1՚Ի քսաներորդի եւ երկրորդի ամի Յովասու որդւոյ Ոքոզիայ արքայի Յուդայ, թագաւորեա՛ց Յովաքազ որդի Յէուայ ՚ի վերայ Իսրայէլի ՚ի Սամարիա ամս եւթնուտասն։ 2Եւ արար չա՛ր առաջի Տեառն, եւ գնաց զհետ մեղացն Յերոբովամայ որդւոյ Նաբատայ՝ որ յանցո՛յցն զԻսրայէլ, եւ ո՛չ մեկնեցաւ ՚ի նոցանէն։ 3Եւ բարկացա՛ւ սրտմտութեամբ Տէր Իսրայէլի, եւ ետ զնոսա ՚ի ձեռս Ազայելի արքայի Ասորւոց, եւ ՚ի ձեռն որդւոյ Ադերայ որդւոյ Ազայելի զամենայն աւուրս։ 4Եւ աղաչեաց Յովաքազ զերեսս Տեառն. եւ լուաւ նմա Տէր. զի ետես զնեղութիւն Իսրայէլի՝ զոր նեղեաց զնա արքայն Ասորւոց։ 5Եւ ետ Տէր փրկիչ Իսրայէլի. եւ ել ՚ի ձեռանէ Ասորւոց. եւ նստան որդիքն Իսրայէլի ՚ի բնակութիւնս իւրեանց որպէս յերէկն եւ յեռանդ։ 6Սակայն ո՛չ մեկնեցան ՚ի մեղացն Յերոբովամայ որդւոյ Նաբատայ որ յանցոյցն զԻսրայէլ, այլ ՚ի նոսա գնացին. նա՝ եւ անտառն կա՛յր ՚ի Սամարիա։ 7Եւ ո՛չ մնաց Յովաքազայ զօր, այլ հեծեալք յիսուն՝ եւ կառք տասն, եւ տասն հազար հետեւակաց. զի կորոյս զնոսա արքայն Ասորւոց, եւ եդ զնոսա իբրեւ զհող ՚ի կոխումն։ 8Եւ մնացորդք բանից Յովաքազու՝ եւ ամենայն ինչ զոր արար՝ եւ զօրութիւնք նորա, ո՞չ աւանիկ գրեալ են ՚ի գիրս բանից աւուրց թագաւորացն Իսրայէլի։ 9Եւ ննջեաց Յովաքազ ընդ հարս իւր, եւ թաղեցին զնա ընդ հարս նորա ՚ի Սամարիա։ Եւ թագաւորեա՛ց Յովաս որդի նորա ընդ նորա։ 10Յամի երեսներորդի եւ եւթներորդի Յովասու արքայի Յուդայ՝ թագաւորեաց Յովաս որդի Յովաքազու ՚ի վերայ Իսրայէլի ՚ի Սամարիա ամս երկոտասան։ 11Եւ արար չա՛ր առաջի Տեառն, եւ ո՛չ մեկնեցաւ յամենայն մեղաց Յերոբովամու որդւոյ Նաբատայ որ յանցոյցն զԻսրայէլ, այլ ՚ի նոսա՛ գնաց։ 12Եւ մնացորդք բանից Յովասու՝ եւ ամենայն ինչ զոր արար, եւ զօրութիւնք նորա զոր արա՛ր ընդ արքային Յուդայ, ո՞չ աւանիկ գրեալ են ՚ի գիրս բանից աւուրց թագաւորացն Իսրայէլի։ 13Եւ ննջեա՛ց Յովաս ընդ հարս իւր. եւ Յերոբովամ նստաւ յաթոռ նորա ※. եւ թաղեցաւ Յովաս ՚ի Սամարիա ընդ թագաւորս Իսրայէլի։

14Եւ Եղիսեէ հիւանդացաւ հիւանդութիւն, որով եւ մեռաւ իսկ. եւ էջ առ նա Յովաս արքայ Իսրայէլի, եւ ելաց ՚ի վերայ երեսաց նորա՝ եւ ասէ. Հա՛յր՝ հա՛յր, կառքդ Իսրայէլի եւ հեծեալք նորա։ 15Եւ ասէ ցնա Եղիսեէ. Ա՛ռ դու զաղեղն քո՝ եւ զնետս քո։ Եւ ա՛ռ զաղեղն եւ զնետս։ 16Եւ ասէ ցարքայն Իսրայէլի. Մո՛ւտ ընդ աղեղնդ ձեռօք քովք։ Եւ եմուտ ընդ աղեղնն ձեռօք իւրովք. եւ ե՛դ Եղիսեէ զձեռն իւր ՚ի վերայ ձեռաց արքային. 17եւ ասէ. Բա՛ց զպատուհանդ որ է ընդ արեւելս։ Եւ եբաց. եւ ասէ Եղիսեէ. Ձգեա՛։ Եւ ձգեաց. եւ ասէ. Նե՛տ փրկութեան Տեառն, եւ նետ փրկութեան ընդդէմ Ասորւոց. եւ հարցես զԱսորիս յԱփեկ մինչեւ ՚ի սպառ։ 18Եւ ասէ ցնա Եղիսեէ. Ա՛ռ դու քեզ նետս։ Եւ առ։ Եւ ասէ ցարքայն Իսրայէլի. Ձգեա՛ եւ հա՛ր զգետինդ։ Եւ եհար արքայն երիցս՝ եւ եկաց։ 19Եւ տրտմեցաւ ՚ի վերայ նորա այրն Աստուծոյ, եւ ասէ. Եթէ հարեալ էիր հնգի՛ցս կամ վեցի՛ցս, յա՛յնժամ հարկանէիր զԱսորիս մինչեւ ՚ի սպառ. եւ արդ՝ երի՛ցս հարցես զԱսորիս։ 20Եւ մեռաւ Եղիսեէ, եւ թաղեցի՛ն զնա։ Եւ մեկնակազէնքն Մովաբու ելին յերկիրն ՚ի գալ տարւոյն։ 21Եւ եղեւ ՚ի թաղե՛լ նոցա զայր մի. եւ ահա տեսին զմեկնակազէնսն՝ եւ ընկեցին զայրն ՚ի գերեզմանն Եղիսէի. եւ գնաց եւ մերձեցաւ յոսկերսն Եղիսէի՝ եւ կենդանացաւ. եւ կանգնեցաւ ՚ի վերայ ոտից իւրոց։

22Եւ Ազայէլ արքայ Ասորւոց նեղեաց զԻսրայէլ զամենայն աւուրս Յովաքազու։ 23Եւ ողորմեցաւ նոցա Տէր, եւ գթացաւ ՚ի նոսա, եւ հայեցաւ ՚ի նոսա, վասն ուխտին իւրոյ՝ որ ընդ Աբրաամու եւ ընդ Սահակայ եւ ընդ Յակոբու. եւ ո՛չ կամեցաւ Տէր ապականել զնոսա. եւ ո՛չ ընկէց զնոսա յերեսաց իւրոց։

24Եւ մեռաւ Ազայէլ արքայ Ասորւոց, եւ թագաւորեաց որդի Ադերայ՝ որդի նորա ընդ նորա։ 25Եւ դարձաւ Յովաս որդի Յովաքազու, եւ ա՛ռ զքաղաքսն ՚ի ձեռաց որդւոյ Ադերայ՝ որդւոյ Ազայելի. զորս ա՛ռ ՚ի ձեռաց Յովաքազու հօր նորա ՚ի պատերազմին. երիցս եհար զնա Յովաս, եւ դարձոյց զքաղաքսն Իսրայէլի։