1Եւ դարձա՛ք ելաք ընդ ճանապարհն Բասանու. եւ ել Ովգ արքայ Բասանու ընդդէմ մեր. ի՛նքն եւ ամենայն ժողովուրդ նորա պատերազմա՛ւ ՚ի Սեդրային։ 2Եւ ասէ ցիս Տէր. Մի՛ երկնչիցիս ՚ի նմանէ. զի ՚ի ձե՛ռս քո մատնեցի զնա, եւ զամենայն ժողովուրդ նորա, եւ զամենայն երկիր նորա. եւ արասցես նմա որպէս արարեր Սեհոնի՛ արքայի Ամովրհացւոց՝ որ բնակեալ էր յԵսեբոն։ 3Եւ մատնեաց զնա Տէր Աստուած մեր ՚ի ձեռս մեր. ե՛ւ զՈվգ արքայ Բասանու, եւ զամենայն ժողովուրդն նորա. եւ հարա՛ք զնա մինչ ո՛չ թողուլ նմա զաւակ։ 4Եւ յաղթեցա՛ք ամենայն քաղաքացն նորա ՚ի ժամանակի յայնմիկ. եւ ո՛չ էր քաղաք՝ զոր ո՛չ առաք ՚ի նոցանէ. վաթսուն քաղաք զամենայն շուրջ զգաւառաւն Արբովկայ թագաւորին Ովգայ ՚ի Բասան. 5ամենայն քաղաքք ամուրք բարձրապարիսպք, դրամբք եւ դռնափակօք. թո՛ղ ցքաղաքսն արձակաքաղաքս Փերեզացւոց բազո՛ւմս յոյժ։ 6Եւ սատակեցաք զնոսա՝ որպէս արարաք զՍեհոն արքայ Եսեբոնի. եւ սատակեցաք զամենայն քաղաքս մի ըստ միոջէ, եւ զկանայս եւ զմանկունս. եւ ո՛չ թողաք մազապուր. 7եւ զամենայն զանասուն եւ զկապուտ քաղաքացն ածաք մեզ յաւար։ 8Եւ առա՛ք ՚ի ժամանակի յայնմիկ զերկիրն ՚ի ձեռաց երկուց թագաւորացն Ամովրհացւոց. որ էին յայնկոյս Յորդանանու, յԱռնովնա՛յ մինչեւ ցԱհերմոն։ 9Եւ Փիւնիկեցիք անուանեցին զԱհերմոնն Սանիովր. եւ Ամովրհացին անուանեաց զնա Սանիր։ 10Ամենայն քաղաքք Միսովրայ, եւ ամենայն Գաղաադ, եւ ամենայն Բասան, մինչեւ ցԵղքա, եւ ցԵդրային. քաղա՛քք թագաւորութեան էին Ովգայ ՚ի Բասան։ 11Զի Ո՛վգ միայն արքայ Բասանու մնա՛ց յՌափայնոց անտի. եւ գահոյք նորա գահոյք երկաթիք. եւ ահա է այն յամրոցի՛ որդւոցն Ամոնայ՝ ինն կանգուն երկայնութիւն նորա եւ չորք կանգուն լայնութիւն նորա, սկայի՛ց կանգնով։ 12Եւ զերկիրն զայն ժառանգեցաք ՚ի ժամանակի յայնմիկ, յԱրոերայ որ է առ եզերբ ձորոյն Առնովնայ։ Եւ զկէս ձորոյն Գաղաադու եւ զքաղաքս նորա ետու Ռուբինի եւ Գադայ. 13եւ զաւելորդն Գաղաադու եւ զամենայն Բասան՝ զթագաւորութիւնն Ովգայ՝ ետու կիսոյ ցեղին Մանասէի. եւ զամենայն գաւառն Արբովկայ, եւ զամենայն Բասանն, որ երկիր Ռափայնոցն համարիցի։ 14Եւ Յայիր՝ որդի Մանասէի ա՛ռ զամենայն գաւառն Արբովկայ մինչեւ ցսահմանս Գարգասեայ եւ Ոմքատեայ. եւ անուանեաց զնա յիւր անուն, զԲասան՝ Աւովթիէր, մինչեւ ցայսօր ժամանակի։ 15Եւ Մաքիրայ ետու զԳաղաադ. 