1Եւ ՚ի վիճակել ձեզ զերկիրն ՚ի ժառանգութիւն, զատուսջի՛ք պտուղ Տեառն սուրբ ՚ի յերկրէն. քսան եւ հինգ հազար յերկայնութիւն, եւ տասն հազար ՚ի լայնութիւն, նուիրեալ եղիցի յամենայն սահմանս նորա շուրջանակի։ 2Եւ եղիցի յայնմանէ ՚ի սրբութիւն. հինգ հարեւր առ հինգ հարեւր չորեքկուսի շուրջանակի. եւ յիսուն կանգուն բացատացն շուրջանակի։ 3Եւ յայսմ չափոյ չափեսցի քսան եւ հինգ հազար յերկայնութիւն, եւ տասն հազա՛ր ՚ի լայնութիւն. եւ ՚ի նմա՛ եղիցի սրբութիւն սրբութեանցն 4նուիրեալ յերկրէն. եւ եղիցի քահանայիցն որ պաշտիցեն ՚ի սրբութեանն, եւ այնոցիկ որ մերձենան պաշտել զՏէր։ Եւ եղիցի նոցա տեղի մի զատեալ ՚ի տուն սրբութեան իւրեանց, 5քսան եւ հինգ հազար յերկայնութիւն, եւ տասն հազար ՚ի լայնութիւն։ Եւ Ղեւտացւոցն որ պաշտեն ՚ի տաճարին, եղիցի ՚ի կալուածս քաղաքի ՚ի բնակութիւն. 6ըստ բնակութեան քաղաքի տացես, հինգ հազար ՚ի լայնութիւն, եւ քսան եւ հինգ հազար յերկայնութիւն ըստ երախտեաց սրբութեանցն. յամենայն տանէն Իսրայէլի եղիցի։ 7Եւ առաջնորդին յայնմանէ եւ անտի յերախայրիս սրբոցն ՚ի նիստ քաղաքին յանդիման երախայրեաց սրբութեանցն, ընդդէմ բնակութեան քաղաքին ընդ կողմ ծովու. եւ ՚ի ծովէն ընդ արեւելս. եւ երկայնութիւն ըստ միոյ վիճակաց ՚ի սահմանացն որ ընդ ծովակողմն, եւ լայնութիւն ըստ սահմանաց երկրին որ ընդ արեւելս. 8եւ եղիցի նմա ՚ի կալուածս ՚ի մէջ Իսրայէլի։ Եւ ո՛չ եւս բուռն լիցին իշխանք որդւոցն Իսրայէլի ժողովրդեան իմում. եւ զերկիրն վիճակեալ ժառանգեսցեն տունն Իսրայէլի ըստ ազգս իւրեանց։

9Ա՛յսպէս ասէ Տէր Տէր. Շա՛տ լիցի ձեզ իշխանքդ Իսրայէլի. արդ ՚ի բա՛ց արարէք զապիրատութիւն եւ զչուառութիւն. իրաւունս եւ արդարութի՛ւն արարէք. ՚ի բա՛ց մերժեցէք զբռնութիւն ՚ի ժողովրդենէ իմմէ՝ ասէ Տէր Աստուած։ 10Կշիռք արդա՛ր, եւ չափ արդա՛ր, եւ կապիճ արդա՛ր եղիցի չափոց ձերոց։ 11Եւ կապիճ նո՛յն լիցի տալոյ եւ առնլոյ. տասներորդն գրուի եղիցի կապիճ. եւ տասներորդ գրուի կապիճն, կշի՛ռ ըստ գրուին, եւ ըստ արդուին եղիցի։ 12Եւ կշիռն քսան դանգ, եւ քսա՛ն սիկղ, եւ քսան եւ հինգ սիկղ, եւ ՚ի քսան եւ ՚ի հինգ սկեղէ՝ եղիցի ձեզ մնաս մի։ 13Եւ ա՛յս պտուղ իցէ զոր զատանիցէք. զվեցերորդ չափոյն ՚ի գրուէ ցորենոյ, եւ զվեցերորդ արդուի ՚ի քոռէ գարւոյ։ 14Եւ հրաման ձիթոյ, քսէստ մի իւղոյ, տասներորդ սափորոյն. զի տասն քսէստն՝ է՛ սափոր մի։ 15Եւ ոչխար մի ՚ի տասն ոչխարէ, նուէրք յամենայն ազգացն Իսրայէլի, ՚ի զոհս եւ յողջակէզս քաւութեան եւ փրկութեան ձերոյ՝ ասէ Տէր Աստուած։ 16Եւ ամենայն ժողովուրդ երկրիդ՝ տացէ՛ զերախայրիսն ցառաջնորդս Իսրայէլի։ 17Եւ ՚ի ձեռն առաջնորդին եղիցին ողջակէզքն՝ եւ զոհքն՝ եւ սպանդքն, ՚ի տօնս եւ յամսագլուխս եւ ՚ի շաբաթս. եւ յամենայն տօնս տանդ Իսրայէլի նա մատուսցէ զվասն մեղացն, եւ զզոհսն՝ եւ զողջակէզսն, եւ զվասն փրկութեանն քաւե՛լ զտունդ Իսրայէլի։ 18Ա՛յսպէս ասէ Տէր Աստուած. Յառաջնում ամսեանն որ օր մի իցէ ամսոյն, առնուցո՛ւք զուարակ մի յանդւոյ անարատ՝ քաւել զսրբութիւնն։ 19Եւ առցէ քահանայն յարենէ քաւութեանն, եւ ցանեսցէ ՚ի վերայ սեմոց տանն, եւ ՚ի վերայ չորեցունց անկեանց տաճարին, եւ ՚ի վերայ սեղանոյն, եւ ՚ի վերայ սեմոց դրանն ներքին սրահին։ 20Եւ ա՛յսպէս արասցէ, որ օր եւթն իցէ ամսոյն, յամենայն յանգէտս յանցանաւորէ եւ ՚ի տղայոց քաւել զտունն։ 21Եւ յամսեանն առաջնում, որ օր չորեքտասան իցէ ամսոյն, եղիցի ձեզ տօնն պասէք, զեւթն օր բաղա՛րջ կերիջիք։ 22Եւ արասցէ առաջնորդն յաւուրն յայնմիկ վասն իւր՝ եւ վասն տանն՝ եւ վասն ամենայն ժողովրդեան երկրին, զուարակ մի յարջառոց վասն մեղաց։ 23Եւ զեւթն օր տօնին արասցեն ողջակէզս Տեառն, եւթն զուարակ՝ եւ եւթն խոյ. անարատ աւուր աւուր զեւթն օր. եւ վասն մեղաց նոխազ մի յայծեաց աւուր աւուր. 24եւ զոհ եւ նաշիհ գործեալ ըստ զուարակին, եւ հաց գործեալ ըստ խոյին. եւ քսէստ մի եւղ ըստ հացին։ 25Եւ յամսեանն երրորդի որ օր հինգետասան իցէ ամսոյն արասցեն տօն ըստ օրինակի եւթանց աւուրց. որպէս վասն մեղացն՝ եւ վասն ողջակիզացն. եւ ըստ նաշհւոյն՝ եւ ըստ ձիթոյն։