1Եւ ա՛յս են իշխանք հայրապետացն որ ելանէին ընդ իս ՚ի թագաւորութեանն Արտաշէսի թագաւորի Բաբելացւոց։ 2Յորդւոցն Փենեէսի՝ Գեթսոն. յորդւոցն Իթամարայ՝ Դանիէլ. յորդւոցն Դաւթայ՝ Յատուս. 3յորդւոցն Նաաքա՝ Նիա. յորդւոցն Փորոսայ՝ Զաքարիա, եւ ընդ նմա արք հարիւր յիսուն. 4յորդւոցն Փաաթմովաբ՝ Եղիանա որդի Զարա, եւ ընդ նմա երկերիւր արանց. 5յորդւոցն Զատուէլի՝ Սեքենիա որդի Ազիելի, եւ ընդ նմա երեք հարիւր արանց. 6յորդւոցն Ադինայ՝ Աբէն որդի Յովնաթանայ, եւ ընդ նմա յիսուն արանց. 7յորդւոցն Եղամի՝ Իսաիաս որդի Աթաղիայ, եւ ընդ նմա եւթանասուն արանց. 8յորդւոցն Սափատիայ՝ Զամբդիա որդի Միքայելի, եւ ընդ նմա եւթանասուն արանց. 9յորդւոցն Յովաբայ՝ Բադիա որդի Յեւելի, եւ ընդ նմա երկերիւր եւ ութտասն արանց. 10յորդւոցն Բաանայ Սեղիմութ որդի Յովսեփու, եւ ընդ նմա հարիւր վաթսուն արանց. 11յորդւոցն Բաբէի՝ Զաքարիաս որդի Բաբի, եւ ընդ նմա քսան եւ ութ արանց. 12յորդւոցն Ադոնիկամայ եւ Ազգադայ եւ Յովնան որդի Սակատանայ, եւ ընդ նմա հարիւր եւ տասն արանց։ 13յորդւոցն Ադոնիկամ՝ Էսքարի, եւ ա՛յս են անուանք նոցա, Եղ՚իփաղ՚աթ, Յէիեղ՚, եւ Սամա, եւ ընդ նմա վաթսուն արանց. 14յորդւոցն Բագուի՝ Ութայի, եւ Զաբութ, եւ ընդ նմա եւթանասուն արանց։ 15Եւ ժողովեցի զնոսա առ եզր գետոյն որ գայ յԵւի, եւ առեալ անդ օթեւանս աւուրս երիս. եւ ՚ի բազմութիւն ժողովրդեանն յորդւոց քահանայիցն, եւ յորդւոցն Ղեւեայ ո՛չ գտի զոք։ 16Եւ առաքեցի առ Եղիազար, եւ առ Արիէլ, եւ առ Սեմեայ. եւ զԱռնաամ, եւ զԱրիբ, եւ զԵղնաթան, եւ զՆաթան, եւ զԶաքարիա, եւ զՄէսողաամ, եւ զՅովարիբ, եւ զՅեղամաթամ. 17եւ իմացուցեալ ածին զնոսա առաջի իշխանացն որ էին ՚ի տեղւոջ գանձաւորացն, եւ եդի բանս ՚ի բերանս նոցա խօսել ընդ եղբարս իւրեանց. Նաթանիմ, որ էր ՚ի տեղի գանձաւորացն զորս ածին առ մեզ. որք երգէին ՚ի տան Աստուծոյ մերոյ. 18եւ եկին առ մեզ. քանզի էր ձեռն Տեառն ՚ի բարութիւն ընդ մեզ։ Յորդւոցն Ղեւեայ որդւոյ Իսրայէլի. եւ զառաջինն եկին առ մեզ որդիք նորա եւ եղբարք նորա ութեւտասն։ 19Եւ Ասեբիա եւ Յեսեա որդի Մերարեայ, եւ եղբարք նորա եւ որդիք նորա՝ արք քսան։ 20Եւ ՚ի Նաթանայ զոր ետ Դաւիթ եւ իշխանքն ՚ի ծառայութիւն Ղեւտացւոցն, եւ ՚ի Նաթանայիմ երկերիւր եւ քսան. ամենեքեան ժողովեցան ըստ անուան իւրեանց։ 21Եւ քարոզեցաք անդ պա՛հս առ եզր գետոյն Առիս, եւ մատուցաք անդ աղօթս առաջի Տեառն Աստուծոյ մերոյ, խնդրել ՚ի նմանէ ճանապարհ ուղղութեան՝ մե՛զ եւ որդւոց մերոց՝ եւ ամենայնի որ ընդ մեզ. 22վասն զի ամաչեցաք խնդրել ՚ի թագաւորէն