1Եւ լուա՛ւ Յեբուսթէ որդի Սաւուղայ եթէ մեռա՛ւ Աբեններ ՚ի Քեբրոն, լուծա՛ն ձեռք իւր. եւ ամենայն արք Իսրայէլի լքան։ 2Եւ արք երկու գլխաւո՛րք գնդիցն Յեբուսթեայ որդւոյ Սաւուղայ, անուն միումն Բաանա, եւ անուն երկրորդին Ռիքաբ. որդիք Ռեմոնայ Բերովթացւոյ, յորդւոցն Բենիամինի. զի եւ Բերովթ որդւոցն Բենիամինի ՚ի համարի՛ էր։ 3Եւ փախեա՛ն Բերովթացիքն ՚ի Գեթթայի. եւ էին ա՛նդ պանդխտացեալք մինչեւ ցայսօր։ 4Եւ Յովնաթանու որդւոյ Սաւուղայ է՛ր որդի մի հա՛շմ ոտիւք, որդի ամաց հնգից. եւ զնա ՚ի հասանե՛լ գուժին Սաւուղայ եւ Յովնաթանու որդւոյ նորա, յԵզրայելէ ա՛ռ դայեակ իւր եւ փախեաւ. եւ եղեւ ընդ փութանա՛լն իւրում ՚ի գաղթել, անկաւ եւ կաղացաւ. եւ անուն նորա Մեմփիբոսթէ։ 5Եւ գնացին որդիքն Ռեմոնայ Բերովթացւոյ՝ Ռեքաբ եւ Բաանա, եւ մտին ՚ի տօթաժամո՛ւ աւուրն ՚ի տուն Յեբուսթեայ. եւ նա՝ ննջէր յանկողնի՛ ՚ի հասարակ աւուրն. 6եւ բարապան տանն սրբէր ցորեան, եւ նիրհեաց եւ ՚ի քո՛ւն եմուտ. եւ Ռեքաբ եւ Բաանա եղբարք ղօղեցին, 7եւ մտի՛ն ՚ի տունն. եւ Յեբուսթէ ննջէ՛ր ՚ի գահոյս իւրում ՚ի սենեկի. եւ հարի՛ն զնա եւ սպանին. եւ հատի՛ն զգլուխ նորա, եւ առին զգլուխն, եւ գնացին զճանապարհն արեւելից զամենայն գիշերն. 8եւ բերին զգլուխն Յեբուսթեայ առ Դաւի՛թ ՚ի Քեբրոն. եւ ասեն ցարքայ. Ահա գլուխ Յեբուսթեայ որդւոյ Սաւուղայ թշնամւոյ քոյ, որ խնդրէր զանձն քո. եւ Տէր ետ տեառն մերում արքայի վրէժխնդրութիւն ՚ի թշնամեաց իւրոց, որպէս յաւուր յայսմիկ ՚ի Սաւուղայ թշնամւոյ քումմէ՝ եւ ՚ի զաւակէ նորա։ 9Եւ պատասխանի՛ ետ Դաւիթ Ռեքաբայ եւ Բաանայ եղբօր նորա՝ որդւոց Ռեմոնայ Բերովթացւոյ՝ եւ ասէ ցնոսա. Կենդանի՛ է Տէր որ փրկեաց զանձն իմ յամենայն նեղութենէ. 10զի որ պատմեաց ինձ թէ մեռաւ Սաւուղ, եւ նմա թուէր թէ աւետիս տայցէ առաջի իմ, կալա՛յ եւ սպանի՛ զնա ՚ի Սիկիլակ. որում օրէն էր ինձ տա՛լ աւետչեայ։ 11Եւ արդ՝ ա՛րք չարք՝ սպանէք զայր արդար ՚ի տա՛ն իւրում յանկողնի. եւ արդ խնդրեցի՛ց զարիւն նորա ՚ի ձեռաց ձերոց, եւ սատակեցի՛ց զձեզ յերկրէ։ 12Եւ հրաման ետ Դաւիթ մանկտւոյ իւրում, եւ սպանին զնոսա, եւ կտրեցին զձեռս եւ զոտս նոցա, եւ կախեցին ՚ի վերայ ջրբղխին ՚ի Քեբրոն. եւ զգլուխն Յեբուսթեայ թաղեցին ՚ի գերեզմանի Աբեններեայ որդւոյ Ներեայ ՚ի Քեբրոն։