16եւ Ռուբինի եւ Գադայ ետու ՚ի Գաղաադէ, մինչեւ ՚ի ձորն Առնովնայ, ընդ մէջ ձորոյն սահման մինչեւ ցԱրբոկ, ձո՛րն սահման որդւոցն Ամոնայ. 17եւ Արաբիա, եւ Յորդանան սահման է նմա ՚ի Քենէրեթայ մինչեւ ցծովն Արաբիայ ծովն Աղի. յԱսեդովթայ յարեւելից Փասգայ։

18Եւ պատուիրեցի՛ ձեզ ՚ի ժամանակին յայնմիկ՝ եւ ասեմ. Տէր Աստուած մեր ետ ձեզ զերկիրս զայս ՚ի վիճակ. վառեցարո՛ւք անցէ՛ք առաջի եղբարց ձերոց՝ որդւոցն Իսրայէլի ամենայն զօրաւոր։ 19Բայց կանայք ձեր եւ մանկունք ձեր, եւ անասուն ձեր, գիտե՛մ զի անասուն բազում է ձեր, բնակեսցեն ՚ի քաղաքս ձեր՝ զոր ետու ձեզ, 20մինչեւ զետեղեսցէ Տէր Աստուած մեր զեղբարս ձեր, որպէս եւ զձե՛զ. զի ժառանգեսցեն եւ նոքա զերկիրն՝ զոր Տէր Աստուած մեր տացէ նոցա յայնկոյս Յորդանանու. եւ դարձջի՛ք այսրէն յիւրաքանչի՛ւր ժառանգութիւն իւր՝ զոր ետու ձեզ։ 21Եւ Յեսուայ պատուիրեցի ՚ի ժամանակին յայնմիկ՝ եւ ասեմ. Ա՛չք ձեր իսկ տեսին զամենայն զոր արար Տէր Աստուած քո ընդ երկուս թագաւորսն ընդ այնոսիկ. նո՛յնպէս արասցէ Տէր ընդ ամենայն թագաւորութիւնս՝ յորոց վերայ դիմեսցես դու. 22մի՛ զանգիտիցէք. զի Տէր Աստուած մեր ինքնի՛ն պատերազմեսցի փոխանակ ձեր։

23Եւ աղաչեցի զՏէր Աստուած ՚ի ժամանակին յայնմիկ՝ եւ ասեմ. 24Տէր՝ Տէր, դո՛ւ սկսար ցուցանել ծառայի քում զսաստկութիւն քո եւ զզօրութիւն քո, զձեռն հզօր եւ զբազուկ բարձր. քանզի ո՞վ է Աստուած յերկինս կամ յերկրի՝ որ առնիցէ որպէս դու արարեր ըստ զօրութեան քում։ 25Արդ՝ անցեա՞լ տեսից զերկիրն բարի՝ որ է յա՛յնկոյս Յորդանանու, զլեա՛ռնն բարի զերկրորդն Լիբանան։ 26Եւ անտե՛ս արար զիս Տէր վասն ձեր, եւ ո՛չ լուաւ ինձ. եւ ասէ ցիս Տէր. Շա՛տ լիցի քեզ՝ մի՛ եւս յաւելուցուս խօսել զբանդ զայդ։ 27Ե՛լ ՚ի կատար կոփածոյիդ, եւ հայեցեալ աչօք քովք ընդ ծովակողմն, եւ ընդ հիւսւսի, եւ ընդ հարաւ, եւ ընդ արեւելս, տե՛ս աչօք քովք. քանզի ո՛չ անցանիցես ընդ այդ Յորդանան։ 28Եւ պատուիրեա՛ Յեսուայ եւ զօրացուսցե՛ս զնա, եւ մխիթարեսցե՛ս զնա. զի նա՛ անցցէ առաջի ժողովրդեան իմոյ այդորիկ. եւ նա՛ ժառանգեցուսցէ դոցա զերկիրն զոր տեսեր։ 29Եւ նստա՛ք ՚ի հովիտսն մերձ ՚ի տունն Փոգովրայ։