1Ա՛յս են գիրք հրամանաց Աստուծոյ, եւ օրէնք որ կան յաւիտեան։ Ամենեքին որ ընդունին զնա կեա՛ն, եւ որք թողուն զնա մեռցի՛ն։ 2Դա՛րձ Յակովբ՝ եւ բո՛ւռն հար զնմանէ, ընդ ծագումն առաջի լուսոյ նորա։ 3Մի՛ տար այլում զփառս քո, եւ մի՛ զօգուտ ազգի օտարոտւոյ։ 4Երանի՛ է մեզ Իսրայէլ, զի հաճոյքն Աստուծոյ ծանօթք մե՛ր են։ 5Քաջալերեա՛ց ժողովուրդ իմ. յիշեա՛ Իսրայէլ. 6զի վաճառեցարուք յազգս՝ եւ ո՛չ ՚ի կորուստ. փոխանակ զի բարկացուցէք դուք զԱստուած՝ մատնեցայք հակառակորդաց. 7քանզի զայրացուցէք զԱրարիչ ձեր. զոհեցէք դիւաց՝ եւ ո՛չ Աստուծոյ։ 8Մոռացարուք զկերակրիչն ձեր զԱստուած յաւիտեան. տրտմեցուցէք եւ զդայեակն ձեր զԵրուսաղէմ. 9զի ետես զեկեալ ՚ի վերայ ձեր զբարկութիւն յԱստուծոյ՝ եւ ասէ. Լուարո՛ւք պանդուխտք Սիովնի, զի ած ՚ի վերայ իմ Տէր սուգ մեծ։ 10Տեսի զգերութիւն ուստերաց եւ դստերաց իմոց, զոր ած ՚ի վերայ նոցա յաւիտենականն։ 11Սնուցի զնոսա ուրախութեամբ, եւ յուղարկեցի զնոսա լալո՛վ եւ սգով։ 12Մի՛ ոք ոտնհա՛ր լիցի այրւոյս, որ մնացի միայնացեա՛լս ՚ի բազմաց. թափո՛ւր եղէ վասն բազում մեղաց որդւոց իմոց. զի խոտորեցան յօրինացն Աստուծոյ, 13եւ զիրաւունս նորա ո՛չ ծանեան. եւ ո՛չ գնացին ՚ի ճանապարհս պատուիրանաց Աստուծոյ, եւ ո՛չ ՚ի շաւիղս խրատու արդարութեան նորա ելին։ 14Եկեսցեն պանդուխտք Սիովնի, եւ յիշեսցեն զգերութիւն ուստերաց եւ դստերաց իմոց զոր ած ՚ի վերայ նոցա Յաւիտենականն։ 15Ած ՚ի վերայ նոցա ա՛զգ հեռաւոր, ազգ լի՛րբ եւ այլալեզու. 16որ ո՛չ ակն ածէին ՚ի ծերոյն, եւ ո՛չ ողորմէին տղայոյն. տարան զսիրելիս այրւոյս, եւ ՚ի դստերաց թափո՛ւր արարին զմնացեալս։ 17Եւ ես՝ զի չէի ձեռնհաս օգնել ձեզ։ 18Որ ած զչարիսն ՚ի վերայ, փրկեսցէ՛ զձեզ ՚ի ձեռաց թշնամեաց ձերոց։ 19Գնացէ՛ք որդեակք գնացէ՛ք, զի ես մնացի աւերա՛կ։ 20Մերկացայ զպատմուճան խաղաղութեան, եւ զգեցայ զքո՛ւրձ խնդրուածոց իմոց. աղաղակեցի առ յաւիտենականն յաւուրս իմ։ 21Քաջալերեցարո՛ւք որդեակք. գոչեցէ՛ք առ Աստուած եւ փրկեսցէ զձեզ ՚ի բռնութենէ ձեռաց թշնամեաց։ 22Զի ես յուսացայ ՚ի յաւիտենականն վասն փրկութեան ձերոյ. եւ եկն ինձ ուրախութիւն ՚ի սրբոյն ՚ի վերայ ողորմութեանն, որ եկեսցէ ձեզ ընդ հուպ ՚ի յաւիտենականէ Փրկչէ՛ ձերմէ։ 23Զի յուղարկեցի զձեզ սգով եւ լալով՝ եւ տացէ ինձ Աստուած զձեզ ցնծութեամբ եւ ուրախութեամբ յաւիտեանս։ 24Զի որպէս այժմ տեսին պանդուխտքն Սիովնի զգերութիւն ձեր. նոյնպէս տեսցեն ընդ հո՛ւպ յԱստուծոյ զփրկութիւնն ձեր, որ եկեսցէ ՚ի վերայ ձեր փառօք մեծօք՝ եւ լուսաւորութեամբ ՚ի յաւիտենականէն։ 25Ո՛րդեակք՝ երկայնամի՛տ եղերուք ՚ի վերայ բարկութեան հասելոյ ձեզ յԱստուծոյ։ Հալածեաց զքեզ թշնամին քո, եւ տեսցես զկորուստ նորա ընդ հո՛ւպ, եւ ելցես ՚ի վերայ պարանոցի նորա։ 26Փափկասունք իմ գնացին զճանապարհս խիստս. վարեցան իբրեւ զհօտ յափշտակեալ ՚ի թշնամեաց։ 27Քաջալերեցարո՛ւք որդեակք՝ եւ գոչեցէ՛ք առ Աստուած, զի եղիցի ձեզ յիշատա՛կ ՚ի վարչէն. 28զի որպէս եղեն ձեր միտք մոլորեալք յԱստուծոյ. տասնպատիկ եղերուք դառնա՛լ եւ խնդրել զնա. 29զի որ ածն ՚ի վերայ ձեր չարիս, ածցէ՛ ՚ի վերայ ձեր զյաւիտենական ուրախութիւնն հանդերձ փափկութեամբն ձերով։

30Քաջալերեա՛ց Երուսաղէմ, մխիթարեսցէ զքեզ որ անուանեաց զքեզ։ 31Եղո՛ւկ որ չարչարեացն զքեզ, եւ որ խնդացին ընդ կործանումն քո։ 32Եղո՛ւկ են քաղաքքն որոց ծառայեցին մանկունք քո. եւ եղո՛ւկ է որ ընկալաւ զորդիսն քո։ 33Զի որպէս խնդաց նա ՚ի վերայ կործանման քոյ, եւ ուրա՛խ եղեւ յանկանելն քում. նոյնպէս տրտմեսցի ՚ի վերայ աւերածին իւրոյ։ 34Եւ բարձի՛ց ՚ի նմանէ զուրախութիւն բազում խրախճանութեանն. եւ դարձուցից ՚ի սո՛ւգ զպերճութիւն նորա։ 35Եկեսցէ ՚ի վերայ նորա հո՛ւր ՚ի յաւիտենականէն աւո՛ւրս բազումս. եւ եղիցի բնակութիւն դիւաց զբազում ժամանակս։

36Հայեա՛ց ընդ արեւելս Երուսաղէմ, եւ տե՛ս զեկեալ ուրախութիւնն քեզ յԱստուծոյ։ 37Ահաւադիկ գա՛ն որդիքն քո զորս յուղարկեցեր. գան ժողովեալք յարեւելից մինչեւ ՚ի մուտս արեւու բանի՛ւ Սրբոյն. խնդացեալք փառօքն Աստուծոյ։