝ թէ գուցէ ո՛չ գուցէ աստուածպաշտութիւն ՚ի տեղւոջս յայսմիկ. եւ զիս սպանանիցեն վասն կնոջդ իմոյ։ 12Բայց արդարեւ՝ քո՛յր իմ է ՚ի հօրէ եւ ո՛չ ՚ի մօրէ. եւ եղեւ ինձ կին։ 13Եւ եղեւ յորժամ եհան զիս Աստուած ՚ի տանէ հօր իմոյ, եւ ես ասացի ցդա. զա՛յս արդարութիւն արասցես ընդ իս. յամենայն տեղիս ուր եւ երթիցուք, ասասջիր զինէն թէ եղբա՛յր իմ է։ 14Եւ ա՛ռ Աբիմելէք հազար սատեր, եւ արջառ եւ ոչխար, ծառայս եւ աղախնայս, եւ ետ Աբրաամու. եւ ետ ցնա զՍառա զկին իւր։ 15Եւ ասէ Աբիմելէք ցԱբրաամ. Ահաւասիկ երկիրդ իմ առաջի քո, ուր հաճոյ իցէ քեզ բնակեա՛ց։ 16Եւ ցՍառա ասէ. Ահա ետու հազա՛ր սատեր եղբօր քում, այն եղիցի քեզ ՚ի պատի՛ւ երեսաց քոց, եւ ամենայն կանանց որ ընդ քեզ են. եւ զամենայն արդա՛ր խօսեսցիս։ 17Եւ եկաց յաղօթս Աբրաամ առ Աստուած. եւ բժշկեաց զԱբիմելէք եւ զկին նորա, եւ զաղախնայս նորա, եւ ծնանէին։ 18Զի փակելով փակեաց Տէր արտաքուստ զամենայն արգանդ ՚ի տան Աբիմելիքայ վասն Սառայի կնոջ Աբրաամու։