հեծեալս ապրեցուցանել զմեզ ՚ի թշնամեացն մերոց ՚ի ճանապարհին. վասն զի ասացաք ցթագաւորն ա՛յսպէս, եթէ ձեռն Տեառն մերոյ օգնէ ամենեցուն որ խնդրեն զնա ՚ի բարութիւն. եւ զօրութիւն նորա եւ բարկութիւն նորա ՚ի վերայ ամենեցուն ոյք թողուն զնա։ 23Եւ պահեցաք, եւ խնդրեցաք յԱստուծոյ մերոյ վասն այսր ամենայնի՝ եւ լուաւ Տէր։ 24Եւ առաքեցաք յիշխանացն քահանայից երկոտասան, զՍարաբիա, եւ զԱսաբիա, եւ ընդ նոսա յեղբարց նոցա տասն. 25եւ կշռեցաք եւ տուա՛ք ցնոսա զարծաթ եւ զոսկի, եւ զսպաս առաջաւորութեան տանն Աստուծոյ մերոյ. զոր բարձրացոյց զմեզ թագաւորն եւ խորհրդակիցք նորա եւ իշխանք նորա, եւ ամենայն Իսրայէլ որ միանգամ էին անդ. 26եւ կշռեալ ետու ցնոսա արծաթ տաղանտս՝ վեց հարիւր յիսուն, եւ կահ արծաթոյ՝ հարիւր, եւ ոսկւոյ՝ տաղանտս հարիւր։ 27եւ այլ կահ ոսկւոյ՝ քսան եւ երեք, եւ կահ պղնձոյ սուրբ եւ մաքուր ոսկեզօծ։ 28Եւ ասացի ցնոսա. Եւ դուք սրբեալք Տեառն Աստուծոյ էք, եւ ամենայն կահ սուրբ է Տեառն, եւ ոսկեղէնք եւ արծաթեղէնք ընտրեալք Տեառն Աստուծոյ հարցն մերոց. 29արթո՛ւն կացէք եւ պահեցէ՛ք՝ մինչեւ կշռեսջիք զդոսա առաջի իշխանաց քահանայիցն եւ Ղեւտացւոցն, եւ իշխանաց հայրապետացն Իսրայէլի՝ որ են յԵրուսաղէմ ՚ի խորանս տան Տեառն։ 30Եւ առեալ քահանայիցն եւ Ղեւտացւոցն զհամար ոսկւոյ եւ արծաթոյ՝ եւ զկահս ՚ի տանել յԵրուսաղէմ ՚ի տուն Աստուծոյ մերոյ։ 31Եւ յարուցեալ չուեցա՛ք ՚ի գետոյն Էոս՝ որ օր երկոտասա՛ն էր ամսոյն առաջնոյ, եւ եկեալ հասաք յԵրուսաղէմ. եւ ձեռն Տեառն Աստուծոյ մերոյ է՛ր ընդ մեզ, եւ փրկեաց զմեզ ՚ի ձեռաց թշնամեաց մերոց, եւ ՚ի պատերազմողաց զճանապարհայն. 32եւ եկաք յԵրուսաղէմ, եւ հանգեաք անդ աւուրս երիս. 33եւ յաւուրն չորրորդի կշռեալ տուաք զարծաթ եւ զոսկի եւ զկա՛հ ՚ի տուն Տեառն Աստուծոյ մերոյ, ՚ի ձեռն Մարեմովթ որդի Ոնիայ քահանայի, եւ որ է՛ր ընդ նմա Եղիազար որդի Փենեէսի, եւ Յովաբաթ որդի Յեսուայ, եւ Նովադիա որդի Բանեայ, եւ ա՛յլ Ղեւտացիք։ 34Եւ էր թուով եւ համարով ամենայն, եւ գրեցաւ ամենայն կշիռ համարոյն բովանդակ։ 35Եւ ՚ի ժամանակին յայնմիկ որք եկեալ էին ՚ի գերութենէն որդիք պանդխտութեան, մատուցին ողջակէզս Տեառն Աստուծոյ Իսրայէլի, զուարակս՝ երկոտասան վասն ամենայն Իսրայէլի. խոյս՝ իննսուն եւ վեց. գառինս՝ եւթանասուն եւ եւթն. ամիկս վասն մեղաց՝ երկոտասան։ Զա՛յս ամենայն ողջակէզս մատուցին Տեառն Աստուծոյ։ 36Եւ ետուն զգիր կարասւոյն, զոր հրամայեալ էր թագաւորին ցիշխանս կողմանց գետոյն Եփրատու. եւ փառաւորեցին զժողովուրդն եւ զտաճարն Աստուծոյ։