1Եւ Սարա կին Աբրամու ո՛չ ծնանէր նմա։ Եւ էր նորա աղջիկ մի Եգիպտացի որոյ անուն էր Ագար։ 2Եւ ասէ Սարա ցԱբրամ յերկիրն Քանանացւոց. Որովհետեւ արգել զիս Տէր ՚ի ծնանելոյ, արդ՝ մո՛ւտ առ աղջիկդ իմ զի արարից ինձ որդի՛ ՚ի դմանէ։ Եւ ունկնդի՛ր եղեւ Աբրամ ձայնի Սարայի։ 3Եւ ա՛ռ Սարա կին Աբրամու զԱգար Եգիպտացի զաղախին իւր, յետ տասն ամի բնակելոյ Աբրամու յերկիրն Քանանացւոց, եւ ետ զնա Աբրամու առն իւրում կնութեան։ 4Եւ եմուտ առ Ագար, եւ յղացաւ։ Իբրեւ ետես թէ յղի է՝ արհամարհեցա՛ւ տիկինն իւր ※ յաչս նորա։ 5Եւ ասէ Սարա ցԱբրամ. Բո՛ւռն է ինձ ՚ի քէն. ես ետու զաղախինն իմ ՚ի գիրկս քո. եւ արդ՝ իբրեւ ետես թէ յղացաւ, արհամարհեցա՛յ ես յաչս նորա. դա՛տ արասցէ Աստուած ընդ իս եւ ընդ քեզ։ 6Եւ ասէ Աբրամ ցՍարա. Ահաւանիկ աղախին քո ՚ի ձեռս քո, արա՛ նմա զինչ հաճոյ է առաջի աչաց քոց։ Եւ չարչարեաց զնա Սարա. եւ փախեա՛ւ յերեսաց նորա։ 7Եգիտ զնա հրեշտակ Տեառն յաղբեւր ջուրց յանապատի անդ. յաղբեւրն որ ՚ի ճանապարհին Սուրայ է։ 8Եւ ասէ ցնա հրեշտակ Տեառն. Ագար՝ աղախին Սարայի, ուստի՞ գաս կամ յո՞ երթաս։ Եւ ասէ. Յերեսաց Սարայի տիկնոջ իմոյ փախուցեալ եմ ես։ 9Ասէ ցնա հրեշտակն Տեառն. Դարձի՛ր առ տիկին քո՝ եւ հնազա՛նդ լեր ընդ ձեռամբ նորա։ 10Եւ ասէ ցնա հրեշտակն Տեառն. Բազմացուցանելո՛վ բազմացուցից զզաւա՛կ քո, եւ անթի՛ւ լիցի ՚ի բազմութենէ։ Եւ ասէ ցնա հրեշտակն Տեառն. 11Ահաւադիկ դու յղի՛ իսկ ես. եւ ծնցես որդի, եւ կոչեսցես զանուն նորա Իսմայէլ. զի լուաւ Տէր տառապանաց քոց։ 12Եւ նա եղիցի այր վայրա՛գ. ձեռք նորա յամենեսին, եւ ձեռք ամենեցուն ՚ի նա. եւ յանդիման ամենայն եղբարց իւրոց բնակեսցէ։ 13Եւ կարդա՛ց Ագար զանուն Տեառն որ խօսեցաւ ընդ նմա, եւ ասէ. Դո՛ւ ես Աստուած որ հայեցար յիս։ Քանզի ասաց եթէ յանդիման իսկ տեսի զայն, որ երեւեցաւն ինձ։ 14Վասն այնորիկ կոչեաց ջրհո՛րն՝ ջրհո՛ր այնորիկ զոր յանդիմանն տեսի. եւ ահա է՛ այն ընդ Կադէս եւ ընդ Բարադ։ 15Եւ ծնաւ Ագար Աբրամու որդի, եւ կոչեաց զանուն որդւոյն իւրոյ որ ծնաւ նմա Ագար՝ Իսմայէլ։ 16Եւ Աբրամ էր ամաց ութսուն եւ վեցի՛ց, յորժամ ծնաւ նմա Ագար զԻսմայէլ։