1Եւ տեսանէի ահա ՚ի վերայ հաստատութեանն որ էր ՚ի վերայ գլխոց քերովբէիցն իբրեւ զվէմ շափիղ՚այ ական, եւ ՚ի վերայ նորա նմանութիւն աթոռոյ։ 2Եւ ասէ ցայրն՝ որ զգեցեալն էր զպատմուճանն սուրբ. Մո՛ւտ ՚ի մէջ անուոցդ եւ ՚ի ներքոյ քրովբէիցդ՝ եւ լի՛ց զագուռս քո կայծակամբք հրոյ ՚ի միջոյ քրովբէիցդ. եւ ցանեա՛ ՚ի վերայ քաղաքին, եւ եմուտ այրն առաջի իմ։ 3Եւ քերովբէքն կային ընդ աջմէ տաճարին ՚ի մտանե՛լ առնն. եւ ամպն ելից զսրահն ներքին։ 4Եւ փառքն Տեառն վերացան ՚ի քրովբէից անտի յօդն որ ՚ի մէջ տաճարին. եւ տաճարն լի՛ եղեւ ամպով, եւ սրահն լի՛ եղեւ լուսով փառացն Տեառն։ 5Եւ ձայն թեւոց քրովբէիցն լսելի լինէր մինչեւ ՚ի սրահն արտաքին. իբրեւ զձայն Աստուծոյ Սադայի՝ որ խօսէր։ 6Եւ եղեւ մինչդեռ տա՛յր զպատուէր առնն որ զգեցեալ էր զպատմուճանն սուրբ, եւ ասէր. Ա՛ռ հուր ՚ի միջոյ անուո՛ցդ ՚ի միջոյ քրովբէիցդ. եւ եմուտ եւ եկաց ՚ի մէջ անուոցն։ 7Եւ ձգեաց քերոբ մի զձեռն իւր ՚ի միջոյ քերովբէիցն ՚ի մէջ հրոյն որ էր ՚ի մէջ քրովբէիցն, ա՛ռ եւ ե՛տ ՚ի ձեռս նորա. եւ որ զգեցեալ էր զպատմուճանն սուրբ, ա՛ռ եւ ե՛լ անտի։ 8Հայէի ընդ քերովբէսն, եւ տեսանէի նմանութիւն ձեռաց մարդոյ ՚ի ներքոյ թեւոց նոցա։ 9Տեսանէի՝ եւ ահա անիւք չորք կային մե՛րձ առ քերովբէսն. մի մի անիւ զհետ միոյ միոյ քերովբէի. եւ տեսիլ անուոցն իբրեւ զտեսիլ ակա՛ն կարկեհանի։ 10Եւ տեսիլ նոցա եւ նմանութիւն չորեցունց, որպէս զի իցէ տեսանել անիւ ընդ մէջ անուոյ։ 11Եւ ՚ի գնալն իւրեանց՝ ՚ի չորեսի՛ն կողմանս իւրեանց գնային, եւ յետս ընդդէմ ո՛չ դառնային. զի յոր կողմն հայէր մի առաջն, զհետ նորա երթային եւ յետս ընդդէմ ո՛չ դառնային։ 12Եւ ամենայն մարմինք իւրեանց, եւ ձեռք, եւ թեւք նոցա, եւ անիւք, լի՛ էին աչօք՝ շուրջ զչորեքումբք անուովք նոցա։ 13Եւ անուոցն անուն՝ կոչեցաւ Գեղ գեղ, իմո՛վ իսկ լսելով։ 14Եւ չորք դէմք միոյ. դէմք միոյն՝ դէմք եզին. դէմք երկրորդին՝ դէմք մարդոյ. եւ դէմք երրորդին՝ դէմք առիւծու. եւ դէմք չորրորդին՝ դէմք արծուոյ։ 15Եւ վերացան քերովբէքն։ Ա՛յս ա՛յն գազան է՝ զոր տեսի ՚ի վերայ Քոբա՛ր գետոյ։ 16Եւ ՚ի գնա՛լ քերովբէիցն, գնային եւ անիւքն զհետ նոցա. եւ յամբառնալ քերովբէիցն զթեւս իւրեանց ՚ի վերանալն յերկրէ, ո՛չ դառնային յետս անիւքն. քանզի զհետ նոցա էին։ 17՚Ի կալն նոցա դադարէին, եւ յամբառնալ նոցա՝ ընդ նոսի՛ն վերանային. զի ոգի կենդանութեան էր ՚ի նոսա։ 18Եւ ելին փառքն Տեառն ՚ի միջնօդոյ տաճարին, եւ նստան ՚ի վերայ քերովբէիցն։ 19Եւ ամբարձին քերովբէքն զթեւս իւրեանց, եւ վերացան յերկրէ առաջի իմ, յելանելն նոցա եւ անիւքն զհետ նոցա. եւ կացին առաջի դրանդեաց դրան տանն Տեառն որ հայէ՛ր ընդ արեւելս. եւ փառքն Աստուծոյ Իսրայէլի ՚ի վերայ նոցա։ 20Ա՛յս ա՛յն գազան է զոր տեսի ՚ի ներքոյ Աստուծոյ Իսրայէլի ՚ի վերայ Քոբար գետոյ, եւ գիտացի թէ այն քերովբէք են։ 21Չորք չորք դէմք միոյ միոյ, եւ ութ թեւք միոյ միոյ. եւ նմանութիւն ձեռաց մարդոյ ՚ի ներքոյ թեւոց նոցա. 22եւ նմանութիւն երեսաց նոցա։ Ա՛յս դէմք են զոր տեսի ՚ի ներքոյ փառացն Աստուծոյ Իսրայէլի ՚ի վերայ Քոբա՛ր գետոյ. զտեսիլ նոցա եւ զնոսա. զի ըստ իւրաքանչի՛ւր դիմաց գնային։