1Եւ եղիցի եթէ մտանիցես յերկրին զոր Տէր Աստուած քո տացէ քեզ ՚ի ժառանգութիւն եւ ժառանգեսցե՛ս զնա, եւ բնակեսցես ՚ի նմա։ 2Առցես զառաջինս պտղոց զերկրին քոյ զոր Տէր Աստուած քո տացէ քեզ. եւ արկցե՛ս ՚ի կողոփ. եւ գնասցե՛ս ՚ի տեղին՝ զոր ընտրեսցէ Տէր Աստուած անուանել զանուն իւր անդ։ 3Եւ երթիցես առ քահանա՛յն, որ կայցէ յաւուրսն յայնոսիկ, եւ ասասցե՛ս ցնա. Գոհանա՛մ այսօր զՏեառնէ Աստուծոյ իմմէ, զի մտի յերկիրն զոր երդուաւ Տէր հարցն մերոց տա՛լ մեզ։ 4Եւ առցէ՛ քահանայն զկողոփն ՚ի ձեռաց քոց. եւ դիցէ՛ զնա առաջի սեղանոյն Տեառն Աստուծոյ քոյ։ 5Եւ պատասխանի տուեալ, ասասցե՛ս առաջի Տեառն Աստուծոյ քոյ. ԶԱսորիս եթող հա՛յր իմ եւ էջ յԵգիպտոս, եւ պանդխտեցա՛ւ անդ սակա՛ւ ինչ թուով, եւ եղեւ անդ յա՛զգ մեծ. եւ բազմացաւ անդ յո՛յժ յոյժ. 6եւ չարչարեցին զմեզ Եգիպտացիք, լլկեցին զմեզ եւ եդին ՚ի վերայ մեր գո՛րծ խստութեան։ 7Եւ աղաղակեցաք առ Աստուած հարցն մերոց. եւ լուաւ ձայնի մերում, եւ ետես զտառապանս մեր եւ զաշխատութիւն մեր, եւ զնեղութիւն. 8եւ եհան զմեզ Տէր յԵգիպտոսէ ինքնի՛ն զօրութեամբ մեծաւ, եւ հզօր ձեռամբ, եւ բարձր բազկաւ, եւ մեծամեծ տեսլեամբք, եւ նշանօք եւ արուեստիւք. 9եւ ած զմեզ ՚ի տեղիս յայս. եւ ե՛տ մեզ զերկիրս զայս. երկիր՝ որ բղխէ զկա՛թն եւ զմեղր։ 10Եւ արդ աւասիկ բերի՛ զպտուղ արդեանց երկրին զոր ե՛տ ինձ Տէր, երկիր՝ որ բղխէ զկաթն եւ զմեղր։ Եւ երկի՛ր պագցես անդ առաջի Տեառն Աստուծոյ քոյ. 11եւ ուրա՛խ լիցիս անդ յամենայն բարութիւնսն՝ զոր ետ քեզ Տէր Աստուած քո, եւ տա՛ն քում. դո՛ւ եւ Ղեւտացի՛ն եւ պանդուխտն որ ՚ի քեզ։

12Եւ եթէ կատարեսցես տասանորդել զամենայն տասանորդս երկրի քոյ. յամին երկրորդի կրկին տասանորդեսցիս Ղեւտացւոյն, եւ եկին, եւ որբոյ, եւ այրւոյ. եւ կերիցեն ՚ի քաղաքս քո եւ յագեսցին։ 13Եւ ասասցես առաջի Տեառն Աստուծոյ քոյ. Սրբեցի՛ ՚ի բաց զսրբութիւնսն ՚ի տանէ իմմէ. եւ ետու զայն Ղեւտացւոյն, եւ եկին, եւ որբոյ, եւ այրւոյ, ըստ ամենայն պատուիրանաց Տեառն Աստուծոյ՝ զոր պատուիրեալ էր ինձ. ո՛չ անցի զպատուիրանաւ քով եւ ո՛չ մոռացայ. 14եւ ո՛չ կերայ ՚ի վիշտս ՚ի նոցանէ. եւ ո՛չ ընծայեցի ՚ի նոցանէ պղծոյն. եւ ո՛չ ետու ՚ի նոցանէ մեռելոյ։ Լուա՛յ ձայնի Տեառն Աստուծոյ իմոյ. եւ արարի՛ որպէս պատուիրեցեր ինձ։ 15Արդ՝ հայեա՛ց ՚ի սրբոյ բնակութենէ քումմէ յերկնից, եւ օրհնեա՛ զժողովուրդ քո զԻսրայէլ, եւ զերկիրն զոր ետուր նոցա. որպէս երդուար հարցն մերոց, տա՛լ մեզ զերկիր որ բղխէ զկաթն եւ զմեղր։ 16Յաւուր յայնմիկ պատուիրեա՛ց մեզ Տէր Աստուած մեր առնել զամենայն իրաւունս զայսոսիկ, եւ զդատաստանս. եւ պահեսջի՛ք եւ արասջի՛ք զսոսա յամենայն սրտէ ձերմէ, եւ յամենայն անձնէ ձերմէ։ 17ԶՏէր Աստուած քո ընտրեա՛ այսօր լինել քեզ Աստուած, եւ գնասջի՛ք ՚ի ճանապարհս նորա, եւ պահեսջի՛ք զիրաւունս եւ զդատաստանս նորա՝ լսե՛լ ձայնի նորա։ 18Եւ Տէր ընտրեաց զքե՛զ այսօր լինե՛լ նմա ժողովուրդ սեպհական՝ որպէս եւ խոստացաւ քեզ. պահել զամենայն պատուիրանս նորա. 19եւ լինել քեզ ՚ի վե՛ր քան զամենայն ազգս. որպէս արա՛ր զքեզ անուանի եւ բարգաւա՛ճ եւ փառաւոր՝ լինել քեզ ժողովուրդ սո՛ւրբ Տեառն Աստուծոյ քում. որպէս եւ խոստացա՛ւ քեզ։